1 Corintios 1 - Tüpä Ñe'ëngagwer

Pablo ma'endu'asa Jesús reroyasar Corinto pendar upe

^1-2 Tüpä oiporavo Pablo yande Cristo Jesús ñe'ë mombe'usar sekoi agwä, a'e omondo oma'endu'asa oyoya tuprɨ yande rɨvrɨ Sóstenes reseve yuvɨreko, Corinto ve yuvɨrekoi va'e Tüpä reroyasar upe avei, yande Yar Cristo Jesús rer pɨpe sovasaprɨ iyavei iporavoprɨ tekwa maräne'ɨ̇ pɨpe narä, iyavei opakatu rupi osenoi va'e yande Yar Jesucristo rer yuvɨreko, a'e yande Yar sekoi opakatu tekwa maräne'ɨ̇ upendar avei.

³ Yande Ru Tüpä, yande Yar Jesucristo taperovasa pe reko tuprɨ agwä.

Jesucristo suindar porovasasa seroyasar upe

⁴ Che avɨye ndeu a'eño ite Tüpä upe pe rekokwer rese, esepia ni'ä Cristo Jesús rer pɨpe peikose Tüpä pe rovasa pe rereko yepi.

⁵ Egwë e'i sekokwer pɨpe sui Tüpä ombou opakatu pe reko tuprɨ katu agwä pemombe'u tuprɨ va'erä imba'ekwasa, opakatu mba'e supiete va'e kwa tuprɨ agwä avei,

⁶ esepia ko ñe'ësa avɨye va'e Cristo resendar a'e sekoi ete pe rese peñekuñarö agwä.

⁷ Ko pɨpe sui ni'ä nipanei ete Tüpä porovasasa pesärö va'e peiko yande Yar Jesucristo yevɨ agwä kuri.

⁸ Tüpä pe movɨräkwä ñoitera pe rereko oyepotase arɨ kañɨ kuri, a'ese ndipoi chietera ava oikatu va'e pemondo agwä mba'e-mba'e tëi pɨpe yande Yar Jesucristo yevɨse kuri.

⁹ Tüpä omboavɨye va'e ite oñe'ëngagwer yepi, ipɨpe sui yande yaiko sembiporavo Ta'ɨrɨ yande Yar Jesucristo rupi yagwata va'erä.

Jesús reroyasar pɨ'a ñemoñetasa nda'oyoyai va'e resendar

¹⁰ Che rɨvrɨ eta, yande Yar Jesucristo rer pɨpe aipo a'e peü pemboyoya katu pe pɨ'a ñemoñetasa, ndapeyemboya'oi chira peyesui. Peiko katu pe yeaɨsusa pɨpe, ichui ta'oyoya pe pɨ'a ñemoñetasa, ta'oyoya avei mba'e pe remimbotar.

¹¹ Ko aipo a'e peü che rɨvrɨ eta, esepia aikwa ite Cloe mu omombe'use yuvɨreko cheu peye ñemoɨrö-ɨröse peyeupe ae.

¹² Supiete aipo a'e, oime pe pa'üpendar aipo e'i va'e yuvɨreko: “Che aiko Pablo rupindar”; ambuae aipo e'i: “Che aiko Apolo rupindar”; aipo e'i avei ambuae: “Che aiko Pedro rupindar”; iyavei ambuae aipo e'i, “Che Cristo rupindar aiko.”

¹³ ¿Cristo pi'ä kokotɨ-kotɨ tëi ipɨ'añemoñeta oiko? ¿Pablo pi'ä yatɨkasa kurusu rese pe angaipa repɨrä? ¿Anise tie peapirämosa Pablo rer pɨpe?

¹⁴ ¡Avɨye Tüpä upe che ndopoapirämoise, Crispo iyavei Gayo, a'e gweraño rumo añapirämo yuvɨreko!

¹⁵ Sese ndipoi chietera ava che ñapirämoprɨ aiko serer pɨpe e'i va'e yuvɨreko.

¹⁶ Estéfanas rëtä pendar avei añapirämo yuvɨreko, ipare ndipo iri ete ambuae ava añapirämo va'e,

¹⁷ Cristo ndachekwai che poroapirämo agwä, a'e rumo che kwai amombe'u va'erä iñe'ëngagwer vichiko, iyavei nda'ei ñe'ësa yavai katu va'e aiporu, esepia nañomi potai ete ko ñe'ësa pirätägwer Cristo kurusu rese imano agwer resendar ava sui.

