1 San Juan 2 - Tüpä Ñe'ëngagwer

¹ Che ra'ɨreta, ko aikwachia peü pe angaipa e'ɨ̇ agwä. Yepe oime ava oyemboangaipa va'e pe pa'üve yuvɨreko viña, yareko rumo yande pɨtɨ̇vɨïsar yande Ru rovai. A'e Jesucristo seko ɨ̇vi va'e.

² Jesucristo oyemondo manosa pɨpe oime va'erä ñeröisa yande angaipagwer mokañɨ agwä; nda'ei yande angaipagwer rese gweraño, opakatu ava ɨvɨ pɨpendar upe avei.

Mborokwaita yeaɨsusa resendar

³ Akoi yamboyeroyase Tüpä porokwaita, a'ese yaikwa tuprɨ katura sekokwer avɨyesa.

⁴ Oime aipo e'i va'e amove: “Che aikwa Tüpä”, nomboavɨyei rumo iporokwaita, a'e semiräñeteai va'e, ndovɨrekoi mba'e supi tuprɨ va'e oyese.

⁵ Akoi yamboavɨyese iñe'ëngagwer, a'ese supiete yasaɨsu Tüpä, ipɨpe sui yaikwa yande reko tuprɨ Jesucristo rese.

⁶ akoi aiko tuprɨ Tüpä rese e'i va'e, a'e sekoira inungar Jesucristo.

⁷ Che rɨvrɨ eta, ndaikwachiai mborokwaita ambuae ipɨasu va'e peü: a'e mborokwaita pereko va'e yɨpɨsuive ite. Ko porokwaita araka'endar pesendu va'e peiko.

⁸ Iyavei ko aikwachia va'e mborokwaita peü ipɨasu va'e ite, a'e supiete tesapesa Cristo vɨreko va'e pereko va'e avei, esepia pɨ̇tümimbi va'e opara, tesapesa evokoiyase osesapera.

⁹ Oime amove ava che aiko tesapesave e'i tëi va'e; a'e rumo oyamotare'ɨ̇ño ambuae omboetasa Tüpä reroyasar, evokoi nungar rekokwer pɨ̇tümimbisave tëi vɨte sekoi.

¹⁰ Akoi osaɨsu va'e ambuae omboetasa Tüpä reroyasar, a'e sekoi tesapesa pɨpe, sese ndipoi chietera ombo'a uka va'e omboetasa angaipa pɨpe.

¹¹ Akoi ndoyambotai va'e omboetasa, a'e pɨ̇tümimbisa pɨpe tëi sekoi, ndoikwai avei kerupi gwekokwer vɨrekora, esepia pɨ̇tümimbi va'e nomboesapɨsoi sereko.

Poreroyasa supiete va'e

¹² Che ra'ɨreta, ko aikwachia peü narä, esepia Tüpä iñeröi pe angaipa rese peü Jesucristo rekokwer pɨpe.

¹³ Ko aikwachia peü, iyesupa eta peiko va'e, esepia peikwa yɨpɨsuive ite oikove va'e, aikwachia avei peü mbɨa chi'ïvä'e, esepia pesekopɨ ite karugwar.

¹⁴ Iyavei pe che ra'ɨreta aikwachia opakatu peü, esepia peikwa ni'ä yande Ru Tüpä. Aikwachia avei peü, pe iyesupa, esepia peikwa yɨpɨsuive ite oikove va'e. Aikwachia avei peü mbɨa chi'ïvä'e, esepia peyemovɨräkwä eteprɨ, peipɨsɨ avei Tüpä ñe'ëngagwer pe pɨ'a pɨpe, esepia ni'ä pesekopɨ avei karugwar.

