San Juan 10 - Tüpä Ñe'ëngagwer

Jesús iyavei ava semiarö ovesa nungar

¹ Evokoiyase Jesús aipo e'i: “Supiete aipo a'e akoi ava kokotɨ rupi tëi oike va'e ovesa rëtä pɨpe, a'e imondarai va'e tëi iporombopa serai va'e aveino.

² Akoi oike va'e rumo okendɨpɨ rupi a'e ovesa rärösar sekoi.

³ Okendɨpɨ rärösar avei omboi okenda chupe, iyavei särösar oñe'ë ovesa upe serer rupi, iyavei ovesa oikwa ite iñe'ë rese yuvɨreko; ichui vɨnosepa sëtä pɨpe sui,

⁴ akoi yuvɨnosepase opakatu, a'e ogwata senonde, iyavei ovesa re'ɨi yuvɨraso sakɨkwerive esepia oikwa ite iñe'ë rese yuvɨreko.

⁵ Esepia ndoikwai va'e rupi ndogwatai ete yuvɨreko, opaño yuvɨroñemi ichui, esepia ni'ä ndoikwai ete iñe'ë rese yuvɨreko.”

⁶ Jesús omondo ko mba'e mboyoyasa, a'e rumo ndosendukwai ete yuvɨreko.

Jesús, ava rärösar avɨye va'e

⁷ Jesús aipo e'i iri: “Supiete ko rese aipo a'e: Che aiko okendɨpɨ supi yuvɨroike va'e ovesa yepi.

⁸ Opakatu yugweru va'e che renonde, a'e imondarai va'e iporombopaserai va'e avei; ovesa rumo ndovɨroyai ete yuvɨreko.

⁹ Che ite ni'ä aiko okenda: akoi oike va'e che rupi, a'e oñepɨsɨröra. Iyavei inungar akoi ovesa oike ichui osë oyosɨ kapi'i o'u va'erä yepi.”

¹⁰ “Imondarai va'e ou mba'e ñomi tëi, oporoyuka agwä iyavei mba'e mokañɨ tëi agwä; che rumo ayu pereko va'erä tekovesa, iyavei pereko va'erä perekove pɨpe mba'e tuvicha va'e.

¹¹ Che aiko ava rärösar avɨye va'e ite. Ava rärösar rumo avɨye va'e omondo ite gwekokwer ovesa repɨrä;

¹² akoi gwarepochi repɨrä tëi oporavɨkɨ va'e, osepiase ma'embiar oñaröai va'e oseyapaño ovesa oñemi oso, esepia nda'ei ete a'e ovesa rärösar sekoi esepia ovesa nda'ei ete seimba. Ipare ma'embiar oñaröai va'e omondɨ-mondɨi ete ovesa opakatu rupi-rupi tëi.

¹³ Evokoi mbɨa oñemiño, esepia a'e oporavɨkɨ gwarepochi repɨrä tëi, iyavei ndosaɨsui ete ovesa.”

^14-15 “Che ava rärösar avɨye va'e aiko. Inungar che Ru chekwa ite oiko che avei aikwa che Ru, egwë a'e avei che aikwa che reimba ovesa eta, a'e avei chekwa yuvɨreko. Che amondo che rekokwer sepɨrä yuvɨreko.

¹⁶ Areko avei ambuae che reimba nda'ei va'e ko ovesa rëtä pɨpendar; iyavei a'e arura che mboyeroyara yuvɨreko, ichui ñepëi reseve gwasu yuvɨrekoira, ñepëi gwarösar reseve.”

¹⁷ “Che Ru ni'ä che raɨsu ite esepia che amondo itera che rekokwer manosave aipɨsɨ iri va'erä kuri che kwerayevɨre.

¹⁸ Ndipoi chietera cheyuka va'erä yuvɨreko, che teiete rumo amondora che rekokwer che remimbotar rupi. Che areko ite pirätäsa imondo agwä, che kwerayevɨ iri agwä avei. Supiete areko che amondo va'erä iyavei ayevɨ'irira ipɨsɨ. Ko rese ni'ä che Ru che kwai che mbou.”

¹⁹ Osenduse judío eta aipo nungar ñe'ësa, opa ipɨ'añemoñeta yoavɨratɨ yuvɨreko.

²⁰ Seta iteanga ipa'ü pendar aipo e'i va'e:–¿Ma'erä vo pemboyeroya, esepia vɨreko ite karugwar oyese iyavei ndayarakwai ete oiko?

