San Juan 11 - Tüpä Ñe'ëngagwer

Lázaro mano agwer

¹ Oime ñepëi mbɨa imba'easɨ va'e serer Lázaro, tekwa Betania pendar, a'e María iyavei ikupɨ'ɨrɨ Marta rekwa yuvɨreko.

² Ko akoi María, Lázaro reindrɨgwer, a'e oipɨyere va'e mba'e sɨäkwä va'e yande Yar pɨ rese ipare omombiru o'a pɨpe.

³ A'e ñuvɨrïo oyekupɨ'ɨrɨ va'e omondo oñe'ë Jesús upe yuvɨreko:–Che Yar, nde mborɨpar, nde rembiaɨsu imba'easɨ ou.

⁴ Jesús osenduse, aipo e'i:–Ko mba'erasɨsa rumo nda'ei imano agwä ite, egwë e'i Tüpä reko porañetesa mboyekwa agwä, Tüpä Ta'ɨrɨ reko porañetesa mboyekwa agwä avei.

⁵ Yepe Jesús osaɨsu iteanga Marta, ikupɨ'ɨrɨ reseve iyavei Lázaro,

⁶ oyanduse rumo Lázaro mba'erasɨsa, opɨta vɨteño ite ñuvɨrïo arɨ gwekosave.

⁷ Ipare aipo e'i gwemimbo'e eta upe:–Yayevɨ irira ɨvɨ Judea ve.

⁸ Semimbo'e eta aipo e'i yuvɨreko chupe:–Porombo'esar, kwesemi tëi judío eta a'e ɨvɨ pendar nde yuka pota ita pɨpe yuvɨreko; ¿kurïtëi evokoiyase ereso pota iri a'eve?

⁹ Jesús aipo e'i gwemimbo'e eta upe:–¿Ndapeikwai vo arɨ osesape arɨ momba tuprɨ yepi? Supiete akoi ogwata va'e arɨ pɨpe, ndoyepɨapi ete, esepia ni'ä osepia tesapesa ko ɨvɨ pɨpendar;

¹⁰ akoi ogwata va'e pɨ̇tü pɨpe, oyepɨapiño itera, esepia ni'ä ipane tesapesa chupe.

¹¹ Ipare aipo e'i iri:–Yande mborɨpar Lázaro oke vɨte tëi, che rumo amoma'erä.

¹² Semimbo'e eta aipo e'i yuvɨreko chupe:–Che Yar, supiete a'e oke vɨtese ou, egwë e'ise evokoiyase a'e okwerañora.

¹³ Jesús aipo oyapave tëi aipo e'i Lázaro omano ite ou, semimbo'e eta evokoiyase ipɨ'añemoñeta oke tëi revo e'i yuvɨreko chupe viña.

¹⁴ Evokoiyase Jesús omombe'u tuprɨ ite:–Lázaro omano ite.

¹⁵ Iyavei avɨ'arete che ndaikoise a'eve, esepia egwë e'ise avɨye katura peü pe che reroya agwä. Evokoiyase yaso opakatu sepia.

¹⁶ Evokoiyase Tomás, serer va'e Gemelo, aipo e'i ambuae omboetasa upe:–Yaso avei yande, yamano va'erä supi.

Jesús, kwerayevɨsa iyavei tekovesa sekoi

¹⁷ Oyepotase oso, Jesús oyandu Lázaro ñotɨ̇ agwer irugätu arɨ opa pare.

¹⁸ Esepia Betania namombrɨi Jerusalén sui, a'e vɨreko i'amombrɨgwer mbosapɨ kilómetros tëi;

¹⁹ seta yuvɨraso judío Marta iyavei María pɨri, imbovɨ'a agwä ikɨvrɨ mano agwer sui.

²⁰ Oyanduse Marta Jesús yepota, osë voi ete sapeve; María rumo opɨtaño oɨ pɨpeve.

²¹ Evokoiyase Marta aipo e'i Jesús upe:–Che Yar, ereikose ko'ave, nomanoi chietera revo che kɨvrɨ viña.

