Apocalipsis 20 - Tüpä Ñe'ëngagwer

Karugwar rekopɨsa resendar

¹ Ipare asepia ñepëi mbigwai ɨva pendar ogweyɨ va'e ou ɨva sui ɨvɨkwar gwasu ipɨkuku va'e mboyasar iyavei karena ipo gwasu va'e opove vɨreko.

² Ko mbigwai ɨva pendar oipɨsɨ mba'e ɨpɨ oporomokañɨ va'e mboi nungar araka'endar, a'e ni'ä Karugwar sekoi iyavei opakatu Karugwar rerekwar; a'e oiku'akwa karena pɨpe mil aravɨter rupi imoi.

³ A'ese omombo ɨvɨkwar gwasu ipɨkuku va'e pɨpe, a'eve osokenda ipare omondo sello sokenda rese opakatu ambuae-ae tekwa rupindar mbopa-mbopa tëi iri e'ɨ̇ agwä rese akoi osupitɨse voi mil aravɨter, koiye rumo mil aravɨter pare, imosesa raimi tëira.

⁴ Ipare asepia tenda, i'arɨve seta ava ogwapɨ yuvɨnoi evokoi oipɨsɨ va'e omborerekwasa yuvɨreko ava upe mba'e rese porandu agwä. Iyavei asepia ava ä evokoi opa va'ekwer oyasɨa ñakä yuvɨreko Jesús rekokwer mombe'usa sui tëi Tüpä ñe'ëngagwer mombe'usa pɨpe sui tëi avei. A'e ava nomboetei va'e mba'e ɨpɨ vai; sa'anga avei nomboetei yuvɨreko no; nomondo ukai va'e avei osɨva rese serer yuvɨreko, opo rese avei. A'e asepia opa okwerayevɨ yuvɨreko. Ipare oporokwai Cristo rese mil aravɨter rupi yuvɨreko.

⁵ Ambuae ava omano va'e rumo ndokwerayevɨ iri ete yuvɨreko, esepia osupitɨ rane itera mil aravɨter.

⁶ ¡Sorɨvete katura akoi ava vɨreko va'e yɨpɨndar kwerayevɨsa, esepia ni'ä, a'e Tüpä upendar ite yuvɨrekoi! Imoñuvɨrïosa manosa evokoiyase chupe ndipo iri ete, egwë e'ira rumo Tüpä upe gweräño ite pa'i yuvɨrekoira Cristo upe avei, ipare mborerekwar yuvɨrekoira sese mil aravɨter rupi.

⁷ Akoi osupitɨse rumo mil aravɨter, a'ese Karugwar yorasara sokendasa sui,

⁸ ichui osëra opakatu ava ɨvɨ pɨpendar mbopa-mbopa tëi agwä oiko; osëra ɨvɨ Gog mbopa tëi agwä, ɨvɨ Magog mbopa tëi agwä avei, ipare omonu'ära vavasave narä isundao eta, esepia ni'ä a'e se'ɨi eteprɨ yuvɨreko inungar ɨvɨ ku'i paragwasu popɨ rupindar.

⁹ Egwë e'i yugweru atɨ amombrɨ sui, oyerepa tuprɨ Tüpä rekwa rese yuvɨreko no, evokoi tekwa Jerusalén sembiaɨsu rese avei. Tüpä rumo ombou tata ɨva sui, a'e ipɨpe opa tuprɨ ite osapɨ.

¹⁰ Karugwar evokoiyase, ava mbopa-mbopa tëisar, a'e opa imombosa ɨpa azufre okai va'e pɨpe, a'eve akoi opa imombosa mba'e ɨpɨ vai Tüpä ñe'ë mombe'usar anga'u tëi va'e aveino. A'eve iparaɨsura pɨ̇tü, arɨ yuvɨreko apɨre'ɨ̇ va'erä.

Arɨ kañɨ ipa va'e resendar

¹¹ Evokoiyase asepia tenda imboeteiprɨ, morochi va'e, i'arɨve oime ava ogwapɨ va'e öi. Sovai ɨvɨ iyavei ɨva opa tuprɨ okañɨ, ndoyekwa iri ete kokotɨ rupi yuvɨreko.

¹² Ipare asepia omano va'ekwer seko ɨvate va'e, seko mbegwemi va'e aveino opü'a yuvɨno'ä Tüpä rovai; a'ese kwachiar opa ipɨpirasa, iyavei ambuae kwachiar, a'e kwachiar tekovesa resendar. Omano va'ekwer upe evokoiyase porandusa evokoi kwachiar pɨpendar mba'e sembiapokwer rese.

¹³ Omano va'ekwer opa yuvɨnosë paragwasu pɨpe sui, iyavei te'ögwer rekosa sui opa yuvɨnosë; ichui opakatu mba'e sembiapokwer rese porandusa yuvɨreko chupe no.

¹⁴ Ipare manosa rekwa opa imondosa tata nungar ɨpa pɨpe. Evokoi ɨpa ni'ä imoñuvɨrïosa manosa,

¹⁵ a'eve opa imondosa akoi ndovɨrekoi va'e gwerer ikwachiaprɨ kwachiar tekovesa resendar pɨpe.