2 Timoteo 1 - Tüpä Ñe'ëngagwer

Pablo ma'endu'asa Timoteo upe

¹ Che Pablo Cristo Jesús ñe'ë mombe'usar imbouprɨ Tüpä remimbotar rupi aiko, Cristo Jesús rekokwer rupi che reko agwä,

² amondo che avɨravesa ko kwachiar ndeu, che rembiaɨsu che ra'ɨrɨ nungar Timoteo. Yande Ru Tüpä iyavei yande Yar Cristo Jesús tombou oporovasasa, oporoparaɨsuerekosa nde reko tuprɨ agwä ndeu.

Pablo oyokwai Timoteo Cristo rekokwer mombe'u agwä

³ Che yerure pa'üve chema'endu'a nde rese pɨ̇tü iyavei arɨ yakatu rupi, avɨye ndeu a'e Tüpä upe nde rekokwer rese, che aporavɨkɨ tuprɨ ite Tüpä rese che pɨ'añemoñeta tuprɨsa pɨpe yepi, inungar che ramoi eta oyapo yuvɨreko araka'e.

⁴ Ndacheresarai ete akoi nde yase'o agwer sui, iyavei oroepia pota tëi che yembovɨ'arete agwä.

⁵ Supiete chema'endu'año nde Tüpä reroyasa supiete erereko va'e rese. Iyavei nde yari Loida, nde sɨ Eunice, a'e ni'ä yɨpɨndar egwë e'i yuvɨreko. Evokoiyase ayeroyaño nde rese, nde avei egwë erese.

Ani ndiyai nachi Jesús ñe'ëngagwer sui

⁶ Sese che oromongere'ɨ̇ embouvicha katu ko Tüpä ombou va'e ndeu akoi amondose che po nde arɨve a'e ereko katu ndeyeupe.

⁷ Esepia Tüpä nomboui sɨkɨyesa yandeu, a'e rumo ombou yande reko movɨräkwäsa, poroaɨsusa, iyavei yande mbopɨ'añemoñeta tuprɨ agwä.

⁸ Evokoiyase eresɨkɨye eme katu yande Yar rekokwer mombe'u; nderechï chiaveira che rokendasa sui tëi. Esepia yande Yar rekokwer mombe'usa sui tëi ni'ä che rokenda yuvɨreko. Iyakatu rumo nde avei ereñemosañora ko mba'e-mba'e tëi Tüpä pirätäsa pɨpe. A'e oura ndeu ñe'ësa pɨsɨrösa resendar mombe'usa sui.

⁹ Tüpä ni'ä yande pɨsɨrö iyavei yande renoi yande reko tuprɨ agwä sese, nda'ei yande rembiapo pɨpe. A'e rumo gwemimbotar rupi yande raɨsu Cristo Jesús rese yande rekose, a'e Tüpä ite yande raɨsu yɨpɨsuive ɨvɨ apo vɨte e'ɨ̇seve.

¹⁰ Kurïtëi rumo a'e omboyekwa oporoaɨsusa yande Pɨsɨrösar Cristo Jesús ouse, akoi ou va'e ko ɨvɨ pɨpe manosa pirätäsa rekopɨ agwä, iyavei ñe'ësa pɨsɨrösa pɨpe avei oikwa uka tekovesa ndopai va'e.

¹¹ Tüpä ni'ä che kwai ko ñe'ësa mombe'u agwä, che kwai avei Jesús ñe'ë mombe'usar che reko agwä, iyavei che porombo'e agwä.

¹² Sese ni'ä che opakatu aiporara ko mba'e-mba'e tëi vichiko. Nachi ete rumo ichui yuvɨreko, esepia che aikwa uma rese ayeroya; aikwa avei vɨrekose pirätäsa akoi ñe'ësa ombou va'e, imokañɨ e'ɨ̇ agwä arɨ ipa va'e rupi ete cheu.

¹³ Ko porombo'esa amondo va'e ndeu supi ñoite eregwatara, iyavei ereikoño itera Tüpä reroyasa pɨpe, poroaɨsusa yareko va'e rese avei avɨye Cristo Jesús upe.

¹⁴ Esärö avei ko ñe'ësa avɨye va'e Tüpä ombou va'e ndeu, Espíritu Maräne'ɨ̇ reko pirätäsa pɨpe yareko va'e yandeyese.

¹⁵ Ereikwa ni'ä ko ava opakatu Asia ɨvɨ rupindar oyepepɨño yuvɨreko che sui; ipa'üve yuvɨrekoi mbɨa ñuvɨrïo, a'e serer Figelo iyavei Hermógenes.

¹⁶ Yande Yar tomondo paraɨsuerekosa Onesíforo mu upe, esepia Onesíforo seta yupagwer che mbovɨ'a iyavei nochi ete ava rovake che rokendasa sui.

¹⁷ Ouse rumo Roma ve, ndikwerai ete okere'ɨ̇sa pɨpe chereka agwä oiko.

¹⁸ Yande Yar tomondo oporoparaɨsuerekosa chupe a'e arɨ ipa va'e pɨpe kuri. Iyavei nde ereikwa tuprɨ a'e mbɨa yande pɨtɨ̇vɨï va'e Éfeso ve.