San Juan 2 - Tüpä Ñe'ëngagwer

Mendasa tekwa Caná Galilea ve

¹ Ipare imombosapɨsa arɨ pɨpe oime mendasa tekwa Caná Galilea ve. Jesús sɨ avei sekoi a'eve,

² Jesús iyavei semimbo'e eta icho'oprɨ yuvɨrekoi mendasave.

³ Opa tëi rumo uva rɨkwer, a'ese Jesús sɨ aipo e'i chupe:–Ndovɨreko iri uva rɨkwer yuvɨreko.

⁴ Jesús omboyevɨ chupe:–Itöi, ¿ma'erä vo aipo ere cheu? Che arɨ nde'i vɨtei mba'e apo agwä cheu.

⁵ A'ese ichɨ aipo e'i ava ɨgwa rese i'añeko va'e upe:–Peyapo opakatu mba'e semimbotar pe kwaise.

⁶ A'eve oime ñepëi ova kambuchi ita ku'i apoprɨ, a'e judío oiporu pietase oyepoi agwä yuvɨreko yepi a'e kambuchi pɨpe oike cincuenta litros, amove oike setenta litros ɨ ipɨpe.

⁷ Jesús aipo e'i i'añeko va'e upe:–Pemboapɨpopa ɨ ko kambuchi pɨpe.A'e opa omboapɨpo tuprɨ ite yuvɨreko,

⁸ ipare Jesús aipo e'i:–Penose evokoi chi'ïmi, peraso pieta rese añekosar upe.Egwë e'i ete yapo yuvɨreko.

⁹ I'añeko va'e pieta rese osä'a ɨ oyeapo va'e uva rɨkwer, ndoikwai ete kesui osë a'e uva rɨkwer. Ɨgwa rese i'añeko va'e gweraño tuprɨ oikwa, esepia a'e vɨnose ɨ yuvɨreko. Evokoiyase pieta rese añekosar oñe'ë omenda va'e upe

¹⁰ aipo e'i:–Opakatu ava yuvɨroɨ'u yɨpɨndar uva rɨkwer avɨye katu va'e, ipare rumo icho'oprɨ yuvɨroɨ'upase, a'ese yuvɨroɨ'u uva rɨkwer ndasepɨi va'e. Nde rumo ereyapokatu uva rɨkwer avɨye katu va'e.

¹¹ Ko yɨpɨndar poromondɨisa Jesús oyapo va'e tekwa Caná Galilea ɨvɨ rupi, a'eve omboyekwa gweko pirätäsa; iyavei semimbo'e eta vɨroya ite yuvɨreko.

¹² Ipare koiye oso tekwa Cafarnaúm ve, ichɨ avei, tɨvrɨ reseve supive, iyavei semimbo'e eta yuvɨraso supi. A'eve yuvɨrekoi movɨrö arɨ tëi.

Jesús omoatɨrö tüpäro pɨpe (Mt 21.12-13; Mc 11.15-18; Lc 19.45-46)

¹³ Esepia vɨrovɨ ite Pascua pieta resendar judío upe ou, a'ese Jesús oso tekwa Jerusalén ve.

¹⁴ A'eve osepia tüpäro pɨpe gwaka mondosar, ovesa iyavei apɨkasu mondosar, gwarepochi rekuñarösar avei ogwapɨ a'eve yuvɨnoi.

¹⁵ A'e osepiase, Jesús oyapo tukumbo omombopa tuprɨ tüpäro sui opakatu ava imba'e reseve-seve, seimba ovesa, seimba gwaka avei. Gwarepochi rekuñarösar sui otɨapɨ-apɨi igwarepochi ɨvɨ rupi, iyavei mba'e renda opa omombo tuprɨ.

¹⁶ Apɨkasu mondosareta upe aipo e'i:–¡Penosepa ko mba'e kurïtëi avesui! ¡Ani che Ru rëtä mba'e mondosa tëi pereko!

¹⁷ Evokoiyase semimbo'e eta, oyemoma'endu'a ñe'ësa Ikwachiaprɨ araka'endar aipo e'i va'e rese: “Nde rëtä rese che rekate'ɨ̇sa sui che mokañɨrä yuvɨreko.”

¹⁸ Judío eta oporandu yuvɨreko chupe:–¿Mba'e vo ereyapora nde mborerekwasa mopore'ɨ̇ agwä kurïtëi oreu?

¹⁹ Jesús omboyevɨ chupe aipo e'i:–Pemondurupa ko tüpäro, mbosapɨ arɨ pare rumo amopü'a irira.

²⁰ Judío eta aipo e'i yuvɨreko chupe:–Ko tüpäro rese mboravɨkɨsa cuarenta y seis aravɨter tuprɨ, ¿nde evokoiyase eremopü'ara mbosapɨ arɨ rupive?

²¹ Oñe'ëse Jesús tüpäro rese, gwete upe tëi rumo aipo e'i.

²² Okwerayevɨse rumo manosa sui, semimbo'e eta oyemoma'endu'a iñe'ë agwer rese, ipare vɨroya ite yuvɨreko ñe'ësa Ikwachiaprɨ Jesús ñe'ëngagwer avei.

Jesús oikwa opakatu ava rekokwer

²³ Jesús sekoi vɨtese Jerusalén ve, Pascua pieta pɨpe, seta ite ava vɨroya va'e osepiase poromondɨisa sembiapo yuvɨreko.

²⁴ Jesús rumo ndovɨroyai ete ava eta, esepia opakatu ite ava rekokwer oikwa.

²⁵ A'e ndoipotai ete omombe'u va'erä ava rekokwer yuvɨreko chupe, esepia ni'ä a'e opa ite oikwa ava pɨ'añemoñetasa.