2 Corintios 6 - Tüpä Ñe'ëngagwer

¹ Ore oroporavɨkɨ va'e Tüpä ñe'ëngagwer rese, sese kurïtëi oromombe'u peü pepoi e'ɨ̇ agwä Tüpä porovasasa omboyekwa va'e sui peü.

² Esepia Tüpä aipo e'i Ikwachiaprɨ pɨpe:“Osupitɨse arɨ avɨye va'e a'ese che asendu nde yeruresa;iyavei a'e arɨ poropɨsɨrösa pɨpe opopɨtɨ̇vɨï.”Oyepota arɨ avɨye va'e. ¡Iyavei oime ite kurïtëi ñepɨsɨrösa!

Pablo upe oime tekoa'äsa iporavɨkɨ sui

³ Ore ni'ä ndoromboyekwai ore rekoai ava pa'üve, esepia ndoroipotai ava Tüpä upe ore poravɨkɨsa rese iñe'ërai agwä yuvɨreko.

⁴ Ore rumo oromboyekwa ite Tüpä rembigwai ore rekosa, esepia ore reko mbegwesa pɨpe oroñemosaño mba'e-mba'e tëi upe, yepe ipane mba'e oreu viña, iyavei mba'e yavaise;

⁵ egwë oro'e avei ore nupa-nupase, ore rokendase avei omongere'ɨ̇se ava re'ɨi ore amotare'ɨ̇ agwä yuvɨreko, oroyapo avei mboravɨkɨ ipirätä va'e amove ndorokei ete, seta rupi ndorerɨepoi tëi avei.

⁶ Oromboyekwa avei ore reko maräne'ɨ̇sa, ore mba'ekwasa supiete va'e, ore reko mbegwe tuprɨsa, yeaɨsusa orovɨreko aveino, egwë oro'e ite ni'ä Espíritu Maräne'ɨ̇ pirätäsa pɨpe, ore poroaɨsusa supiete va'e pɨpe avei.

⁷ Ore remimombe'u supiete va'e pɨpe iyavei Tüpä pirätäsa pɨpe avei oroiko. Ore ni'ä ore reko tuprɨ pɨpe orosekopɨ mba'e-mba'e tëi, ipɨpe avei oroyoepɨ.

⁸ Amove ava ore mboeteiai, amove rumo oñemoɨrö yuvɨreko oreu; amove avei oñe'ë tuprɨai ore rese yuvɨreko, ipare rumo iñe'ë-ñe'ë tëi ore rese yuvɨreko yepi no. Iyavei amove oporombopa tëi va'e nungar ore rereko yuvɨreko, yepe oromombe'u tëi mba'e supiete va'e viña.

⁹ Amove ndikwasai va'e nungar tëi ore rereko yuvɨreko, ikwaprɨ ite tie oroiko viña. Amove ore yuka seni yuvɨreko, oroikoveño ite rumo; iyavei amove ore mombaraɨsusa katu tëi, ndoreyukai ete rumo ipɨpe yuvɨreko.

¹⁰ Amove ndoyavɨi ndorovɨ'ai va'e yuvɨreko chupe, ore rumo orovɨ'año ite yepi; avɨye ndoyavɨi iparaɨsu va'e oroiko viña, ore rumo oromondo katuño ite mba'e avɨye va'e ava eta upe; yepe ndoyavɨi ndorovɨrekoi ete mba'e viña, opakatuño ite rumo mba'e avɨye va'e Tüpä suindar oime oreu.

Ñeröisa ava tekwa Corintio pendar upe

¹¹ Che rɨvrɨ eta Corinto pendar, ore ñe'ësa pɨpe opakatu mba'e oromboyekwa peü; iyavei pe raɨsu agwä orovɨreko ore pɨ'a pɨpe tuvicha va'e pe rese.

¹² Ndore'äpɨsɨi pe rese pe raɨsu agwä; pe rumo egwë ndapeyei ore rese.

¹³ Che ni'ä opovɨreko che ra'ɨrɨ nungar; pemboyevɨ avei katu che pe raɨsusa cheu.

Peyepepɨ katu mba'e naporäi va'e sui

¹⁴ Ndapeyovaichoi chira ava Tüpä ndovɨroyai va'e rese. Esepia ¿oyoya pi'ä mba'e avɨye va'e mba'e naporäi va'e rese? ¿Anise avɨye pi'ä imboyoyasa tesapesa pɨ̇tümimbi va'e rese?

¹⁵ Nda'oyoyai ete ni'ä Cristo pɨ'a ñemoñetasa Karugwar pɨ'a ñemoñetasa rese yuvɨreko, ndoyoyai avei Cristo reroyasar pɨ'a ñemoñetasa ambuae reroyasare'ɨ̇sa rese yuvɨreko.

¹⁶ Nda'oyoyai chietera ni'ä mba'e ra'anga tëi Tüpä rëtä rese. Esepia yande ni'ä Tüpä oikove va'e rëtä nungar yaiko, a'e ni'ä aipo e'i Ikwachiaprɨ pɨpe araka'e:“Che aikovera seseve iyavei agwatara ipa'ü rupi yuvɨreko;che avei aikora Tüpä yuvɨreko chupea'e evokoiyase cheu narä yuvɨrekoira.”

¹⁷ Sese yande Yar aipo e'i avei:“Peyepepɨ evokoi nungar ava naporäi va'e sui;pepokoi rene mba'e naporäi va'e rese.A'ese che opopɨsɨra

¹⁸ iyavei che aikora pe Yesupa,pe evokoiyase peikora che ra'ɨrɨ che rayrɨ avei,aipo e'i yande Yar gweko pirätäsa pɨpe.”