1 Corintios 8 - Tüpä Ñe'ëngagwer

Pɨ'a ñemoñetasa mba'ekwasa resendar

¹ Kurïtëi ambuae mba'e amombe'ura peü mba'e ra'anga upe mba'e mɨmba yukaprɨ seropove'ëprɨ rese. Supiete akoi aipo esa va'e: opakatu yareko yande mba'ekwasa supi va'e ite; mba'ekwasa pɨpe rumo yayeeko mboɨvateai tëi, poroaɨsusa pɨpe rumo yañepɨtɨ̇vɨï katu Cristo reroya tuprɨ agwä.

² Supiete akoi aikwa ite ko mba'e ya'e tëise mba'e upe, ipane vɨte ite rumo ikwa tuprɨ agwä yandeu.

³ Iyavei oimese ava osaɨsu va'e Tüpä, a'e ava oikwa ite Tüpä oyeupe narä sekoise.

⁴ Evokoiyase ko mba'e ra'anga upe tëi seropove'ëprɨ mba'e mɨmba yukaprɨ u agwä rese añe'ë, yande ni'ä yaikwa ko mba'e ra'anga egwë e'i tëi va'e ko ɨvɨ pɨpe, esepia oime ñepëi gweraño ite Tüpä.

⁵ Esepia yepe ava upe seta tüpä ɨvave ɨvɨve avei viña (seta iteanga ni'ä oime tüpä anga'u tëi, yar anga'u tëi avei),

⁶ yande rumo yaikwa ñepëiño ite Tüpä oime, a'e ni'ä yande Ru opakatu mba'e aposar. Evokoiyase yande chupe narä ite yaiko, oime avei yande Yar ñepëi va'e, a'e Jesucristo ichui oime opakatu mba'e, ichui avei yaikove.

⁷ Nda'ei opakatu oikwa mba'e supi va'e ite yuvɨreko. Oime ava ndasesarai vɨtei va'e oyerure agwä mba'e ra'anga upe tëi, yuvɨro'u vɨte avei mba'e ro'o seropove'ëprɨ mba'e ra'anga tüpä upe opɨ'a ñemoñetasa pɨpe yuvɨreko; iyavei ipɨ'a ñemoñetasa nipirätäise a'ese kokotɨ tëi vɨreko opɨ'a ñemoñetasa mba'e ra'anga rese yuvɨreko.

⁸ Supiete tembi'u ndayande pɨtɨ̇vɨï Tüpä rese yaiko va'erä; esepia ya'use mba'e ro'o nda'ei chira avɨye katu yaiko, iyavei ndaya'uise ndayaikoi chira mba'e tëi pɨpe.

⁹ Peü ni'ä avɨyeño ite pe'u va'erä viña; peikwa katura rumo, avɨyeteramo Jesús reroyasar ndoikatu tuprɨ vɨtei va'e pemboangaipa ukara.

¹⁰ Esepia pe ko mba'e peikwa va'e, pe'use ko tembi'u mba'e ra'anga upendar karusave a'e Jesús reroyasar rembiepiave, avɨyeteramo pemongere'ɨ̇ aveira i'u uka agwä chupe.

¹¹ Iyavei ko nde mba'ekwasa pɨpe, eremokañɨ uka yande rɨvrɨ Tüpä rese novɨräkwä tuprɨ vɨtei va'e eiko, Cristo rumo omano ipɨsɨrö agwä.

¹² Esepia pemomaräse Tüpä rese ipɨ'a ñemoñetasa, a'ese pe ae peyemboangaipa uka Cristo amotare'ɨ̇sa pɨpe peiko.

¹³ Sese yande mba'e ro'o usa pɨpe sui yamboangaipa ukase yande rɨvrɨ viña, ndaya'u iri chietera evokoi mba'e ro'o yande rɨvrɨ mboangaipa uka e'ɨ̇ agwä.