1 Corintios 16 - Tüpä Ñe'ëngagwer

Porerekosa monu'äsa resendar

¹ Iyavei ko gwarepochi monu'ä agwä iparaɨsu va'e Jesús reroyasar upe narä, pe avei katu peyapo mba'e inungar che amombe'u Jesús reroyasar ɨvɨ Galacia rupindar upe.

² Domingo yakatu iya pe avei peipe'a voimi gwarepochi pe poravɨkɨ reprɨ sui yapokatu agwä, eipeve che yepotase, ndapeyemañeko iri chira gwarepochi monu'ä agwä rese peiko.

³ Evokoiyase akoi ayepotase eipeve vicho, amondora ava pe rembiporavo Jerusalén ve, che ñe'ë ikwachiaprɨ avei amondora chupe gwarepochi pe remimonu'ä reraso agwä yuvɨreko a'e pendar yuvɨrekoi va'e upe.

⁴ Avɨyeteramo iyase cheu, che avei asora a'eve, evokoiyase a'e yuvɨrasora che rupi.

Pablo ipɨ'añemoñeta ogwata agwä rese

⁵ Che sose, asora ɨvɨ Macedonia rupi; ipare Macedonia sui asora perepia Corinto ve.

⁶ Avɨyeteramo apɨta pukumira pe pɨri, anise iro'ɨ so'ɨ̇sa iteanga va'e che mombɨtañora pe pɨri; a'ese pe che pɨtɨ̇vɨïñomira peye eipeve sui ambuae tekwave che so agwä rese.

⁷ Ndaipotai che opoepia raimi tëi eipeve vicho, yande Yar rumo oipotase aiko puku itera pe pɨri;

⁸ che rumo kurïtëi apɨtaño vɨtera ko'ave Éfeso ve, asepia ranera Pentecostés pieta,

⁹ esepia oime ite yande Yar upe che poravɨkɨsa avɨye va'e ite ko'ave, yepe seta iteanga ava che amotare'ɨ̇mbar yuvɨrekoi viña.

¹⁰ Akoi Timoteo oyepotase oso pe pɨri, taseko tuprɨño ite pe pa'üve, esepia a'e avei oporavɨkɨ yande Yar upe narä oiko che nungar.

¹¹ Tipo eme ñepëi yepe sepia potae'ɨ̇sar yuvɨreko; iya rumo peipɨtɨ̇vɨï katura che pɨri iyepota tuprɨ agwä rese, esepia che iyavei ambuae Jesús reroyasar rese orosärö ite iyepota agwä oroiko.

¹² Yande rɨvrɨ Apolo upe, eso ambuae Jesús reroyasar pɨri Corinto ve a'e tëi. Kurïtëi rumo nikere'ɨ̇i oso pe repia, iyase chupe a'ese osora pe pɨri.

Pablo porokwaita resendar

¹³ Pema'emo'ä peyese, peyemovɨräkwä avei Jesús rese pe yeroyasa pɨpe, peñemosaño katu pe kwaita upe, peikoveño itera Tüpä pirätäsa pɨpe.

¹⁴ Opakatu mba'e peyapo pota va'e, peyapora pe poroaɨsusa pɨpe ite.

¹⁵ Che rɨvrɨ eta, peikwa Estéfanas opakatu gwëtä pendar reseve, a'e ranei yɨpɨndar ɨvɨ Acaya rupi vɨroya va'e ñe'ësa yande Yar resendar yuvɨreko, oyemondo avei ambuae Jesús reroyasar rese añeko tuprɨ agwä yuvɨreko no.

¹⁶ Evokoiyase che aipota peyemboyeroyara evokoi nungar ava rese iyavei opakatu ambuae yande Yar upe oporavɨkɨ va'e rese.

¹⁷ Avɨ'arete ite yugweruse che repia Estéfanas, Fortunato iyavei Acaico, esepia a'e oyapo ite pe ndapeikatu tuprɨi va'e apo yuvɨreko

¹⁸ a'e che mongere'ɨ̇ katu yuvɨreko, egwë e'i avei revo peü. Evokoi nungar ava pemboeteira peiko.

Pablo ma'endu'asa ipa va'e

¹⁹ Jesús reroyasar Asia pendar opakatu ombou oma'endu'asa yuvɨreko peü. Áquila, Prisca avei ima'endu'a iteanga yuvɨreko pe rese iyavei opakatu ambuae ava oñemonu'ä va'e sëtäve yuvɨreko, a'e avei ombou oma'endu'asa yande Yar rer pɨpe yuvɨreko peü.

²⁰ Opakatu Jesús reroyasar ko'a pendar avei omondo oma'endu'asa yuvɨreko peü. Peyapo katu ñepëi-pëi avɨrave yeovaupɨtesa pereko maräne'ɨ̇sa pɨpe.

²¹ Che Pablo, che po pɨpe ite aikwachia ko che ma'endu'asa imondo peü.

²² Akoi ava ndosaɨsui va'e yande Yar, ¡a'e tokañɨ Tüpä ñemoɨrösa pɨpe! ¡Ore Yar, eyevɨ voi katu eyu!

²³ Yande Yar Jesucristo porovasasa tasekoi opakatu pe rese.

²⁴ Peü amondo che poroaɨsusa opakatu Cristo Jesús rese yande rekosa pɨpe.