²² Che rumo aikwa kurïtëi Tüpä omboura opakatu mba'e nde porandusa ndeu.

²³ Jesús omboyevɨ chupe:–Nde kɨvrɨ rumo okwerayevɨ irira.

²⁴ Marta aipo e'i chupe:–Supiete aikwa okwerayevɨra opase omano va'ekwer okwerayevɨ yuvɨreko arɨ ipa va'e pɨpe kuri.

²⁵ Evokoiyase Jesús aipo e'i chupe:–Che aiko kwerayevɨsa iyavei tekovesa. Akoi che reroya va'e, yepe omano tëira viña, oikove ñoitera rumo;

²⁶ iyavei akoi oikove vɨte va'e che reroyasar, a'e nomanoi chietera. ¿Ereroya vo aipo?

²⁷ A'e kuña aipo e'i chupe:–Supiete che Yar, che orovɨroya ite nde Poropɨsɨrösar ereikose, Tüpä Ra'ɨrɨ, a'e ou va'erä ko ɨvɨ pɨpe.

Jesús oyase'o Lázaro ruvɨpa rovai

²⁸ Aipo o'e pare, Marta oso okupɨ'ɨrɨ María reka, aipo e'i chupeñomi:–Porombo'esar sekoi ko'ave iyavei oñe'ë ndeu.

²⁹ Osendu voise iñe'ë, María oñarapü'a oso Jesús repia.

³⁰ Jesús rumo ndoike vɨtei ete tekwa pɨpe; a'e sekoi Marta rekosave ñoite.

³¹ Osepiase María iñarapü'ase iyavei ipoyavase ichëse yuvɨreko, judío eta sëtäve yuvɨrekoi va'e, imbovɨ'asar yuvɨraso voi sakɨkwerive ipɨ'a ñemoñeta okɨvrɨ ruvɨpave revo osora oyase'o e'i yuvɨreko chupe viña.

³² Evokoiyase María oyepotase Jesús rekosave oso chupe, oñenopɨ'ä oso sovai, aipo e'i:–Che Yar, e'i revo ereikoveñose ko'ave, che kɨvrɨ nomanoi chietera viña.

³³ Jesús, osepiase María yase'o iyavei judío eta yuvɨraso va'e supi, opɨ'a pɨpe oyandu ite ovɨ'are'ɨ̇sa,

³⁴ evokoiyase oporandu ava re'ɨi upe:–¿Ke vo oñotɨ̇ yuvɨreko?A'e aipo e'i yuvɨreko chupe:–Erio ko'ave ore Yar, teresepiaru.

³⁵ A'ese Jesús oyase'o.

³⁶ Judío eta evokoiyase aipo e'i yuvɨreko:–¡Esepia a'e sembiaɨsuai ete sekoi!

³⁷ Ambuae rumo ipa'ü pendar aipo e'i yuvɨreko:–Ko mbɨa akoi, omboesapɨso ava ndasesapɨsoi va'e, ¿ndoikatui chira pi'ä mba'e apo Lázaro upe imano e'ɨ̇ agwä viña?

Lázaro kwerayevɨ agwer

³⁸ Jesús, ndoyembovɨ'a iri katu, oyemboya oso suvɨpa rese. A'e ita yo'oprɨ save, a'e sokendɨpɨ sovapɨsa va'e ita pɨpe.

³⁹ Jesús aipo e'i:–Perokwa sovapɨsa ita ichui.Marta, omano va'e reindrɨ aipo e'i:–Che Yar, ine ite revo, esepia opa ni'ä irugätu arɨ imanore.

⁴⁰ Jesús omboyevɨ chupe:–¿Na mombe'ui vo akoi ndeu, ko ereroyase, eresepiara Tüpä porañetesa eiko?

⁴¹ Vɨrokwa ita yuvɨreko ichui, ipare Jesús oma'e ɨva rese aipo e'i:–Che Ru, avɨye ndeu esepia eresendu ite che ñe'ë.

