1 San Juan 3 - Tüpä Ñe'ëngagwer

¹ Esepia marä e'i rutei yande Ru Tüpä yande raɨsu, sese ava Tüpä ra'ɨrɨ e'i yuvɨreko yandeu, a'e ite ni'ä yaiko. Sese ko ɨvɨ pɨpendar ndayandekwai yuvɨreko, esepia ndoikwai avei Tüpä rekokwer yuvɨreko.

² Che rɨvrɨ eta kurïtëi yaiko ite Tüpä ra'ɨrɨ. Yande rumo ndayaikwa tuprɨ vɨtei yande reko agwä, yaikwa rumo akoi oyemboyekwase Jesucristo, a'ese yaikora inungar, a'ese avei yasepiara opakatu seko reseve.

³ Iyavei opakatu osärö va'e Jesucristo yuvɨreko, oyepepɨño ite opakatu angaipa sui gweko katuprɨ agwä inungar a'e sekoi.

⁴ Opakatu ava oyemboangaipa va'e, a'e oyapo ite mba'e naporäi va'e; esepia angaipa mba'e-mba'e tëi aposar ite yepi.

⁵ Pe rumo peikwa Jesucristo ou ko ɨvɨ pɨpe yande angaipagwer mokañɨ agwä, a'e ni'ä ndovɨrekoi ete angaipa oyese.

⁶ Opakatu ava yuvɨrekoi va'e Jesucristo rese, a'e ndiya iri oyemboangaipa va'erä yuvɨreko; iyavei opakatu oyemoangaipa va'e, ndosepiai ete ndoikwai avei sekokwer yuvɨreko.

⁷ Che ra'ɨreta, peyembopa uka eme ambuae ava upe, akoi oyapo va'e mba'e avɨye va'e yepi, a'e sekokwer avɨye va'e ite inungar Jesucristo;

⁸ akoi oyapo va'e angaipa a'e karugwar suindar, esepia karugwar yɨpɨsuive ite oyapo angaipa. Sese ou Tüpä Ra'ɨrɨ: karugwar rembiapo mokañɨpa agwä.

⁹ Opakatu yuvɨrekoi va'e Tüpä rese ndoyapoi angaipa, esepia vɨreko ite Tüpä rekokwer oyese yuvɨreko; sese ndoikatu iri angaipa apo agwä yuvɨreko, esepia a'e Tüpä ra'ɨrɨ ite yuvɨrekoi.

¹⁰ Ikwaprɨ ite Tüpä ra'ɨrɨ, ikwaprɨ avei karugwar ra'ɨrɨ yuvɨrekoi va'e, esepia akoi ndoyapoi va'e mba'e tuprɨ iyavei ndosaɨsui va'e Tüpä reroyasar, a'e nda'ei ete Tüpä ra'ɨrɨ yuvɨrekoi.

Mborokwaita yeaɨsusa resendar

¹¹ Ko ni'ä ñe'ësa pesendu va'e yɨpɨsuive: yayeaɨsura ñepëi-pëi yaiko.

¹² Ndayaikoi chira Caín nungar, a'e karugwar remimbo'e oyuka vɨvrɨ. ¿Ma'erä pi'ä oyuka? Esepia tɨvrɨ oyapo mba'e avɨye va'e, Caín rumo oyapo mba'e naporäi va'e.

¹³ Che rɨvrɨ eta, pepɨ'añemoñetai rene Tüpä ndoikwai va'e pe reroɨröse yuvɨreko.

¹⁴ Yande yaikwa ite opase ñañokwä yande ä kañɨ tëi agwer, kurïtëi rumo yasë evokoi nungar sui tekovesa apɨre'ɨ̇ va'e pɨpe yande reko agwä, esepia yande ni'ä yasaɨsu yande rɨvrɨ eta Tüpä rese yuvɨrekoi va'e. Akoi ndosaɨsui va'e rumo a'e i'ä okañɨ tëi vɨte ite yuvɨreko.

¹⁵ Opakatu ava ndoyambotai va'e yande rɨvrɨ, a'e iporapichi serai va'e nungar, pe rumo peikwa ava iporapichi serai va'e ndovɨrekoi tekovesa apɨre'ɨ̇ va'e oyese.

¹⁶ Yande rumo yaikwa ite poroaɨsusa, esepia Jesucristo omondo gwekokwer manosave yande repɨrä; egwë ya'e aveira yande ambuae yande rɨvrɨ eta rekokwer rese.

¹⁷ Akoi ava mba'e yar imba'e eta va'e iyavei osepia tëise ambuae paraɨsusa, nomondoi rumo mba'e ipane va'e chupe, ¿marä e'i pi'ä evokoiyase Tüpä poroaɨsusa rereko opɨ'a pɨpe?

¹⁸ Che ra'ɨreta, yande poroaɨsusa rumo nda'ei chira yande ñe'ë pɨpe tëi, iyakatu rumo yamboyekwara yande poropɨtɨ̇vɨïsa pɨpe.

¹⁹ Egwë ya'ese, yaikwa yande rekokwer supiete va'e pɨpe yaikose, a'ese yaikwa itera Tüpä rese yande ñemovɨräkwäsa;

²⁰ akoi yarekose yande pɨ'a ñemoñetasa kokotɨ tëi, Tüpä pɨ'a ñemoñetasa rumo ɨvate katu va'e ite yepi, iyavei oikwa ite opakatu mba'e.

²¹ Supiete che rɨvrɨ eta, yaikwa itese yande pɨ'a pɨpe yande reko tuprɨ agwä Tüpä rese, a'ese yayeroyaño itera sovai;

²² a'e avei ni'ä ombou opakatu mba'e yandeu yaporanduse chupe, esepia yamboyeroya iporokwaita iyavei yayapo semimbotar yaiko.

²³ Ko iporokwaita pɨpe omombe'u yaroya va'erä Ta'ɨrɨ Jesucristo, iyavei yayeaɨsura ñepëi-pëi Tüpä yande kwaisa rupi.

²⁴ Akoi vɨroya va'e Tüpä porokwaita, a'ese Tüpä sekoira opakatu rese. Ipɨpe sui yaikwara sekoise yande rese: ombou avei Espíritu yandeu.