Apocalipsis 8 - Tüpä Ñe'ëngagwer

Imoñuvɨrïo ova sello resendar

¹ Ipare Ovesami a'e Cristo sekoi va'e omondorose imoñuvɨrïo ova sello kwachiar mboyasa ichui, a'ese sɨ̇u tuprɨ ɨvave a'e arɨ pɨpe.

Yɨpɨndar keraisa yemoigätusa resendar

² Ichui asepia ñuvɨrïo ova tuprɨ mbigwai ɨva pendar yuvɨno'äi va'e Tüpä rovai, chupe opa imondosa ñuvɨrïo ova tuprɨ mimbɨ.

³ Ipare ou ambuae mbigwai ɨva pendar oro itaɨsɨ rapɨsa reseve, iyavei ou o'ä itaɨsɨ rapɨsa renda rovai; ipare imondosa tuvicha itaɨsɨ chupe oikwave'ë va'erä oyoya tuprɨ opakatu ava Tüpä upendar yeruresa rese oro mba'e reropove'ëprɨ renda arɨve; a'e Tüpä renda rovai chini va'e.

⁴ Itaɨsɨ rätächi evokoiyase oso mbigwai ɨva pendar po sui Tüpä rovai, oyoya tuprɨ tekwa maräne'ɨ̇sa yeruresa rese.

⁵ Evokoiyase mbigwai ɨva pendar opoko itaɨsɨ rapɨsa rese, omboapɨpo mba'e reropove'ëprɨ renda pendar tatäpɨi pɨpe, ipare opa omombo ɨvɨ arɨ rupi; a'eseve voi osunu va'e opororo-roro, overa-vera iyavei ɨvɨ orɨrɨi.

⁶ Evokoiyase ñuvɨrïo ova mbigwai ɨva pendar vɨreko va'e ñuvɨrïo ova gwemimbɨ oyemoigätu voi yuvɨreko imoñe'ë agwä.

Imoirugätusa mimbɨ yɨpɨndar va'e

⁷ Yɨpɨndar va'e mbigwai ɨva pendar omoñe'ë gwemimbɨ, a'ese imombosa ɨvɨ arɨ rupi amanda iyavei tata oyese'a va'e tuvɨ rese. Ipare opa okai ɨvɨ mombosapɨsa ya'okwer, oyoya tuprɨ ɨvɨra mombosapɨsa ya'okwer rese iyavei kapi'i reseve avei opa yuvɨrokai.

⁸ Imoñuvɨrïosa mbigwai ɨva pendar omoñe'ë gwemimbɨ. A'ese imombosa paragwasu pɨpe inungar tuprɨ akoi ɨvɨtrɨ sendɨ va'e tata pɨpe; ipare paragwasu mombosapɨsa ya'okwer oyeapo tuvɨ.

⁹ Iyavei paragwasu mombosapɨsa ya'okwer pɨpendar ava omano yuvɨreko. Ipare ɨarusu mombosapɨsa ya'okwer pɨpendar opa tuprɨ avei imokañɨsa.

¹⁰ Ipare imombosapɨsa mbigwai ɨva pendar omoñe'ë gwemimbɨ, a'ese yasɨtata tuvicha va'e ovɨapi ɨva sui ou, sendɨ gwasu inungar akoi ɨvɨra rese tata sendɨ gwasu va'e, a'e ovɨapi ɨai mombosapɨsa ya'okwer pɨpe iyavei ɨvɨ sui ɨ o'ë va'e mombosapɨsa ya'okwer pɨpe aveino.

¹¹ Yasɨtata rer evokoiyase Irova'e; ipare ɨ mombosapɨsa ya'okwer iro iteanga. Evokoi ɨ pɨpe seta ava omano yuvɨreko.

¹² Imoirugätusa mbigwai ɨva pendar omoñe'ë gwemimbɨ, ipare arɨ mombosapɨsa ya'okwer imegwä, yasɨ mombosapɨsa ya'okwer, yasɨtata mombosapɨsa ya'okwer aveino. Ichui imombosapɨsa ya'okwer ndosesape iri yuvɨreko arɨ mombosapɨsa ya'okwer pɨpe, pɨ̇tü mombosapɨsa ya'okwer pɨpe aveino.

¹³ Ipare asepia, asendu avei vɨra gwasu ovevese ɨva mbɨter rupi, aipo e'i oñe'ë pirätä: “¡Too, too, too iparaɨsu katura moko ava yuvɨrekove vɨte va'e ɨvɨ pɨpe, akoi omoñe'ëse ambuae imombosapɨsa mbigwai ɨva pendar gwemimbɨ yuvɨreko!”