San Juan 1 - Tüpä Ñe'ëngagwer

Tüpä ra'ɨrɨ ou ko ɨvɨ pɨpe. Oyekwa uka aveino

¹ Yɨpɨndar aipo oime ite Ñe'ësa; iyavei a'e Ñe'ësa sekoi Tüpä rese a'e rumo Tüpä ite.

² A'e sekoi yɨpɨndar Tüpä rese ite.

³ Supi avei, Tüpä opakatu mba'e oyapo oime va'e; ndipoi ete mba'e yapoprɨ ipore'ɨ̇.

⁴ A'e ni'ä vɨreko tekovesa apɨre'ɨ̇ va'e oyese, iyavei a'e tekovesa tesapesa nungar sekoi opakatu ava upe.

⁵ Ko tesapesa osesape va'e pɨ̇tümimbi, iyavei pɨ̇tümimbi ndoikatui ete imbogwe agwä.

⁶ Oime ñepëi mbɨa Tüpä remimbou Juan serer va'e,

⁷ a'e rumo ou ko tesapesa kwa uka agwä, iyavei tovɨroya opakatu ava yuvɨreko o'esave.

⁸ Juan rumo nda'ei ete tesapesa; a'e imbouprɨ sekoi omombe'u va'erä tesapesa resendar.

⁹ Ko tesapesa supiete va'e osesape opakatu ava a'e ni'ä ou ko ɨvɨ pɨpe.

¹⁰ Akoi Ñe'ësa sekoi va'e ko ɨvɨ pɨpe; yepe Tüpä oyapo ɨvɨ ichui viña, ɨvɨ pɨpendar rumo ndoikwai ete sekoise yuvɨreko.

¹¹ Supiete ou gwekwave, sekwa pendar rumo ndoipɨsɨi yuvɨreko.

¹² Opakatu rumo akoi oipɨsɨ va'e seroyasave, a'e chupe omondo ñekuñarösa Tüpä Ra'ɨrɨ seko agwä yuvɨreko.

¹³ A'e Tüpä ra'ɨrɨ ite yuvɨrekoi, nda'ei rumo ava yesusa pɨpe oyesu, esepia ni'ä Tüpä ite ombo'u Gwa'ɨrɨgwä.

¹⁴ A'e akoi Ñe'ësa oyeapo ava iyavei oikove yande pa'üve. Iyavei sepiasa ite seko porañetesa, a'e porañetesa oipɨsɨ va'e Vu sui Ta'ɨrɨ ñepëi va'e gweko pɨpe, iporoaɨsusa supi va'e ite.

¹⁵ Juan ni'ä oñe'ë sese ava upe aipo e'i: “Ko uve ni'ä akoi aipo a'e peü kwese akoi ou va'erä che rakɨkwei a'e ɨvate katu va'e che sui, esepia yɨpɨve ite sekoi che yesue'ɨ̇ vɨteseve.”

¹⁶ Iporovasasa sui opakatu ite ipɨsɨsa ñepëi mba'e ndopai va'e tekokwer upe ambuae sui yepi,

¹⁷ esepia mborokwaita yaipɨsɨ ou va'e Moisés sui yepi; poroaɨsusa rumo iyavei mba'e supiete va'e, a'e yavɨye ite Jesucristo rupi.

¹⁸ Ndipoi ete ava osepia va'e Tüpä; Ta'ɨrɨ ñepëi va'eño ite, a'e Tüpä iyavei sekoi va'e Vu pɨri, a'e ni'ä oikwa uka yandeu.

Juan Oporoapirämo va'e oñe'ë Jesucristo rekokwer rese (Mt 3.11-12; Mc 1.7-8; Lc 3.15-17)

¹⁹ Ko ñe'ësa omombe'u va'e Juan, a'ese mborerekwar judío rekwa pendar oyokwai Jerusalén sui imondo pa'i eta iyavei levitas imboporandu agwä Juan upe ava pi'ä a'e sekoi oyapave.