⁴² Che aikwa ite eresenduse che ñe'ë yepi, che rumo añe'ë yepi ava rekokwer rese oime va'erä mba'e avɨye va'e ko'a pendar upe narä, vɨroya va'erä avei yuvɨreko nde che mbouse eve.

⁴³ Aipo o'e pare, oñe'ë pirätä aipo e'i:–¡Lázaro, ësë evokoi sui!

⁴⁴ Iyavei akoi omano va'ekwer osë, ñapɨ̇chisa tuprɨ va'e ipo iyavei ipɨ turukwar asɨaprɨ pɨpe iyavei oimama tuprɨ sova turukwar pɨpe yuvɨreko no. Jesús aipo e'i ava upe:–Peyorapa ñapɨ̇chisa ichui oikatu va'erä ogwata.

Yemomborandusa Jesús pɨsɨ agwä (Mt 26.1-5; Mc 14.1-2; Lc 22.1-2)

⁴⁵ Ko rese seta iteanga Jesús reroyasar yuvɨraso va'e judío María rupi osepia avei mba'e sembiapokwer yuvɨreko.

⁴⁶ Oime avei rumo aipo yuvɨraso va'e fariseo repia, iyavei omombe'u Jesús rembiapo agwer yuvɨreko chupe.

⁴⁷ Evokoiyase fariseo eta iyavei pa'i eta rerekwar opa omonu'ä yuvɨreko Mborandusa Ɨvate katu va'e save, aipo e'i yuvɨreko:–¿Marä ya'era vo sereko? Ko mbɨa seta ite oyapo poromondɨisa oiko.

⁴⁸ Ndayayapoise mba'e chupe, opakatu ite ava vɨroyara yuvɨreko, iyavei mborerekwa eta Roma ɨgwar yugwerura opara yande tüpäro omonduru yuvɨreko yande rekwa avei.

⁴⁹ Ñepëi rumo ipa'ü pendar, Caifás serer va'e, pa'i eta rerekwar ɨvate katu va'e sekoi a'e aravɨter pɨpe, aipo e'i ava upe:–Pe ndapeikwai ete mba'e,

⁵⁰ ndapesendukwai avei ko tekokwer; avɨye katura peü ñepëi mbɨa omanose yande rekwa repɨrä, nda'ei chietera okañɨ tëi opakatu tekwa ɨvɨ pɨpendar yuvɨreko.

⁵¹ Caifás nda'ei oyesui tëi aipo e'i, esepia a'ese sekoi pa'i eta rerekwar ɨvate va'e, a'e aravɨter pɨpe aipo e'i imombe'u Jesús omanora kuri judío rekwa repɨrä oiko;

⁵² iyavei nda'ei chira ko tekwa ɨvɨ rese gweraño, omonu'ära opakatu Tüpä Ra'ɨrɨ oñemosaï tëi va'e.

⁵³ Egwë e'i a'e arɨ pɨpeve judío eta rerekwar oyemoigätupa Jesús yuka agwä yuvɨreko.

⁵⁴ Sese Jesús ndogwata iri ava judío pa'ü rupi, a'e rumo osë ɨvɨ Judea sui oso ɨvɨ iporupɨre'ɨ̇ va'e rerovɨkave, a'e ñepëi tekwa serer va'e Efraín. A'eve opɨta gwemimbo'e eta rese.

⁵⁵ Vɨrovɨse movɨrö arɨ tëi judío pieta apo agwä Pascua resendar, iyavei seta iteanga ava ambuae tekwa rupindar yuvɨraso tekwa Jerusalén ve oyeekokwer moatɨrö agwä a'e omboetei Pascua pieta renondeve yuvɨreko yepi.

⁵⁶ Oseka tëi Jesús, iyavei oporandu-randu tüpäro pɨpe oyeupe yuvɨreko:–¿Marä e'i pepɨ'a pɨpe? ¿Oura pi'ä pieta repia, anichira tie?

⁵⁷ Fariseo eta iyavei pa'i eta rerekwar oporokwai yuvɨreko akoi osepia va'e Jesús rekosa pe mombe'ura oreu, oroikatu va'erä ipɨsɨ.