¹⁵ Ani pesaɨsura mba'e ɨvɨ pɨpendar, ani chiaveira pesaɨsu ɨpɨpendar mba'e. Akoi osaɨsu va'e mba'e ɨvɨ pɨpendar tëi, a'e ndosaɨsui yande Ru Tüpä yuvɨreko;

¹⁶ esepia opakatu ko mba'e tëi nda'ei yande Ru Tüpä suindar, a'e rumo ko ɨvɨ pɨpendar tëi. Ko ni'ä omboyekwa ava rekokwer ɨvɨ pɨpendar: opakatu yande pɨ'añemoñeta raisa, yaipota va'e sese yama'ese, iyavei opakatu yande rembiereko rese yande yemboɨvateai tëisa.

¹⁷ Ko ɨvɨ pɨpendar ava opa itera okañɨ, mba'e tëi potaraisa aposa pɨpe; akoi ava oyapo va'e rumo Tüpä remimbotar, yuvɨrekoira apɨre'ɨ̇ va'erä ite.

¹⁸ Che ra'ɨreta, ko arɨ ipa va'e ite yandeu. Pesendu avei akoi ou va'erä Cristo amotare'ɨ̇mbar; esepia kurïtëi seta oyemboyekwa Cristo amotare'ɨ̇mbar yuvɨreko. Sese yaikwa arɨ ipa va'e yepota agwä.

¹⁹ A'e oyepepɨ yande pa'ü sui; nda'ei ete rumo yande rɨvrɨ yuvɨrekoi, esepia akoi yande rupindar ite yuvɨrekoise, a'ese opɨtara yande pɨri yuvɨreko viña. Egwë e'i oyekwa nda'eise opakatu yande rupindar yuvɨreko.

²⁰ Cristo, ndaseko maräi va'e omondo peü, Espíritu Maräne'ɨ̇, ipɨpe sui kurïtëi opakatu peikwa mba'e supi tuprɨ va'e.

²¹ Peikwa ni'ä ko mba'e supiete va'e, sese aikwachia ko peü, esepia peikwa ite evokoi nungar mba'e; peikwa avei mba'e nda'ei ou temirä sui tëi.

²² ¿Uma pi'ä semiräñeteai va'e? A'e akoi Jesús nda'ei Poropɨsɨrösar e'i va'e. A'e Cristo amotare'ɨ̇mbar yuvɨrekoi, esepia ndovɨroyai yande Ru Tüpä Ta'ɨrɨ avei yuvɨreko.

²³ Akoi ava ndovɨroyai va'e Tüpä Ra'ɨrɨ, ndovɨroyai avei yande Ru Tüpä; akoi vɨroya va'e Tüpä Ra'ɨrɨ, vɨroya avei yande Ru Tüpä.

²⁴ Sese, yɨpɨsuive pesendu va'e ñe'ësa peyapokatu pe pɨ'a pɨpe; egwë peyese peiko tuprɨra Jesucristo rese, yande Ru Tüpä rese avei.

²⁵ Esepia Jesucristo aipo e'i: Perekora ko tekovesa apɨre'ɨ̇ va'e peyese.

²⁶ Sese ko ava pembopa pota va'e resendar aikwachia peü.

²⁷ Pereko Espíritu Maräne'ɨ̇ Jesucristo ombou va'e peü, sese ndiyai ete ambuae pe mbo'era yuvɨreko, Espíritu ae pe mbo'e opakatu mba'e rese, iporombo'esa supiete ndoporombopai va'e, sese peikoño Cristo rese Espíritu Maräne'ɨ̇ pe mbo'esa rupi.

²⁸ Iyavei che ra'ɨreta peikoño ite Cristo rese, yareko va'erä yande yeroyasa sese, akoi ogweyɨse ɨva sui kuri, a'ese nañachi chietera sovai ichui.

Angaipa mokañɨsa resendar

²⁹ Pe ni'ä peikwa Jesucristo seko ɨ̇vi va'e, peikwa avei opakatu oyapo va'e mba'e i'ɨ̇vi va'e, a'e Tüpä ra'ɨrɨ ite yuvɨrekoi.