Apocalipsis 7 - Tüpä Ñe'ëngagwer

Israel suindar iporavoprɨ yuvɨrekoi va'e

¹ Ipare asepia irugätu tuprɨ mbigwai ɨva pendar yuvɨno'äi va'e iro'ɨ kotɨ, norte kotɨ, arɨ sësa kotɨ, ka'aru kotɨ aveino omombɨtu'u tuprɨ va'e irugätu ɨvɨtu yuvɨrekoi va'e ɨvɨ arɨ rupi ipeyu e'ɨ̇ agwä, paragwasu pɨpe angara viña, ñepëi yepe ɨvɨra ro angara viña no.

² Ipare asepia avei ambuae mbigwai ɨva pendar ou va'e arɨ sësa kotɨ sui, a'e vɨreko oyese Tüpä oikove va'e rer mondosa. Ko mbigwai ɨva pendar oñe'ë pirätä ambuae irugätu tuprɨ mbigwai ɨva pendar yuvɨrekoi va'e upe, oipɨsɨ va'e pirätäsa ɨvɨ, paragwasu momarä agwä yuvɨreko:

³ “¡Ndapemomarä vɨtei chira rumo ɨvɨ, paragwasu, ɨvɨra aveino, ndayamondo vɨteiseve isɨva rese yande Yar Tüpä rer ikwachiaprɨ!”

⁴ Ipare asendu Tüpä rer oipɨsɨ va'e retakwer: ciento cuarenta y cuatro mil tuprɨ, opakatu iporavoprɨ yuvɨrekoi Israel suindar.

⁵ Doce mil tuprɨ yuvɨrekoi iporavoprɨ Judá suindar, doce mil tuprɨ Rubén suindar, doce mil tuprɨ Gad suindar,

⁶ doce mil tuprɨ Aser suindar, doce mil tuprɨ Neftalí suindar, doce mil tuprɨ Manasés suindar,

⁷ doce mil tuprɨ Simeón suindar, doce mil tuprɨ Leví suindar, doce mil tuprɨ Isacar suindar,

⁸ doce mil tuprɨ Zabulón suindar, doce mil tuprɨ José suindar, ipa evokoiyase doce mil tuprɨ Benjamín suindar.

Ava re'ɨi iturukwar morochi va'e

⁹ Ipare asepia seta iteanga ava, opakatu ɨvɨ rupindar, ambuae-ae tëi va'e, ambuae-ae tëi va'e iñe'ë yuvɨreko sekwa ambuae va'e aveino. A'e opü'apa va'e Tüpä rovai porañete va'e Ovesami a'e Cristo sekoi va'e rovai avei yuvɨreko, a'e ndayaikatui ete ipapapa agwä. Esepia seta eteprɨ iyavei iturukwar morochi va'e päve; pindo-pindomi vɨreko opove yuvɨreko.

¹⁰ Ipare opakatu gwasu oñe'ë pirätä yuvɨreko aipo e'i:“¡Poropɨsɨrösa yande Ru Tüpä suindar,a'e ogwapɨ va'e öi gwendave porañete va'esave,Ovesami a'e Cristo sekoi va'e suindar aveino!”

¹¹ Iyavei opakatu mbigwai ɨva pendar yuvɨrekoi va'e oyere tuprɨ Tüpä renda porañete va'e rese, ikwaiprɨ rese avei yuvɨno'ä irugätu yuvɨrekove va'e rese avei; a'ese oyeaɨvɨ omboya osɨva ɨvɨ rese tenda porañete va'e rovai Tüpä mboeteisave yuvɨreko

¹² aipo e'i:“¡Amén!Poromboeteisa, vɨ'aretesamba'ekwasa, avɨye ndeu esa,poromboyeroyasa, mborerekwasa, teko pirätäsa aveitimondosa yande Ru Tüpä upe apɨre'ɨ̇ va'erä ite yepi.¡Amén!”

¹³ Evokoiyase ñepëi ikwaiprɨ ipa'ü pendar oporandu cheu: “¿Uma vo ko ava re'ɨi iturukwar morochi va'e päve yuvɨrekoi, kesui pi'ä yugweru?”

¹⁴ “Nde rumo ereikwa” a'e imboyevɨ chupe. A'e evokoiyase aipo e'i cheu: “Ko akoi yuvɨnosë tuprɨ va'e ite teko asɨsa sui yuvɨreko, inungar oyosei omomorochi va'e oturukwar, egwë e'i avei gwekokwer imomorochi Ovesami a'e Cristo sekoi va'e ruvɨ pɨpe yuvɨreko.”

¹⁵ “Sese Tüpä renda porañete va'e rovai yuvɨrekoi,arɨ iyavei pɨ̇tü rupi omboetei sëtä pɨpe yuvɨreko.Akoi ogwapɨ va'e öi, tenda porañete va'esavea'e gwekokwer pɨpe osepɨra.

¹⁶ A'ese ndiyumbɨasɨ iri chira ndi'usei chiaveira yuvɨreko,iyavei arɨ ndoyope iri chira,ndasakuvasɨ iri chietera chupe no;

¹⁷ esepia Ovesami a'e Cristo sekoi va'e Tüpä renda porañete va'e rovai,a'e osäröra ava re'ɨi sereko inungar ovesa rärösaripare vɨrasora tekovesa resendar ɨ ndopai va'esave imboɨ'u agwä,Tüpä evokoiyase omombɨtu'upara iyase'osa sui.”