Tito 2 - Tüpä Ñe'ëngagwer

Porombo'esa tekwa pendar uve narä

¹ Nde aipo ere va'e toyoya tuprɨ ko porombo'esa nimaräi va'e rese yepi.

² Ko ava otɨ̇arö katu va'e toñearö tuprɨ, imboyeroyaprɨ toyuvɨrekoi; toñearö tuprɨ avei gwekokwer pɨpe, oporaɨsusa opirätäsa pɨpe oipɨsɨ mba'e tasɨ va'e.

³ Egwë e'i tuprɨ aveira, kuña otɨ̇arö va'e vɨrekora gweko katuprɨsa, ndosavaɨpoi chiaveira. Omboyekwara gwekokwer avɨye va'e

⁴ ombo'era kuñatäi imer raɨsu agwä imembrɨ raɨsu agwä avei,

⁵ oyapora mba'e avɨye va'e, ikatuprɨ va'e avei, tosärö tuprɨ omembrɨ sereko, toipotarai avei omer, evokoiyase ndipoichira oñe'ërai va'e Tüpä ñe'ëngagwer rese yuvɨreko.

⁶ Emongere'ɨ̇ avei chi'ïvä'e kwer mba'e apo tuprɨ agwä

⁷ opakatu rese ite, emondo avei nde mba'e kwasa marä e'ira mba'e apo tuprɨ yuvɨreko. Erembo'e aveira mba'e apo tuprɨ, emoyekwa ndereko tuprɨsa iyavei nde poromboeteisa,

⁸ ereñe'ëra mba'e tuprɨ rese, ndipoichira nde mongɨ'a va'e yuvɨreko. A'ese yuvɨnochira ndesui, evokoiyase ndoikatu iri chira oñe'ërai yuvɨreko yande rese.

⁹ Emboarakwa avei mbigwai yuvɨrekoi va'e tovɨroya opakatu mba'e rese gwerekwar; tomboyeroya imboeteisave toiñe'ë poepɨ eme avei yuvɨreko.

¹⁰ Timonda eme yuvɨreko, iyakatu rumo seroyaprɨ tuprɨ yuvɨrekoira, evokoiyase opakatu osepiase seko tuprɨsa omboeteira yande Pɨsɨrösar Tüpä rekokwer yembo'esa yuvɨreko.

¹¹ Tüpä omboyekwa poroaɨsusa yandeu, a'e gweru pɨsɨrösa opakatu ava upe.

¹² Ko poroaɨsusa Tüpä suindar yande mbo'e mba'e-mba'e tëi sui yande rekuñarö agwä iyavei yande remimbotar sui tëi, iyavei yande reraso ko tenonde kotɨ yande rekokwer ñearö tuprɨ pɨpe, yande reko ɨ̇vi agwä iyavei yande reraso tekokwer avɨye va'e pɨpe yaiko va'ëra,

¹³ yasärö yande vɨ'aretesa pɨpe imombe'uprɨ sekoi va'e: oyevɨse kuri vɨ'aretesa yande Yar Tüpä iyavei Pɨsɨrösar Jesucristo.

¹⁴ A'e oyemondo mano pɨpe yande rekokwer rese, opakatu mba'e naporäi va'e sui iyavei yande moatɨrö tuprɨ, evokoiyase yaikora sekwa pɨpe chupe narä gweraño ite, yande kere'ɨ̇save opakatu mba'e avɨye va'e apo agwä.

¹⁵ Evokoi rese erembo'era, eremongere'ɨ̇ra eremboarakwa aveira opakatu nde porokwaita pɨpe. Sese tipo eme nde reroɨrösar.