Apocalipsis 21 - Tüpä Ñe'ëngagwer

¹ Ipare asepia ɨva pɨasu iyavei ɨvɨ pɨasu; esepia ni'ä yɨpɨndar ɨva iyavei ɨvɨ opa ite okañɨ yuvɨreko, paragwasu aveino.

² Ipare asepia tekwa nimaräi va'e, a'e Jerusalén pɨasu, ogweyɨ va'e ɨva sui ou, Tüpä rovai sui. Imoigätusa tuprɨ va'e, inungar akoi kuña omenda agwä oyemboetei tuprɨ omevɨ upe.

³ Ipare asendu ñe'ësa ipirätä va'e Tüpä renda porañete va'e sui, aipo e'i: “Ko'ave Tüpä sekoi opakatu ava re'ɨi reseve. A'e oikove va'erä ite sese yuvɨreko yepi, a'e ava evokoiyase chupe narä ite yuvɨrekoira, Tüpä teiete ni'ä sekoira Itüpägwä.

⁴ A'e ni'ä omombɨtu'ura opakatu ava resaɨ, iyavei ndipo iri chietera manosa; yase'osa, vɨ'are'ɨ̇sa, tekoasɨsa avei; esepia ni'ä opakatu mba'e oime va'ekwer yɨpɨndar, ndipo iri chietera kurïtëi.”

⁵ A'ese evokoi ogwapɨ va'e tenda porañete va'e arɨve öi, a'e aipo e'i: “Che ayapo mba'e opakatu ipɨasu va'e.” Iyavei aipo e'i: “Eikwachia, esepia ko ñe'ësa supi tuprɨ va'e ite, evokoiyase iya ite peyeroya sese.”

⁶ Ipare aipo e'i cheu: “Opa ite yavɨye. Che aiko yɨpɨndar ñe'ësa iyavei ipandar. Akoi ava i'usei va'e amboɨ'uño itera ɨ tekovesa resendar ndasepɨi va'e pɨpe.

⁷ Akoi ava oyemovɨräkwä va'e mba'e-mba'e tëi apoe'ɨ̇ agwä, a'e oipɨsɨra ko mba'e opakatu oma'erä yuvɨreko; che aikora Tüpä chupe narä yuvɨreko, a'e evokoiyase che ra'ɨrɨ yuvɨrekoira.

⁸ Akoi ava osɨkɨyeai va'e rumo che rekokwer sui, ndache reroyai va'e, ava ndiporoepia potai va'e, oporoyuka va'e, akoi ava oyemboagwasa tëi va'e, ipaye serai va'e, mba'e ra'anga mboeteisar tëi iyavei opakatu ava semirä-mirä tëi va'e, a'e opara yuvɨraso ɨpa nungar azufre okai pirätä va'e pɨpe, a'e ni'ä imoñuvɨrïo manosa.”

⁹ Evokoiyase ou ñepëi ñuvɨrïo ova mbigwai ɨva pendar pa'ü sui, akoi ñuvɨrïo ova tuprɨ ɨgwa rɨru, ñuvɨrïo ova mba'erasɨ ipa va'e vɨreko va'ekwer ipɨpe, aipo e'i cheu: “Erio, amboyekwara kuña omenda va'evɨ ndeu, Ovesami a'e Cristo sekoi va'e rembirekovɨ.”

¹⁰ Iyavei che kerai nungar pɨpe Espíritu osepia uka va'e cheu, a'ese mbigwai ɨva pendar che reraso ɨvɨtrɨ gwasu ɨvate va'esave, a'eve omboyekwa tekwa gwasu Jerusalén nimaräi va'e cheu, ogweyɨ va'e Tüpä rovai sui ou.

¹¹ A'e tekwa sendɨ iteanga Tüpä rendɨgwer pɨpe; sendɨgwer evokoiyase oyoya tuprɨ ita iporañete va'e rese, oyoya avei ita jaspe serer va'e ipïrerimi va'e rese.

¹² Oime avei tekwa gwasu rese ñachisa ɨvate iteanga va'e, iyavei vɨreko opayandepo yovaive ñuvɨrïo tuprɨ okenda gwasu, evokoiyase oime ñepëi-pëi mbigwai ɨva pendar okenda yakatu; iyavei Israel suindar opayandepo yovaive ñuvɨrïo tuprɨ va'e serer ikwachiasa okenda rese.

