1 Corintios 6 - Tüpä Ñe'ëngagwer

Oime vavasa mborerekwar mba'e moigätusar ndiporeroyai va'e rovai

¹ Akoi oimese pe pa'ü pendar vɨreko va'e vavasa ambuae ava rese, ¿ma'erä evokoiyase peporandura mborerekwar ndiporeroyai va'e upe mba'e moigätu agwä, iya rumo peporandura mborerekwar Tüpä reroyasar upe?

² ¿Ndapeikwai vo peiko Tüpä reroyasar oporandu va'erä opakatu mba'e ava ɨvɨ pɨpendar rembiapo rese? Esepia pe ite ni'ä peporandura mba'e rese ko ɨvɨ pɨpendar upe, ¿ma'erä evokoiyase ndapeikatui ete tekokwer ndayavaimi va'e moigätu peiko?

³ ¿Ndapeikwai vo yande avei yaporandura mbigwai ɨva pendar rekokwer rese kuri? ¡Evokoiyase peporandu katu itera ko ɨvɨ pɨpendar tekokwer rese peyeupe yepi!

⁴ Perekose evokoi nungar mba'e tëi peyeupe, ¿ma'erä peiporu ava egwë e'i tëi va'e tüpäro pendar upe mba'e moigätu agwä?

⁵ Che aipo a'e ite peü pechï agwä: ¿Ndipoimi ete vo pe pa'üve ñepëi yarakwa va'e oikatu va'e, mba'e tëi peyeupendar moigätu agwä?

⁶ ¡Nda'ei pevava peyeupe gweraño! ¡Oime avei pe pa'ü pendar Tüpä reroyasar vɨraso ambuae omboetasa mborerekwar Tüpä reroyasare'ɨ̇ upe tëi mba'e moigätu agwä!

⁷ Supiete pe vavase pe yeope ae nda'ei ete mba'e avɨye va'e. ¿Ma'erä vo ndape ñemosaiño mba'e naporäi va'e upe? ¿Ma'erä toñomiño che mba'e yuvɨreko ndapeyei?

⁸ ¡Pe rumo peyapo ite, mba'e-mba'e tëi peñomi avei pe mboetasa eta mba'e peiko!

^9-10 ¿Ndapeikwai vo akoi ava mba'e-mba'e tëi aposar ndoyuvɨroikei chietera Tüpä mborerekwasa pɨpe kuri? Ndapeyembopa ukai chira, yemboagwasasa angaipa pɨpe iyavei oyerure va'e mba'e ra'anga upe tëi, oyemboagwasa tëi va'e, iyavei kuimba'e yuvɨrekoi va'e kuña rekokwer nungar pɨpe, iyavei kuimba'e yuvɨrekoi va'e oyese ae, iyavei mba'e ñomisar, iyavei ava nomombe'ui va'e mba'e supi, iyavei kagwar, iyavei ava iñe'ë-ñe'ë tëi va'e, iyavei ava imondarai va'e yuvɨreko, a'e ndoyuvɨroikei chietera Tüpä mborerekwasave kuri.

¹¹ Oime avei ni'ä akoi pe pa'ü pendar yɨpɨndar egwë e'i va'e yuvɨreko; kurïtëi rumo opa pe angaipa imokañɨsa pe sui iyavei pe ipe'aprɨ peiko Tüpä upe narä ite, a'e yande Yar Jesucristo rer pɨpe yande Ru Tüpä Espíritu pirätäsa pɨpe aveino.

Yande retekwer nda'ei yande yemboangaipa agwä tëi

¹² Oime pe pa'ü pendar aipo e'i va'e: “Che ayapora mba'e che remimbotar rupi ete.” Evokoi spiete, nda'ei rumo opakatu mba'e avɨye va'e. Che ayapo itera mba'e che remimbotar rupi ete, iyavei ndaikoi chira mba'e che rembiapo povrɨve tëi.

¹³ Aipo e'i avei yuvɨreko: “Tembi'u yande avɨter upe narä, iyavei yande avɨter evokoiyase yande rembi'u upe narä.” Evokoi spiete, Tüpä opara omokañɨ ñuvɨrïo mba'e evokoi nungar. Yande retekwer rumo ndikwaitai yagwasa tëi va'erä, a'e rumo yande Yar upe narä. Esepia yande retekwer nda'ei yemboagwasasa angaipa upe narä tëi, a'e yande Yar upe narä ite, iyavei yande Yar sekoi yande rete upe narä.

¹⁴ Inungar Tüpä ombogwerayevɨ yande Yar, egwë e'i aveira yande mbogwerayevɨ opirätäsa pɨpe koiye.

¹⁵ ¿Ndapeikwai vo pe retekwer Cristo retekwer rese sekoise? ¿Ndiyai ete evokoiyase Cristo upendar yande rete mondo agwä kuña gwetekwer omondo-mondo tëi va'e upe? ¡Ani nda'ei ete supi!

¹⁶ ¿Ndapeikwai vo akoi ñepëi ava oyemondose kuña oyemondo-mondo tëi va'e upe, a'e oyoya tuprɨ yuvɨrekoi ñepëi retekwer pɨpe? Esepia Ikwachiaprɨ pɨpe aipo e'i: “Ñuvɨrïo yuvɨrekoi va'e oyese a'e yuvɨrekoira inungar ñepëi ava.”

¹⁷ Akoi ava sekoi va'e rumo yande Yar rese, a'e sekokwer evokoiyase ñepëiño ite.

¹⁸ Peyepepɨ voiño katu ava yemboagwasa-gwasa tëisa sui. Opakatu ambuae angaipa nda'ei yande retekwer rese narä ite. Akoi ava oyapo tëi va'e mba'e kuña rese, gwetekwer ae evokoiyase omomarä katu gwembiapo pɨpe sui tëi.

¹⁹ ¿Ndapeikwai vo pe retekwer Espíritu Maräne'ɨ̇ upendar ite sekoise a'e Tüpä ombou va'e peü, iyavei Espíritu Maräne'ɨ̇ sekoi ete pe rese? Pe evokoiyase nda'ei ete pe retekwer yar peiko,

²⁰ esepia Tüpä yande rerokwa oyeupe narä. Sese peyapo mba'e avɨye va'e pe retekwer pɨpe Tüpä mboetei agwä.