Tüpä mba'ekwasa iyavei ava mba'ekwasa

¹⁸ Esepia akoi ava okañɨ tëi va'erä upe ko ñe'ësa kurusu rese Cristo manosa resendar avɨye egwë e'i tëi va'e viña; yande ipɨsɨröprɨ yaiko va'erä upe rumo ko ñe'ësa vɨreko ite Tüpä pirätäsa.

¹⁹ Inungar Ikwachiaprɨ pɨpe aipo e'i:“Amokañɨrä imba'ekwa vai va'e sui imba'ekwasaiyavei arokwara ava yarakwa vai va'e sui yarakwasa.”

²⁰ ¿Kevo pi'ä opɨta ava imba'ekwa vai va'e mba'ekwasa, iyavei porokwaita rese oporombo'e va'e arakwasa, iyavei oikwapa va'e mba'e ko ɨvɨ pɨpendar moigätu? ¡Tüpä opa ite osekuñarö ava mba'ekwasa egwë e'i tëi va'e ko ɨvɨ pɨpendar!

²¹ Supiete ko ɨvɨ pɨpendar ndoiporui ete omba'ekwasa oikwa va'erä Tüpä yuvɨreko a'e rumo omboyekwa ite omba'ekwasa, Tüpä evokoiyase oipɨsɨröra ñe'ësa avɨye va'e rupi oyese yeroyasar kuri, yepe ko ñe'ësa avɨye va'e ndoyavɨi egwë e'i tëi va'e viña.

²² Judío osepia pota ite mba'e poromondɨisa yuvɨreko, griego evokoiyase osendu pota tëi ñe'ësa arakwasa resendar yuvɨreko;

²³ yande rumo yamombe'u ite ñepëi Poropɨsɨrösa atɨka agwer kurusu rese yaiko. Ko ñe'ësa nda'ei ete avɨye va'e judío eta pɨ'a rupi, iyavei ava nda'ei va'e judío upe ko ñe'ësa osenduse avɨye akoi egwë e'i tëi va'e yuvɨreko chupe;

²⁴ akoi Tüpä oiporavo va'e, judío eta anise griego yuvɨrekoi va'e, ko Poropɨsɨrösar sekoi Tüpä pirätäsa imba'ekwasa avei.

²⁵ Esepia Tüpä mba'ekwasa ava upe avɨye egwë e'i tëi va'e, iyavei Tüpä reko mbegwesa ipirätä katu opakatu ava pirätäsa sui.

Corinto pendar rekokwer

²⁶ Che rɨvrɨ eta, peyemoma'endu'a katu Tüpä pe poravo agwer rese, yepe pe pa'ü pendar ndasetaimi imba'ekwa vai va'e ava rovake yuvɨreko viña, ndasetaimi avei pereko pe mu seko ɨvate va'e pe pa'üve.

²⁷ Tüpä oiporavo ko ɨvɨ pɨpendar ava remiambotare'ɨ̇, ava imba'ekwa vai va'e mochi agwä; oiporavo avei ava seko mbegwemi va'e ava seko ɨvate katu va'e mochi agwä.

²⁸ Tüpä oiporavo avei ko ɨvɨ pɨpe ava remieroɨrö seko mbegwemi va'e, ava seko ɨvɨ kotɨ katu va'e pe pa'ü pendar ko ava seko ɨvate va'e reroyɨ agwä.

²⁹ Ko oimese ndipoi chietera ava oyeeko mboɨvateai va'e Tüpä rovai.

³⁰ Tüpä ite ni'ä opa pe mboyemboya Cristo Jesús rese, iyavei Cristo vɨreko uka yande mba'ekwa agwä, yande reko tuprɨ agwä, yande rekokwer rovasa agwä iyavei ndayaiko iri va'erä mba'e-mba'e tëi pɨpe.

³¹ Inungar ko aipo e'i Ikwachiaprɨ pɨpe: “Akoi ava oyeekomboɨvateai pota va'e, toyeekomboɨvate katu yande Yar rembiapo rese.”