¹³ Vɨreko ni'ä mbosapɨ okenda añi'ïvëi kotɨ, mbosapɨ norte kotɨ, mbosapɨ iro'ɨ kotɨ iyavei mbosapɨ ka'aru kotɨ no.

¹⁴ Tekwa gwasu ächisa vɨreko opayandepo yovaive ñuvɨrïo tuprɨ ita imovɨräkwäsa, a'e sese evokoi opayandepo yovaive ñuvɨrïo tuprɨ yuvɨrekoi va'e ikwachiasa serer Ovesami a'e Cristo sekoi va'e ñe'ë mombe'usar.

¹⁵ Iyavei mbigwai ɨva pendar oñe'ë va'e cheu vɨreko ñepëi oro apoprɨ mba'e rä'asa tekwa rä'a agwä, opakatu sokendɨpɨ rä'a agwä, ñachisa rä'a agwä aveino.

¹⁶ Tekwa gwasu pukukwer oyoya tuprɨ ipɨgwer rese. Evokoiyase mbigwai ɨva pendar osä'a tekwa gwasu ruvichagwer; osä'ase ipukukwer dos mil doscientos kilómetros tuprɨ ite; ipukukwer i'ɨvategwer iyavei ipɨkwer oyoya päve tuprɨ ite no.

¹⁷ Ipare osä'a ñachisa: osä'ase ipɨgwer sesenta y cinco tuprɨ. Evokoi mbigwai ɨva pendar osä'a ava rembiporu pɨpe.

¹⁸ Tekwa ächisa ita porañete va'e Jaspe serer va'e apoprɨ, tekwa evokoiyase oro päve tuprɨ, avɨye yepiasa sekose katu va'e.

¹⁹ Ñachisa movɨräkwäsa vɨreko opakatu ambuae ita-ita tëi iporañete va'e päve: yɨpɨndar, ivɨräkwäsa jaspe; imoñuvɨrïosa, zafiro; imombosapɨsa, ágata; imoirugätusa, esmeralda;

²⁰ imbopoyandeposa, ónice; imoñepëi ovasa, cornalina; imoñuvɨrïo, ovasa, crisólito; imombosapɨ ovasa, berilo; imoirugätu ovasa, topacio; imboopayandepo yovaivesa, crisoprasa; imboopayandepo yovaivesa ñepëi, a'e jacinto; imboopayandepo yovaivesa ñuvɨrïo, amatista.

²¹ Imboopayandepo yovaivesa ñuvɨrïo tuprɨ va'e okenda gwasu a'e imboopayandepo yovaivesa ñuvɨrïo tuprɨ mbo'ɨrɨ; ñepëi-pëi okenda ñepëi mbo'ɨrɨ sui yapoprɨ. Okar gwasu tekwa avɨter rupindar evokoiyase oro päve, inungar yepiasa ipore'ɨ̇ tuprɨ va'e mba'e ipɨpe.

²² Ndasepiai ete evokoi tekwa gwasu pɨpe ñepëi yepe tüpäro, esepia ni'ä yande Yar Tüpä mba'e mboavaisare'ɨ̇, iyavei Ovesami a'e Cristo sekoi a'eve.

²³ Evokoi tekwa gwasu ndovɨreko iri ete arɨ, yasɨ gwesape agwä, esepia ni'ä Tüpä ite osesape gwendɨgwer pɨpe, iyavei Ovesami a'e Cristo sekoi va'e tataendɨ nungar sekoi a'eve yuvɨrekoi va'e upe.

²⁴ Sendɨgwer osesapera opakatu tekwa rupindar igwatasa rupi, iyavei ava mba'e yar mborerekwar ɨvɨ pɨpendar opara gweru omba'e eta porañete va'e yuvɨreko chupe.

²⁵ Evokoiyase sokendɨpɨ nimboyasai chietera arɨ yakatu rupi, pɨ̇tü ndipoi chiaveira a'eve.

²⁶ Ipare opara a'eve ambuae tekwa mba'e eta, porañete va'e omoinge yuvɨreko;

²⁷ ndoyuvɨroikei chietera ava angaipa viyar iyavei mba'e naporäi va'e aposar, iporombopa serai va'e avei. Akoi ava vɨreko va'e gwerer ikwachiaprɨ Ovesami a'e Cristo sekoi va'e kwachiar tekovesa pɨpe a'e gweraño yuvɨroikera a'eve.