Apocalipsis 17 - Tüpä Ñe'ëngagwer

Keraisa yemoigätusa resendar

¹ Ñepëi mbigwai ɨva pendar ñuvɨrïo ova pa'ü pendar vɨreko va'ekwer ɨgwa rɨru, a'e ou aipo e'i cheu: “Erio, amboyekwara ndeu ñemoɨrösa ko kuña oyemondo-mondo tëi va'e upe, a'e evokoi ogwapɨ ɨ arɨve öi.

² Ko kuña rese yagwasa-gwasa tëi mborerekwareta ɨvate katu va'e ɨvɨ pɨpendar yuvɨreko, iyavei ava ɨvɨ pɨpendar inungar osavaɨpo va'e ndopoi potai ete oyemboagwasasa sui yuvɨreko.”

³ Ipare che ker nungar pɨpe asepia Espíritu omboyekwa va'e cheu, mbigwai ɨva pendar che reraso ɨvɨ iporupɨre'ɨ̇save. A'eve asepia kuña mba'e ɨpɨ vai pirä va'e arɨve chini, evokoi mba'e ɨpɨ vai opakatu rupi oyapete tuprɨ ñe'ësa vai Tüpä amotare'ɨ̇sa sereko oyese, iyavei vɨreko ñuvɨrïo ova tuprɨ oakä, opayandepo yovaive tuprɨ gwächi.

Kuña i'äi mba'e ɨpɨ vai arɨve

⁴ Ko kuña turukwar suendɨ va'e, pirä va'e aveino, oyemboendɨyai oro pɨpe oiko, ita iporañeteai va'e pɨpe, opo'ɨrɨ pɨpe aveino. Vɨreko opove ɨgwa rɨru oro apoprɨ, ɨpɨpe omboapɨpo mba'e yavaete va'e sereko oyemboagwasa tëisa resendar;

⁵ iyavei vɨreko ikwachiaprɨ osɨva rese terer ndikwasai va'e aipo e'i: “Ko tekwa Babilonia gwasu, kuña oyemondo-mondo tëi va'e sɨ, opakatu ava ɨvɨ pɨpendar sekokwer yavaete va'e sɨ aveino.”

⁶ Ipare aikwa evokoi kuña osavaɨpo va'e öi Tüpä reroyasar ruvɨ pɨpe iyavei akoi Jesús rekokwer mombe'usa sui tëi yukaprɨ va'e ruvɨ pɨpe aveino.Asepiase rumo ndache mbovɨ'ai ete.

⁷ A'ese mbigwai ɨva pendar aipo e'i cheu: “¿Ma'erä vo nderevɨ'ai eiko? Aikwa ukara ko kuña rekokwer ndikwasai va'e ndeu, iyavei akoi mba'e ɨpɨ vai vɨreko va'e ñuvɨrïo ova tuprɨ oakä, opayandepo yovaive tuprɨ avei akoi sächi va'e.”

⁸ Akoi mba'e ɨpɨ vai eresepia va'e, a'e yɨpɨve ite sekoi ko ɨvɨ pɨpe, iyavei kurïtëi a'e ndipo iri; koiye rumo osëra ɨvɨkwar gwasu ipɨkuku va'e sui omano agwä renonde. Akoi ava ɨvɨ pɨpendar ndovɨrekoi va'e gwerer kwachiar tekovesa resendar pɨpe yɨpɨve ɨvɨ apoe'ɨ̇seve yuvɨreko, a'e ndovɨ'ai chira osepiase evokoi mba'e ɨpɨ vai yɨpɨve oikove va'e yuvɨreko, a'e kurïtëi ndipo iri, koiye rumo oyevɨ irira ou ko ɨvɨ pɨpe.

⁹ “Ko'ave ikwasara uma vɨreko mba'ekwasa iyavei sendukwa agwä: Ko ñuvɨrïo ova tuprɨ va'e ñakä a'e omombe'u ñuvɨrïo ova tuprɨ ɨvɨtrɨ, i'arɨve evokoi kuña ogwapɨ öi; iyavei a'e ñuvɨrïo ova ñakä omopore'ɨ̇ ñuvɨrïo ova tuprɨ mborerekwareta ɨvate katu va'e.

¹⁰ Poyandepo tuprɨ mborerekwar ɨvate katu va'e opa okañɨ yuvɨreko, ñepëi ipa'ü pendar oporokwai kurïtëi oiko, ambuae rumo ndou vɨtei ete. Akoi ouse ipandar kuri, a'e ou raimi tëi etera.

¹¹ Mba'e ɨpɨ vai sekoi va'e yɨpɨndar, ndoikove iri kurïtëi, a'e sese yuvɨrekoira imombosapɨ ovasa tuprɨ mborerekwarä ɨvate katu va'e, yepe ñuvɨrïo ova tuprɨ va'e mborerekwar ɨvate katu va'e mboetasa viña, a'e sekokwer rumo okañɨ tëi va'erä ite.”

¹² “Evokoi eresepia opayandepo yovaive tuprɨ sächi atɨ va'e, a'e opayandepo yovaive tuprɨ mborerekwar ɨvate katu va'e yuvɨrekoi, ndoyuvɨroike vɨtei rumo oporokwai va'erä; esepia oyoya tuprɨra oporokwai raimi tëira mba'e ɨpɨ vai reseve yuvɨreko kuri.

¹³ Ko opayandepo yovaive tuprɨ mborerekwar ɨvate katu va'e, a'e oyoya gwasura ipɨ'añemoñeta evokoi mba'e ɨpɨ vai upe omondo va'erä pirätäsa iporokwai agwä yuvɨreko.

¹⁴ Ipare ovavara Ovesami a'e Cristo sekoi va'e rese yuvɨreko; Ovesami a'e Cristo sekoi va'e osekopɨra, esepia ni'ä Ovesami a'e yande Yar Cristo sekoi va'e opakatu ava Yar iyavei mborerekwar ɨvate katu va'e sekoi opakatu mborerekwareta Rerekwar, akoi ava yuvɨrekoi va'e sese, a'e senoiprɨ iyavei iporavoprɨ oyemovɨräkwäño va'e ite supi ogwata agwä yuvɨreko.”

¹⁵ Iyavei mbigwai ɨva pendar aipo e'i cheu: “Evokoi ɨ eresepia va'e, i'arɨve kuña oyemondo-mondo tëi va'e ogwapɨ öi, a'e ava re'ɨi tekwa yakatu rupindar, iñe'ë ambuae va'e iyavei opakatu ambuae ɨvɨ rupindar.

¹⁶ Evokoi eresepia opayandepo yovaive tuprɨ sächi atɨ va'e, iyavei mba'e ɨpɨ vai, a'e ndoyambotai chira kuña oyemondo-mondo tëi va'e, iyavei osekɨi tuprɨra seya; o'upara so'o, ipare opara osapɨ.

¹⁷ Tüpä ni'ä omondo ipɨ'a pɨpe mba'e gwemimbotar apo agwä: a'e oyoya tuprɨ ipɨ'a ñemoñetara omondo va'erä omborerekwasa mba'e ɨpɨ vai upe yuvɨreko, esepia yavɨye rane itera Tüpä ñe'ëngagwer.

¹⁸ Iyavei evokoi kuña eresepia va'e yagwasa-gwasa tëi va'e, a'e ni'ä tekwa gwasu ɨvɨ pɨpendar mborerekwareta vɨreko va'e opovrɨve yepi.”