Apocalipsis 9 - Tüpä Ñe'ëngagwer

Imbopoyandeposa mimbɨ

¹ Mbigwai ɨva pendar imbopoyandeposa omoñe'ëse gwemimbɨ, a'ese asepia yasɨtata ovɨapi va'e ɨva sui ou ɨvɨve; ipare chupe imondosa ɨvɨkwar pɨkuku pɨ̇tümimbi va'e mboisa.

² Ipare omboise ɨvɨkwar rovapɨsa, ichui opü'a tatächi, inungar akoi tata gwasu pɨpe sui osë va'e, evokoiyase evokoi tatächi ndosesape uka iri arɨ upe, nipore'ɨ̇ iri ete mba'e.

³ Iyavei evokoi tatächi sui opa yuvɨnosë tukru gwasu re'ɨi oñemosaï opakatu ɨvɨ rupi; chupe avei imondosa seko pirätä agwä inungar akoi mba'e rumbɨkɨäpe.

⁴ Ipare yokwaisa ɨvɨ pɨpendar kapi'i momarä e'ɨ̇ agwä, opakatu mba'e rokrɨ ɨvɨra avei, imomaräsara rumo akoi ava ndovɨrekoi va'e Tüpä rer osɨva rese.

⁵ Nimondosai rumo mborokwaita chupe ava yuka agwä, egwë e'i imondosa mba'e tasɨ va'e ipɨ'a ñemoñeta agwä poyandepo yasɨ rupi tëi; inungar tuprɨ akoi mba'e rumbɨkɨäpe rasɨkwer.

⁶ Evokoi arɨ rupi ava oipota tëira omano agwä viña, ndoikatui chira rumo; omano pota tëira manosa rumo ndipovɨtei chira yuvɨreko chupe.

⁷ Tukru gwasu re'ɨi inungar kavayu imoigätuprɨ vavasave narä; oakä rese evokoiyase vɨreko ndoyavɨi yegwaka oro apoprɨ, iyavei sova avɨye tuprɨ ite ava repiaka.

⁸ I'a ndoyavɨi kuña a, säi evokoiyase ndoyavɨi tuprɨ yagwa pɨ̇ta räi.

⁹ Setekwer evokoiyase oyopɨ tuprɨ gwarepochi apoprɨ, iyavei ipepo rɨapugwer avɨye tuprɨ ite akoi karëto rɨapugwer kavayu vɨnoña va'e vavasave.

¹⁰ Vɨreko vugwai rese opopiar avɨye mba'e rumbɨkɨäpe popiar, a'e ni'ä vɨreko opirätäsa poyandepo yasɨ rupi ava momarä agwä tëi.

¹¹ Evokoi tukru gwasu rerekwar, a'e mbigwai ɨva pendar naporäi va'e ikwaiprɨ ɨvɨkwar ipɨkuku va'e mboi agwä, a'e serer hebreo ñe'ë pɨpe Abadón; griego ñe'ë pɨpe evokoiyase Apolión e'i.

¹² Opa yɨpɨndar va'e mba'e-mba'e tëi; oime vɨte rumo ñuvɨrïo ou iri va'erä.

Imoñepëi ovasa mimbɨ

¹³ Imoñepëi ovasa mbigwai ɨva pendar omoñe'ë gwemimbɨ, a'ese asendu ñe'ësa itaɨsɨ rapɨsa renda oro apoprɨ Tüpä rovaindar irugätu sächi va'e pa'ü sui.

¹⁴ A'e aipo e'i ñe'ësa evokoi imoñepëi ovasa mbigwai ɨva pendar mimbɨ rerekosar upe: “Eyorapa evokoi irugätu mbigwai ɨva pendar ñapɨ̇chimbrɨ ɨai gwasu Éufrates ɨvɨrindar.”

¹⁵ Evokoiyase opa yorasa irugätu mbigwai ɨva pendar naporäi va'e, ava mombosapɨsa ya'okwer yuka agwä yuvɨreko, esepia evokoi imoigätuprɨ ite a'e arɨ, yasɨ iyavei aravɨter rupi tuprɨ narä yuvɨreko.

¹⁶ Ipare asendu sundao re'ɨi kavayu arɨve yuvɨrekoi va'e: a'e setakwer doscientos millones tuprɨ.

¹⁷ Egwë e'i asepia kavayu re'ɨi che ker pɨpe, i'arɨ pendar evokoiyase vɨreko opochi'a rupi tuprɨ oyoepɨsa gwarepochi apoprɨ yuvɨreko, a'e iparagwer pirä va'e tata nungar, sovɨ va'e, iyu va'e aveino. Kavayu re'ɨi akä evokoiyase avɨye tuprɨ yagwa pɨ̇ta akä, iyuru sui evokoiyase yuvɨnose-nose tata, tatächi iyavei azufre.

¹⁸ Iyavei ava mombosapɨsa ya'okwer opa tuprɨ omano ko mbosapɨ mba'e-mba'e tëi pɨpe yuvɨreko, a'e osë va'e kavayu yuru rupi sui: tata, tatächi iyavei azufre.

¹⁹ Esepia ni'ä kavayu pirätäsa iyuru rese chini, sugwai rese aveino; a'e sugwai ndoyavɨi tuprɨ ite mboi akä, ipɨpe avei ava omomarä.

²⁰ Ava rumbɨrer rumo nomanopa vɨtei va'e ko mba'e tëi sui yuvɨreko, nosekuñaröi ete gwekokwerai yuvɨreko, ndopoi potai ete karugwar mboetei aisa sui, iyavei opakatu mba'e ra'anga tëi oro apoprɨ, gwarepochi, bronce, ita, anise ɨvɨra apoprɨ mboeteisa sui avei yuvɨreko, evokoi mba'e apoprɨ rumo ndosarekoi va'e, ndosendui va'e ite mba'e, ndogwatai va'e avei.

²¹ Iyavei noñekuñarö potai ete oporapichisa sui yuvɨreko, opaye aisa sui, kuña, kuimba'e ambuae rese angaipa aposa sui, omonda raisa sui avei.