San Juan 17 - Tüpä Ñe'ëngagwer

Jesús oyerure gwemimbo'e eta rekokwer rese

¹ Ko imombe'u pare, Jesús oma'e ɨva rese aipo e'i: “Che Ru, oyepota ite arɨ cheu: emboetei katu nde Ra'ɨrɨ sereko, a'ese avei nde mboetei katura nde rereko yuvɨreko.

² Nde ni'ä erembou Cheu mborerekwasa opakatu ava arɨve areko va'erä, amondo va'erä avei tekovesa apɨre'ɨ̇ vichiko opakatu eremombe'u va'ekwer upe narä.

³ Iyavei ko tekovesa apɨre'ɨ̇ pɨpe yɨpɨndar nde kwa rane itera yuvɨreko, ñepëi Tüpä supiete va'e nderekosa pɨpe, iyavei akoi erembou va'e Jesucristo ko ɨvɨ pɨpe.”

⁴ “Che ni'ä oromboetei ko ɨvɨ pɨpe nderereko, iyavei amboavɨye ite nde porokwaita chekwai va'e rese eve.

⁵ Sese kurïtëi che Ru, embou nde yesuindar mba'e porañete va'e cheu, inungar akoi yɨpɨndar areko va'e nde rese ɨvɨ apoe'ɨ̇seve.

⁶ Akoi nde ereiporavo va'e ko ɨvɨ pɨpe erembou va'erä cheu, orokwa uka ite yuvɨreko chupe. A'e yuvɨrekoi va'ekwer nde rupi, nde evokoiyase erembou cheu, a'e oyapo ite nde porokwaita yuvɨreko.

⁷ Kurïtëi oikwapa ite opakatu mba'e ndesuindar ouse yuvɨreko cheu;

⁸ amombe'u avei nde ñe'ë yuvɨreko chupe erembou va'e cheu, iyavei a'e vɨroya ite yuvɨreko. Oikwa avei ndesui ayuse, vɨroya avei yuvɨreko nde che mbouse eve.

⁹ Che aporandu nde remimbou rese; ndaporandui rumo ko ɨvɨ pɨpendar rese, che aporandu erembou va'e rese cheu, esepia a'e ndeundar ite yuvɨrekoi yepi.

¹⁰ Opakatu mba'e areko va'e ndeundar ite, mba'e erereko va'e cheundar avei; che porañetesa evokoiyase oyekwa ite yuvɨreko sese.”

¹¹ “Che ndaiko iri chira ko ɨvɨ pɨpe; a'e rumo yuvɨrekoveño itera ko ɨvɨ pɨpe, che evokoiyase asora nde pɨri. Che Ru ndaseko maräne'ɨ̇ va'e, esärö nde pirätäsa pɨpe nderer pɨpe sereko, akoi erembou cheu, oyese yuvɨrekoi tuprɨ agwä, inungar yande yaiko yepi.

¹² Che aikose ko ɨvɨ pɨpe ipɨri yuvɨreko, asärö tuprɨ nderer pirätäsa pɨpe, akoi erembou va'e cheu. Ndipoi ete ñepëi okañɨ tëi va'e, akoi yɨpɨve okañɨ va'eño ite rumo okañɨ tëi; yavɨye rane itera aipo e'i va'e Ikwachiaprɨ pɨpe.

¹³ “Kurïtëi asora nde rekosave; che rumo amombe'u mba'e aikove vɨte seve ko ɨvɨ pɨpe, a'e avei vɨreko va'erä vɨ'aretesa oyese inungar che areko va'e yepi.

¹⁴ Che ni'ä amombe'u nde ñe'ë yuvɨreko chupe, ko ɨvɨ pɨpendar rumo ndoyambotai yuvɨreko esepia a'e nda'ei ko ɨvɨ pɨpendar yuvɨrekoi, inungar avei che nda'ei aiko ko ɨvɨ pɨpendar.

¹⁵ Ndaporandui rumo ndeu erenose va'erä ko ɨvɨ pɨpe sui, che aipota eresäröra opakatu mba'e-mba'e tëi sui.

¹⁶ Inungar che nda'ei aiko ko ɨvɨ pendar, egwë e'i avei a'e nda'ei ko ɨvɨ pendar yuvɨrekoi.

¹⁷ Eseko moigätu tuprɨ ñe'ësa supiete va'e pɨpe sereko; nde ñe'ë ni'ä supi tuprɨ va'e ite yepi.

¹⁸ Inungar nde che mbou eve ko ɨvɨ pɨpendar pa'üve, egwë a'e avei che imondo ko ɨvɨ pɨpendar pa'üve yuvɨreko.

¹⁹ Sekokwer sui amondo che rekokwer ndeu narä, toyemondo katu yuvɨreko chupe ko ñe'ësa supi tuprɨ va'e reroya pɨpe viya.”

²⁰ “Ndaporandui ko che remimbo'e reseño ndeu, aporandu avei akoi che reroya va'erä rese osenduse ñe'ësa yuvɨreko ichui.

²¹ Aporandu ndeu ko opakatu rese yuvɨrekoi tuprɨ va'erä; inungar nde, che Ru, ereiko che rese iyavei che aiko nde rese, egwë tëi avei a'e yande rese yuvɨreko, iyavei vɨroya va'erä ko ɨvɨ pɨpendar nde che mbousa rese eve yuvɨreko.

²² Che amondo avei yuvɨreko chupe inungar erembou va'e teko porañetesa cheu, oyoya tuprɨ va'erä tekokwer, inungar yande yaiko va'e yepi:

²³ Che aiko yuvɨreko sese nde evokoiyase ereiko che rese, a'ese yuvɨrekoira tekovesa i'ɨ̇vi tuprɨ va'e pɨpe, iyavei ko ɨvɨ pɨpendar ipɨ'añemoñetara nde che mbouse eve, eresaɨsu avei yuvɨreko inungar che raɨsu eve yepi.”

²⁴ “Che Ru, nde ni'ä akoi erembou ko yuvɨrekoi va'e cheu, iyavei aipota a'e yuvɨrekoi che pɨri che rekosave, osepia va'erä che reko porañetesa yuvɨreko, teko porañetesa nde erembou va'e cheu; esepia nde ni'ä yɨpɨve ite che raɨsu eve ko ɨvɨ apoe'ɨ̇seve.

²⁵ Che Ru, seko katuprɨ va'e, yuvɨrekoi va'e ko ɨvɨ pɨpe nande kwai ete yuvɨreko; che rumo orokwa ite, iyavei yuvɨrekoi va'e che rupi oikwa avei nde che mbouse yuvɨreko.

²⁶ Che orokwa uka avei yuvɨreko chupe, iyavei orokwa uka vɨtera rumo, evokoiyase nde che raɨsusa tovɨreko avei yuvɨreko, che avei taiko yuvɨreko sese.”