Apocalipsis 4 - Tüpä Ñe'ëngagwer

Tüpä mboeteisa ɨvave

¹ Ipare asepia mba'e inungar okenda oyemboi va'e ɨvave; a'ese asendu yɨpɨndar ñe'ësa ipirätä va'e inungar mimbɨ ñe'ë, aipo e'i cheu: “Eyeupi ko'ave che evokoiyase mba'e amboyekwara ndeu mba'e imboavɨyepɨrä kuri.”

² A'e ramose voi ete Espíritu pirätäsa pɨpe aiko, iyavei asepia tenda ɨvave, a'e i'arɨve ñepëi ava ogwapɨ öi.

³ Ko ogwapɨ va'e ndoyavɨi ete ita jaspe porañetesa iyavei ndoyavɨi cornalina porañetesa no. Iyavei oime oyere tuprɨ va'e tenda rese inungar yegwaka sendɨyai va'e, inungar esmeralda;

⁴ iyavei asepia evokoi rese oyere tuprɨ ambuae veinticuatro tenda, a'e i'arɨve ogwapɨ yuvɨnoi veinticuatro avei ikwaiprɨ yuvɨrekoi va'e; iturukwar morochi va'e yuvɨreko iyavei oakä rese omboyere tuprɨ oro apoprɨ yuvɨreko.

⁵ Evokoiyase Tüpä renda sui yuvɨnosë overa-vera va'e, iyavei sɨapu gwasu va'e, osunu va'e no; iyavei ñuvɨrïo ova tuprɨ tataendɨ sendɨpa yuvɨreko evokoi tenda rovai, a'e ko ñuvɨrïo ova tuprɨ Tüpä espíritu.

⁶ Evokoi tenda rovai oime avei ndoyavɨi tuprɨ paragwasu tɨ̇pɨu va'e oyekwa tuprɨ va'e mba'e ipɨpe.Ambuae tenda pa'ü rupi oyere tuprɨ Tüpä renda rese irugätu ɨva pendar yuvɨrekove va'e, a'e sesa oyere tuprɨ va'e sese, a'e osareko tuprɨ va'e gwenonera gwakɨkwei kotɨ aveino.

⁷ Yɨpɨndar yuvɨrekove va'e pa'ü pendar a'e ndoyavɨi tuprɨ yagwa pɨ̇ta, sakɨkwerindar ndoyavɨi tuprɨ gwaka kuimba'e, imombosapɨsa ndoyavɨi ete ava, imoirugätusa ndoyavɨi vɨra gwasu oveve va'e.

⁸ Evokoi ɨva pendar irugätu yuvɨrekove va'e vɨreko oyakatu ñepëi ova tuprɨ opepo yuvɨreko iyavei vɨreko opakatu gwete rese gwesa. Ndopɨtu'ui ete arɨ, pɨ̇tü rupi aipo e'i yuvɨreko:“¡Seko maräne'ɨ̇ va'e, seko maräne'ɨ̇ va'e, seko maräne'ɨ̇ ite sekoi yande Yar,a'e Tüpä mba'e mboavaisare'ɨ̇,yɨpɨve va'e ite sekoi, ou apɨre'ɨ̇ va'e avei kuri!”

⁹ Evokoi yuvɨrekove va'e omboetei yuvɨreko, avɨye ndeu e'i ko ogwapɨ va'e öi tenda arɨve ndopai va'e upe.

¹⁰ Egwë e'ise evokoiyase veinticuatro tuprɨ ikwaiprɨ yuvɨrekoi va'e, a'e oñenopɨ'ä imboeteisa pɨpe sovai yuvɨreko, ipare osekɨi oakä resendar oyere tuprɨ va'e omborerekwasa resendar sovai aipo e'i yuvɨreko:

¹¹ “Ore Yar Tüpä, iya ite nde mboeteisa,ndeu sapukaisa nde pirätäsa rese,esepia nde ereyapo va'e mba'e opakatu;nde remimbotar rupi ni'ä oime opakatu mba'e.”