1 San Juan 4 - Tüpä Ñe'ëngagwer

Tüpä rese yeroyasa supiete va'e

¹ Che rɨvrɨ eta, anichira peroya opakatu Tüpä espíritu pɨpe añe'ë e'i va'e yuvɨreko, iyakatu rumo pe sekoa'ä ranera, supiete pi'ä espíritu Tüpä suindar ite egwë e'i pɨ'a pɨpe. Esepia setavai oporombo'e anga'u tëi va'e ogwata opakatu ɨvɨ rupi yuvɨreko.

² Ko rese peikwara ava Espíritu Tüpä suindar vɨreko va'e: Jesucristo ou opakatu gwete reseve e'ise, aipo e'i va'e vɨreko Espíritu Tüpä suindar ite.

³ Akoi aipo nde'i va'e rumo, ndovɨrekoi ete Espíritu Tüpä suindar oyese; a'e rumo vɨreko espíritu Cristo amotare'ɨ̇mbar tëi. Pesendu ni'ä ñe'ësa akoi yamotare'ɨ̇sar espíritu ou va'erä resendar, a'e kurïtëi sekoi ko ɨvɨ pɨpe.

⁴ Che ra'ɨreta, pe rumo Tüpä suindar peiko. Iyavei pesekopɨ ite akoi semirä tëi va'e, esepia Espíritu sekoi va'e pe rese, a'e ipirätä katu karugwar sui.

⁵ Evokoi ko ɨvɨ pɨpendar tëi yuvɨrekoi va'e; esepia oñe'ë mba'e ɨvɨ pɨpendar rese tëi yuvɨreko, iyavei ava supindar a'e ite oyapɨsaka iñe'ë rese yuvɨreko.

⁶ Yande rumo Tüpä suindar yaiko. Akoi oikwa va'e Tüpä oyapɨsaka yande ñe'ë rese yuvɨreko, akoi nda'ei va'e Tüpä ra'ɨrɨ, a'e yande ñe'ë ndosendu potai yuvɨreko. Sese yande yaikwara vɨreko va'e Espíritu supiete va'e, yaikwa aveira vɨreko va'e espíritu oporombopa tëi va'e.

Tüpä poroaɨsusa, oyekwa ite yande rese

⁷ Che rɨvrɨ eta, che rembiaɨsu, yayeaɨsu ñepëi-pëi, esepia yeaɨsusa Tüpä suindar. Opakatu osaɨsu va'e ava, a'e Tüpä ra'ɨrɨ, oikwa avei Tüpä yuvɨreko.

⁸ Akoi ndosaɨsui va'e ava, a'e ndoikwai Tüpä yuvɨreko. Esepia Tüpä yeaɨsusa sekoi.

⁹ Egwë e'i omboyekwa oporoaɨsusa yandeu. A'e ni'ä, ombou Gwa'ɨrɨ ñepëi va'e ko ɨvɨ pɨpe ichui yande rekove agwä.

¹⁰ Nda'ei yande rane yasaɨsu Tüpä, a'e rane rumo yande raɨsu iyavei ombou Gwa'ɨrɨ imano agwä yande angaipa repɨrä, a'e ni'ä poroaɨsusa supiete va'e.

¹¹ Che rɨvrɨ eta, che rembiaɨsu, egwë e'i Tüpä yande raɨsu, evokoiyase egwë ya'e aveira yande yayeaɨsu ñepëi-pëi yepi.

¹² Ndipoi ete ava osepia va'e Tüpä; yayeaɨsuse rumo Tüpä sekoi yande rese, iporoaɨsusa evokoiyase oime ite yande rese.

¹³ Tüpä ombou Espíritu yandeu, ipɨpe sui yaikwa sese yande reko, iyavei yaikwa a'e sekoise yande rese.

¹⁴ Orosepia oromombe'u avei, yande Ru ombou Gwa'ɨrɨ ava ɨvɨ pɨpendar pɨsɨrö agwä.

¹⁵ Akoi ava oikwa va'e Jesús Tüpä Ra'ɨrɨ sekoise, Tüpä rese ite sekoi, Tüpä evokoiyase sekoi sese.

¹⁶ Egwë ya'e ikwa, seroya tuprɨ agwä ko Tüpä yande raɨsusa. Tüpä ni'ä yeaɨsusa, akoi vɨreko va'e oporoaɨsusa, sekoi Tüpä rese, Tüpä avei sekoi sese.

¹⁷ Supiete yasaɨsuse yande rɨvrɨ eta, iyavei yarekose yande rekokwer inungar Jesucristo sekoi ko ɨvɨ pɨpe, ndayasɨkɨyei chietera yande Yar Jesús oyevɨse ou kuri opakatu mba'e rese porandu agwä ava upe ko ɨvɨ pɨpe.

¹⁸ Akoi yarekose poroaɨsusa ndipoi sɨkɨyesa yandeu. Poraɨsusa supi tuprɨ va'e oimese ndipoi chira sɨkɨyesa yandeu, egwë ya'ese opara sɨkɨyesa yandesui. Esepia kañɨsa sui oime sɨkɨyesa yandeu, sese akoi ava osɨkɨyeai va'e, ndoporoaɨsu tuprɨi ete.

¹⁹ Yɨpɨndar Tüpä yande raɨsu, sese kurïtëi yande avei yasaɨsu Tüpä.

²⁰ Amove ava aipo e'i tëi: “Che asaɨsu Tüpä”, a'e ramoseve rumo vɨroɨrö omboetasa Tüpä reroyasar, evokoiyase a'e semirä tëi va'e. Esepia akoi ndosaɨsui va'e omboetasa Tüpä reroyasar sepiase, ndoikatui Tüpä ndayasepiai va'e raɨsu agwä.

²¹ Jesucristo ombou ko porokwaita yandeu: akoi osaɨsu va'e Tüpä, tosaɨsu avei omboetasa yuvɨreko.