2 San Juan 1 - Tüpä Ñe'ëngagwer

Ma'endu'asa resendar

¹ Che, aikwachia ko ñe'ësa che ma'endu'asa resendar peü, pe Tüpä rembiporavo peiko va'e opakatu upe. Che ni'ä supiete opoaɨsu, nda'ei rumo che gweraño opoaɨsu, opakatu oikwa va'e porombo'esa supiete va'e avei pe raɨsu yuvɨreko.

² Opoaɨsu ite mba'e supiete va'e yande pɨ'a pɨpe yareko va'e rese, a'e ndopai va'erä ite yandesui.

³ Yande Ru Tüpä, yande Yar Jesucristo, Tüpä Ra'ɨrɨ, tombou oporovasasa, oporoparaɨsuerekosa peü narä, tombou avei gweko tuprɨsa, gweko supiete va'e pɨpe oporoaɨsusa pɨpe avei peü.

Mborokwaita yeasusa resendar

⁴ Che mbovɨ'arete aikwase pe pa'ü pendar yuvɨrekoi va'e gwekokwer avɨyesa pɨpe, esepia a'e vɨroya porombo'esa supiete va'e yuvɨreko, a'e ni'ä yande Ru Tüpä porokwaita.

⁵ Iyavei che rɨvrɨ eta, che rembiaɨsu, tayayeaɨsu katu ñepëi-pëi. Ko aikwachia va'e nda'ei porokwaita ipɨasu va'e, a'e ni'ä akoi yɨpɨndar Ikwachiaprɨ peü.

⁶ Ko yande yeaɨsusa, yande gwata tuprɨ agwä Tüpä porokwaita rupi, ko Tüpä porokwaita yɨpɨsuive pesendu va'e, a'e omombe'u yande yeaɨsu tuprɨ agwä yandeu.

Yeroyasa yareko va'e Jesucristo rese

⁷ Setavai ogwata ɨvɨ yakatu rupi oporombopa tëi va'e yuvɨreko, ndoikwai ete Jesucristo ouse ko ɨvɨ pɨpe ava supiete va'e nungar yuvɨreko. Akoi egwë e'i va'e, a'e oporombopa tëi va'e Jesucristo amotare'ɨ̇mbar yuvɨrekoi.

⁸ Peñearö katu pe poravɨkɨ reprɨ mokañɨ tëi e'ɨ̇ agwä, tapeipɨsɨ katu Tüpä porerekosa peyeupe narä.

⁹ Oime ava oyepepɨño va'e Cristo porombo'esa sui, a'e Tüpä ndovɨrekoi opɨ'a pɨpe yuvɨreko; akoi oyapɨsaka tuprɨ va'e Cristo porombo'esa rese, a'e vɨreko Tüpä, Ta'ɨrɨ avei oyese.

¹⁰ Akoi oyepotase ava oporombopa tëi va'e peü, ndovɨrekoi va'e ko porombo'esa, ndapeipɨsɨi chira pe rëtäve iyavei ndapemboavɨravei chira;

¹¹ esepia akoi pemboavɨravese, pe avei pe'ara sembiapo kwerai pɨpe.

Ñe'ësa ipa va'e

¹² Che ni'ä amombe'u pota seta mba'e peü, namombe'u potai rumo kwachiar pɨpe. Che teiete aso pota peü che ñe'ë agwä, a'ese yayembovɨ'aretera oyese.

¹³ Iyavei Tüpä rembiporavo oñemonu'ä va'e ko'ave opakatu omondo oma'endu'asa yuvɨreko peü.