2 Corintios 4 - Tüpä Ñe'ëngagwer

Jesucristo rekokwer mombe'usar yuvɨrekoi va'e

¹ Sese ndorekere'ɨ̇ iri ndoro'ei ete, esepia Tüpä ore poravo, ore paraɨsuerekosa pɨpe ore poravɨkɨ agwä ko ñe'ësa rese.

² Ore rumo oroseyapa opakatu mba'e tëi ore chïaisa, ndoromboyekwai va'e avei ore pɨ'a pɨpe sui; ndoroporombopa-mbopa tëi iyavei Tüpä ñe'ëngagwer ndorosekuñaröi ete. Ore rumo oroñe'ë tuprɨ mba'e supi tuprɨ va'e rese gweraño, egwë oro'e opakatu ava upe Tüpä rovai supiete katu te'i yuvɨreko opɨ'a pɨpe ore yapave.

³ Iyavei yavaise ko ñe'ësa pɨsɨrösa resendar ore remimombe'u rendukwa agwä, a'e egwë e'i ava okañɨ tëi va'erä upe a'e avɨye oyeovapɨ vɨte va'e.

⁴ Esepia a'e ndovɨroyai ete yuvɨreko, karugwar rerekwar ko ɨvɨ pɨpendar opa oyarakwa mokañɨ, ndosepiai va'erä tesapesa porañete va'e Cristo resendar yuvɨreko, esepia a'e Tüpä rekokwer mboyekwasar sekoi.

⁵ Ndiyai yande yeupe ae tëi ñe'ësa yamombe'u, iya rumo yamombe'u yande Yar Jesucristo rekokwer ite yaiko; esepia ore mbigwai nungar tëi oroiko peü Jesús raɨsupave.

⁶ Esepia Tüpä teite ombou tesapesa pɨ̇tümimbi va'e resape agwä, a'e avei osesape uka yande pɨ'a pɨpe, ichui yaikatura ambuae ava resape, iyavei yamboyekwara Tüpä porañetesa osesape va'erä Jesucristo rekokwer rese yaiko.

Yayeroyara Cristo rese yaikose paraɨsusa pɨpe

⁷ Ko ñe'ësa yareko va'e yande retekwer rese, inungar mba'emoinda ñaɨ'u apoprɨ, imboyekwa pɨrä evokoi pirätäsa ou va'e Tüpä sui a'e nda'ei ore suindar tëi ou va'e.

⁸ Yepe mba'e-mba'e tëi oime opakatu rupi oreu viña, oimeño ite rumo oresë agwä ichui; yepe orepɨ'añemoñeta mba'e tëi rese, ore pɨ'a ñemoñetasa avɨye va'e rumo ndoromokañɨi ete oreyesui.

⁹ Yepe ore reka tëi ore amotare'ɨ̇mbar yuvɨreko viña, Tüpä rumo ndore reyai ete; iyavei yepe ore reitɨ ore rekopɨ agwä yuvɨreko viña, ipɨpe sui rumo ndoremokañɨi ete yuvɨreko.

¹⁰ Opakatu ore gwatasa rupi rumo orovɨrekoño ite Jesús marä-marä tëi sereko agwer ore mano agwä oreyese, toyekwa avei sekokwer ore rese ore esave.

¹¹ Esepia ore rekove vɨteseve, imbogwaiprɨ oroiko ore mano agwä Jesús rese, egwë oro'e sekokwer mboyekwa agwä ore retekwer ndipokopɨi va'e rese.

¹² Evokoiyase ko ñe'ësa mombe'u pɨpe ore manosa ore ropeña, ipɨpe sui rumo pesopeña tekovesa apɨre'ɨ̇ va'e peiko seroyasa pɨpe.

¹³ Ikwachiaprɨ pɨpe aipo e'i: “Ayeroya ite Tüpä rese, ipɨpe sui avei añe'ë.” Egwë oro'e avei ore, sese oroyeroya ite, ichui avei oroñe'ë.

¹⁴ Esepia yaikwa ni'ä akoi Tüpä yande Yar Jesús ombogwerayevɨ va'e, yande mbogwerayevɨ aveira supive, ipare oyoya gwasu opakatu yande rerasora oyepɨri.

¹⁵ Ko opakatu mba'e tëi oime va'e oreu, peü mba'e avɨye agwä rese, tovɨreko katu Tüpä porovasasa yuvɨreko ore yapave; ipɨpe sui, avɨye ndeu te'i seta katu ava Tüpä upe imboeteisave yuvɨreko.

¹⁶ Sese orekere'ɨ̇ño ite mba'e apo oroiko peü. Yepe ore rete okañɨ pota tëi viña, ore rekokwer rumo Tüpä ombopɨasuño ite arɨ yakatu rupi.

¹⁷ Esepia ko mba'e oroiporara va'e ko ɨvɨ pɨpe, a'e egwë e'i raimi tëi va'e, ipare rumo opañora; a'e ichui rumo oimerä mba'e tuprɨ ɨvate katu va'e oreu ɨvave apɨre'ɨ̇ orovɨreko va'erä.

¹⁸ Sese ore ndorepɨ'añemoñeta atɨi chira ko ɨvɨ pɨpendar mba'e rese; ore rumo orepɨ'añemoñeta mba'e ɨva pendar ndayasepiai va'e rese, esepia ko mba'e yasepia va'e egwë e'i raimi tëi va'e; ko mba'e rumo ndayasepiai va'e, apɨre'ɨ̇ va'erä ite.