²⁰ A'e rumo oyemombe'u ite aipo e'i:–Che nda'ei ete Poropɨsɨrösar aiko.

²¹ Evokoiyase oporandu iri yuvɨreko chupe:–¿Ava ite vo nde? ¿Nde tie Tüpä ñe'ë mombe'usar Elías ereiko?Juan aipo e'i:–Nda'ei ete che a'e aiko.A'e rumo oporandu iri yuvɨreko:–Evokoiyase, ¿Nde ite vo ereiko Tüpä ñe'ë mombe'usar ou va'erä?A'e omboyevɨ:–Ani nda'ei ete che.

²² Aipo e'i yuvɨreko chupe:–¿Uma ite vo evokoiyase nde ereiko? Esepia ore orovɨrasora mba'e imombe'uprɨ supi va'e ite ore mbousar upe. ¿Mba'e ite vo eremombe'ura ndeyesuindar oreu?

²³ Juan omboyevɨ aipo e'i chupe:–Che aiko oñe'ë va'e ɨvɨ iporupɨre'ɨ̇sa rupi: ‘Pemoigätu pe rekokwer yande Yar yepotase narä’, inungar aipo e'i imombe'u Tüpä ñe'ë mombe'usar Isaías.

²⁴ Akoi oyokwai va'e fariseo oñe'ë va'erä Juan rese yuvɨreko,

²⁵ oporandu yuvɨreko chupe:–Evokoiyase nda'ei ni'ä aipo nde Poropɨsɨrösar ereiko, nda'ei avei Elías nda'ei avei Tüpä ñe'ë mombe'usar, ¿ma'erä ru evokoiyase ereporoapirämo?

²⁶ Juan omboyevɨ chupe:–Che aporoapirämo ɨ pɨpe; oime rumo mbɨa pe pa'üve ndapeikwai va'e

²⁷ a'e akoi ou va'erä che rakɨkwei. Cheu ndiyai ete ipɨtakisä yora agwä ichui.

²⁸ Ko opakatu mba'e yaposa tekwa Betania ve, ɨai Jordán rovai, a'eve akoi Juan Oporoapirämo va'e sekoi.

Jesús, inungar Ovesa Tüpä suindar

²⁹ A'ere arayi'ive Juan osepia Jesús, oyemboyase oso sese, aipo e'i chupe: “¡Pesepia, ko Tüpä remimbou Ovesa nungar, opakatu ava angaipa mokañɨ agwä!

³⁰ A'e sese akoi añe'ë aipo a'ese: ‘Che rakɨkwei oura mbɨa ɨvate katu va'e che sui, esepia yɨpɨve ite sekoi va'e che sui.’

³¹ Che yɨpɨndar ndaikwai avei uma a'e sekoi; sese ni'ä aporoäpiramo ɨ pɨpe vichiko imboyekwa agwä tekwa Israel pendar upe.”

³² Juan omombe'u avei: “Che asepia Espíritu Maräne'ɨ̇ ogweyɨse ɨva sui inungar apɨkasu, opɨta tuprɨ i'arɨve.

³³ Che yɨpɨndar ndaikwai ete uma a'e sekoi; akoi che mbousar rumo aporapirämo va'erä ɨ pɨpe, aipo e'i cheu: ‘Akoi eresepiase Espíritu Maräne'ɨ̇ ogweyɨse opɨtase mbɨa arɨve, a'e mbɨa Oporoapirämora Espíritu Maräne'ɨ̇ pɨpe.’

³⁴ Che ni'ä asepia ite, aikwa avei Tüpä Ra'ɨrɨ sekoise.”

Yɨpɨndar yuvɨrekoi va'e Jesús remimbo'e

³⁵ A'ere arayi'ive avei, Juan sekoi a'eve ñuvɨrïo gwemimbo'e rese.

