Apocalipsis 10 - Tüpä Ñe'ëngagwer

Mbigwai ɨva pendar vɨreko va'e ikwachiaprɨ kwachiarmi

¹ Ipare asepia ambuae mbigwai ɨva pendar ipirätä va'e ogweyɨse ɨva sui ou mba'e pɨ̇tü pa'üve; a'e ñakä rese oyere tuprɨ yegwakwa, sova sendɨ avɨye arɨ, setɨ̇ma evokoiyase ndoyavɨi tata rendɨgwer opü'a tuprɨ va'e.

² Kwachiarmi oyemboi va'e vɨreko opove, opɨ oakato kotɨndar pɨpe opɨ̇ro paragwasu rese, ambuae opɨve evokoiyase opɨ̇ro ɨvɨ rese.

³ Evokoiyase säse pirätä, inungar yagwa pɨ̇ta räse; ipare säsese evokoiyase ñuvɨrïo ova tuprɨ osunu va'e ñe'ë oyeendu yuvɨreko.

⁴ Koiye oñe'ë pare ñuvɨrïo ova tuprɨ osunu va'e, a'ese iñe'ë che aikwachiara viña; asendu rumo ɨva sui ñe'ësa aipo e'i va'e: “Eremboyekwai rene akoi ñuvɨrïo ova tuprɨ osunu va'e ñe'ë, ndereikwachiai chietera e'i cheu.”

⁵ Evokoiyase mbigwai ɨva pendar asepia va'ekwer, a'e akoi opɨ̇ro va'e paragwasu rese, ɨvɨ rese avei opo oakato kotɨndar omopü'a ɨva kotɨ

⁶ ichui Tüpä ndopai va'e rer pɨpe evokoi oyapo va'e ɨva, ɨvɨ, paragwasu iyavei opakatu mba'e ipor reseve. A'ese aipo e'i oñe'ë: “Nasärösa iri chietera evokoi nungar mba'e;

⁷ oyepotase rumo imoñuvɨrïo ovasa mbigwai ɨva pendar upe gwemimbɨ moñe'ë agwä, a'ese imboavɨyesara Tüpä remimbotar yɨpɨndar ndikwasai va'e, a'e akoi omombe'u va'e gwembigwai oñe'ë mombe'usar upe araka'e.”

⁸ Ñe'ësa asendu va'e ɨva sui oñe'ë iri cheu aipo e'i: “Eso tereipɨsɨ kwachiarmi imboiprɨ mbigwai ɨva pendar vɨreko va'e evokoi opɨ̇ro va'e paragwasu rese o'ä, ɨvɨ rese aveino.”

⁹ Evokoiyase aso mbigwai ɨva pendar upe, aporandu kwachiarmi rese, a'e omboyevɨ cheu: “Ndoko eipɨsɨ e'u, nde yuru pɨpe evokoiyase së'era eirɨ nungar, nde avɨterve rumo irora e'i cheu.”

¹⁰ A'ese aipɨsɨ kwachiarmi mbigwai ɨva pendar sui, ipare a'u; yɨpɨndar së'e che yuru pɨpe inungar eirɨ, amokopase rumo, che avɨterve iroiteanga.

¹¹ Evokoiyase aipo e'i yuvɨreko cheu: “Nde eremombe'u irira Tüpä ñe'ëngagwer ipɨasu va'e, ambuae tekwa rupindar upe, ɨvɨ rupindar upe avei, ambuae iñe'ë va'e upe, mborerekwareta upe aveino.”