Apocalipsis 14 - Tüpä Ñe'ëngagwer

Ovesami a'e Cristo sekoi va'e iyavei ava iporavoprɨ

¹ Ipare asepia Jesucristo ɨvɨtrɨ Sión rese imo'ä. A'e supi yuvɨrekoi ciento cuarenta y cuatro mil tuprɨ ava evokoi oikwachia va'e Jesucristo rer, Tu rer avei osɨva rese yuvɨreko.

² Ipare asendu mba'e rɨapu ɨva sui ou va'e; ndoyavɨi akoi ɨtu gwasu rɨapugwer iyavei ndoyavɨi ete akoi osunu va'e opororo-roro iteanga va'e; ndoyavɨi avei akoi ava seta va'e omoñe'ëse arpas yuvɨreko, egwë e'i sɨapugwer.

³ Ipare osapukai sapukaisa ipɨasu va'e yuvɨreko Tüpä rovai iyavei ɨva pendar irugätu yuvɨrekove va'e rovai, ikwaiprɨ eta rovai aveino. Ñepëi yepe ɨva pendar ndoikatui ete evokoi sapukaisa rese oyembo'e va'erä. Egwë e'i rumo ava ciento cuarenta y cuatro mil tuprɨ yuvɨrekoi va'e, evokoi oñepɨsɨrö va'e ɨvɨ pɨpendar pa'ü sui, a'e gweraño tuprɨ ite oikatu osapukai yuvɨreko.

⁴ Ko ava ndasekomaräi va'e ndoyapoi ete mba'e kokotɨ tëi kuña rese, esepia oñearö tuprɨ gweko katuprɨsa pɨpe; iyavei osakɨkwe moñaño ite Jesucristo igwatasa rupi yuvɨreko. Opa serokwasa ava pa'ü sui iyavei inungar yɨpɨndar mba'e seropove'ëprɨ Tüpä upe, Ovesami a'e Cristo sekoi va'e upe avei.

⁵ Ndipoi ete temirä sese, esepia ni'ä ndipoi ete mba'e sembiavɨ yuvɨreko.

Ava ɨvate katu va'e Ra'ɨrɨ iyavei ñepëi ovasa mbigwai ɨva pendar retakwer

⁶ Evokoiyase asepia ambuae mbigwai ɨva pendar oveve va'e ɨva mbɨter rupi iyavei vɨreko Tüpä ñe'ëngagwer pɨsɨrösa resendar ndopai va'e imombe'u agwä opakatu ava ko ɨvɨ pɨpendar upe, opakatu ɨvɨ rupindar upe, ava ambuae va'e upe, iñe'ë ambuae va'e upe, opakatu tekwa rupindar upe aveino.

⁷ Ipare oñe'ë pirätä aipo e'i: “Pesɨkɨye Tüpä sui iyavei pesapukai seko ɨvatesa rese chupe, esepia ni'ä kurïtëi oyepota arɨ chupe ava rekokwer rese iporandu agwä. Pemboetei katu oyapo va'ekwer ɨva, ɨvɨ, paragwasu, ɨ o'ë va'e aveino.”

⁸ Ichui ambuae mbigwai ɨva pendar imoñuvɨrïosa rakɨkwerindar aipo e'i: “¡Ovɨapi, ovɨapi ete Babilonia gwasu, esepia ni'ä, evokoi opa ombosavaɨpo opakatu ambuae tekwa pendar o'ɨgwa yemboagwasa tëisa resendar pɨpe!”

⁹ Ipare ambuae mbigwai ɨva pendar osakɨkwei moña imombosapɨsa, aipo e'i oñe'ë pirätä: “Akoi ava omboetei va'e mba'e ɨpɨ vai sereko, sa'anga aveino, iyavei akoi oyembo'e katu va'e oyekwachia agwä osɨva rese, opo rese no,

¹⁰ a'e oipɨsɨ itera Tüpä ñemoɨrösa ipirätä va'e, ipare omombaraɨsura setekwer azufre okai va'e pɨpe gwembigwai ɨva pendareta reko maräne'ɨ̇ rovake, iyavei Ovesami a'e Cristo sekoi va'e rovake aveino.

¹¹ Tatächi, ikaigwer pendar evokoiyase oyeupira ndopai va'erä, a'ese ndipoi chietera pɨtu'usa pɨ̇tü arɨ pɨpe, evokoi mba'e ɨpɨ vai mboeteisar upe, sa'anga mboeteisar upe aveino, iyavei akoi vɨreko va'e serer kwachiaprɨ oyese yuvɨreko no.”

¹² ¡Ko pɨpe oyekwa Tüpä rese yeroyasa iyavei ipirätäsa ava rese yuvɨreko, Jesús reroyasar rese avei!

¹³ A'ese asendu ñepëi ñe'ësa ɨva pendar aipo e'i va'e cheu: “Eikwachia ko ñe'ësa: ‘Ko pɨpe suive sorɨvete katura akoi ava omano va'e yande Yar rese yuvɨreko.’ ”“Egwë e'i ete–e'i Espíritu imombe'u–, a'e opɨtu'ura oporavɨkɨsa sui yuvɨreko, esepia ni'ä sembiapokwer avɨye ite Tüpä pɨ'ave.”

¹⁴ A'ese asepia ɨva kɨ'a morochi va'e, iyavei ɨva kɨ'a arɨve ndoyavɨi ñepëi ava ra'ɨrɨ ogwapɨ va'e öi. Vɨreko ni'ä oyegwaka oro apoprɨ oakä rese iyavei mba'e mitɨ̇ asɨasa saimbe va'e vɨreko opove.

¹⁵ Ipare osë ambuae mbigwai ɨva pendar tüpäro sui, a'e säse pirätä evokoi ɨva kɨ'a arɨve chini va'e upe: “¡Eyasɨa nde remitɨ̇ iyavei emonu'ä nde rembiasɨa; esepia nde remitɨ̇ ɨvɨ pendar yavɨye ite e'i ava rekokwer uve chupe!”

¹⁶ Akoi ogwapɨ va'e ɨva kɨ'a arɨve öi, oyasɨa gwemitɨ̇ ɨvɨve oiko, ipare opa omonu'ä gwembiasɨa.

¹⁷ Ipare osë ambuae mbigwai ɨva pendar tüpäro sui, a'e avei vɨreko mba'e mitɨ̇ asɨasa saimbe va'e.

¹⁸ Ipare ambuae mbigwai ɨva pendar osë mba'e reropove'ëprɨ renda sui, a'e tata rese añekosar sekoi, iyavei oñe'ë pirätä evokoi vɨreko va'e mba'e mitɨ̇ asɨasa upe aipo e'i: “¡Eyasɨa uva a apakwar, evokoi oime va'e ɨvɨ pɨpe, esepia ni'ä opa ite yavɨye uva a kurïtëi!”

¹⁹ Evokoiyase ko mbigwai ɨva pendar opa oyasɨa uva itɨ sui. Ipare opa oyapokatu mba'e rɨru tuvicha va'e pɨpe Tüpä ñemoɨrösa rärö agwä.

²⁰ Ipare uva serasosa tekwa kupeve ikambe agwä, egwë e'i ko ava imombaraɨsu; ichui osë tuvɨ evokoi tɨpɨgwer oyepota ite kavayu yuru penda rupi, a'e ipukukwer trescientos kilómetros tuprɨ ite.