³⁶ Jesús oñokwase, Juan osepia aipo e'i chupe:–¡Pesepia, evokoi inungar Ovesa Tüpä remimbou seropove'ëpɨra!

³⁷ Ñuvɨrïo yuvɨrekoi va'e Juan rupindar a'e osenduse aipo ko ñe'ësa, ichui yuvɨraso voi ete Jesús rupi.

³⁸ Evokoiyase Jesús oma'e gwakɨkwei kotɨ, osepiase rumo gwakɨkwerindar yugweruse aipo e'i oporandu chupe:–¿Mba'e vo peseka peiko?A'e aipo e'i yuvɨreko:–Porombo'esar, ¿kevo nde rekosa?

³⁹ Jesús omboyevɨ chupe:–Perio tapesepia ru.Ipare yuvɨraso osepia sekosa yuvɨreko, iyavei yuvɨrekoi a'eve arɨ momba tuprɨ supive, esepia ni'ä a'ese ka'aru ite.

⁴⁰ Ñuvɨrïo ipa'ü pendar osendu Juan ñe'ë yuvɨreko a'e yuvɨraso Jesús rupi, a'e Andrés, Simón Pedro rɨvrɨ.

⁴¹ A'e Andrés rane aipo oseka vɨke'ɨrɨ Simón, aipo e'i chupe:–Orosepia ite Poropɨsɨrösar (a'e Cristo: oyapave aipo e'i).

⁴² Ipare Andrés vɨraso Simón Jesús rekosave; osepiase rumo Jesús, aipo e'i chupe:–Nde Simón, Juan ra'ɨrɨ, nderer gwarä rumo Cefas (a'e Pedro: oyapave).

Jesús oñe'ë Felipe upe, Natanael upe avei

⁴³ A'ere arayi'ive voi Jesús ipɨ'añemoñeta oso agwä ɨvɨ Galilea rupi. A'eve osepia Felipe, aipo e'i chupe:–Erio che rupi.

⁴⁴ Ko Felipe sekoi va'e tekwa Betsaida pendar, a'e pendar Andrés iyavei Pedro.

⁴⁵ Ipare Felipe oso Natanael reka, aipo e'i chupe:–Orosepia Poropɨsɨrösar, sesendar akoi Moisés oikwachia kwachiar porokwaita resendar pɨpe araka'e, oikwachia avei sesendar Tüpä ñe'ë mombe'usar yuvɨrekoi va'e. A'e Jesús, José ra'ɨrɨ, tekwa Nazaret pendar.

⁴⁶ Natanael aipo e'i:–¿Oime pi'ä Nazaret sui osë va'erä mba'e avɨye va'e?Felipe omboyevɨ chupe:–Erio teresepia ru.

⁴⁷ Osepiase Jesús oyemboyase Natanael sese, aipo e'i:–Ko mbɨa sekoi Israel ɨgwar ite, ndoporombopai va'e.

⁴⁸ Natanael oporandu chupe:–¿Marä ere vo chekwa eve?Jesús omboyevɨ chupe:–Che oroepia yɨpɨve Felipe nde reka renondeve, ɨvɨra higuera vrɨve ereikose.

⁴⁹ Natanael aipo e'i chupe:–Porombo'esar, ¡nde ni'ä Tüpä Ra'ɨrɨ ereiko, nde avei ereiko Mborerekwar ɨvate katu va'e Israel pendar!

⁵⁰ Jesús omboyevɨ chupe:–¿Che reroya ite eve esepia oroepia ɨvɨra higuera vrɨve a'ese ndeu? Eresepiara rumo ko mba'e sui avɨye katu va'e.

⁵¹ Iyavei aipo e'i Jesús:–Supiete pesepiara ɨva oyemboi tuprɨse, iyavei mbigwai ɨva pendar Tüpä suindar eta igweyɨse che ava ɨvate katu va'e Ra'ɨrɨ arɨve iyevɨse avei ɨvave kuri.