²¹ Ambuae rumo aipo e'i yuvɨreko:–Ndipoi ete karugwar rerekosar aipo e'i va'e oñe'ë. ¿Oikatura pi'ä karugwar ava ndasesapɨsoi va'e mboesapɨso?

Judío eta ndoyambotai Jesús yuvɨreko

²² So'ɨ̇sa pɨpe aipo, iyavei Jerusalén ve omboetei pieta tüpäro rovasa agwer yuvɨreko.

²³ Jesús sekoi tüpäro pɨpe, ichui ogwata oiko Oɨ Salomón oyapo va'ekwer rokupe ɨvɨi rupi.

²⁴ Evokoiyase judío eta oyere tuprɨ sese aipo e'i oporandu yuvɨreko chupe:–¿Maräse rutei vo eremombe'ura mba'e supi tuprɨ va'e oreu? Supiete ereikose Poropɨsɨrösar, emombe'u ñepëi reseve oreu.

²⁵ Jesús rumo omboyevɨ chupe:–Amombe'u ni'ä akoi peü, iyavei ndache reroyai ete peye. Che ayapo va'e mba'e che Ru mborerekwasa pɨpe, a'e ipɨpe sui chekwa uka ite opakatu upe;

²⁶ pe rumo ndape royai ete, esepia pe nda'ei ete che ovesa peiko.

²⁷ Che ovesa rumo oikwa ite che ñe'ë, che avei aikwa a'e evokoiyase ogwata yuvɨreko che rupi.

²⁸ Che amondo avei tekovesa apɨre'ɨ̇, ipɨpe sui ndipoi chietera okañɨi va'e iyavei ndipoi chira serokwasar yuvɨreko che sui.

²⁹ Esepia che Ru ombou va'e mba'e cheu a'e tuvicha katu opakatu mba'e sui, iyavei ndipoi chietera oikatu va'e serokwa agwä ichui.

³⁰ Che Ru iyavei che oroiko ñepëiño ite.

³¹ Judío eta osupipa iri ita yapi-yapi agwä yuvɨreko,

³² Jesús rumo aipo e'i chupe:–Che Ru pirätäsa pɨpe seta ite mba'e ayapo avɨye va'e pe rovake; ¿Uma che rembiapo sui vo che api-api pota ita pɨpe peye?

³³ Judío eta omboyevɨ yuvɨreko chupe:–Nande api-apisai chira ni'ä ita pɨpe mba'e nde rembiapo avɨye va'e rese, esepia nde ereñe'ë rai tëi Tüpä rese. Nde rumo ereiko ava nungar tëi, iyavei nde ereyeapo inungar Tüpä nde ae eiko.

³⁴ Jesús aipo e'i a'e ava upe:–Peündar mborokwaita ikwachiaprɨ pɨpe aipo e'i: ‘Che aipo a'e peü pe tüpä päve ite peiko.’

³⁵ Yande yaikwa ite Ikwachiaprɨ pɨpe aipo e'i va'e, ndiyai ete ani ya'e, esepia Tüpä aipo e'i pe tüpä päve ite peiko e'i evokoi ava oñe'ë mombe'usar upe.

³⁶ Iyavei Tüpä ni'ä che reropove'ë che mbou ko ɨvɨ pɨpe, ¿ma'erä vo evokoiyase nde ereñe'ë rai tëi peye cheu esepia ni'ä Tüpä Ra'ɨrɨ aiko a'ese tëi?

³⁷ Supiete che akoi ndayapoise mba'e che Ru remimbotar rupi, a'ese ndache reroyai chietera peye viña.

³⁸ Akoi ayapose mba'e, yepe ndache reroyai chira peye viña, peroya katu mba'e ayapo va'e, peikwa va'erä ñepëi reseve opakatu mba'e esepia che Ru sekoi ete che rese yepi che avei aiko che Ru rese.

³⁹ Osokenda pota iri yuvɨreko viña, Jesús rumo oñemiño ipa'ü sui.

⁴⁰ Oyevɨ iri oso Jesús ɨai Jordán rovai, ipare opɨtaño a'eve, supi Juan yɨpɨndar oporoapirämo oiko.

⁴¹ Ava re'ɨi yuvɨraso sepia, aipo e'i yuvɨreko:–Yepe, Juan ndoyapoi ete mba'e poromondɨisa viña, opakatu mba'e omombe'u va'e rumo ko mbɨa resendar supi va'e ite.

⁴² Iyavei seta iteanga vɨroya va'e Jesús yuvɨreko a'eve.