Santiago 4 - Tüpä Ñe'ëngagwer

Ko ɨvɨ pɨpendar mba'e raɨsusa

¹ ¿Kesui pi'ä ou vavasa iyavei ñe'ëpoepɨ-epɨsa pe pa'üve? A'e ou pe mba'e pota raisa sui pereko va'e pe pɨ'a ñemoñetasa pɨpe.

² Peipotarai mba'e, ipare rumo ndapeikatui sereko agwä; evokoiyase peporoyuka pe mba'e pota raisa pɨpe, ndiyai ete rumo peü sereko agwä. Ipɨpe sui peyeekoa'ä, pevava aveino. Ndapeyosɨi ete rumo mba'e pe remimbotar, esepia ndapeporandui Tüpä upe;

³ akoi peporanduse rumo sese, ndapeipɨsɨi ete esepia peporandu rai tëi sese, peipota peyembovɨ'a agwä rese narä tëi.

⁴ ¡Pe mbɨa, peyavɨ va'e pe rekokwer! ¿Ndapeikwai vo akoi ava Tüpä kwapare'ɨ̇ mborɨpar tëi yuvɨrekoi va'e, a'e Tüpä amotare'ɨ̇mbar yuvɨrekoi? Egwë e'i ete akoi oipota va'e ko ɨvɨ pɨpendar mba'e-mba'e tëi pɨpe gweko agwä, a'e oyeapo Tüpä amotare'ɨ̇mbar.

⁵ Sese ni'ä Ikwachiaprɨ pɨpe aipo e'i: “Tüpä oporoaɨsu gwekate'ɨ̇sa pɨpe Espíritu omondo va'e yande pɨ'a pɨpe.”

⁶ Tüpä rumo yande pɨtɨ̇vɨï katu oporoaɨsusa pɨpe, esepia Ikwachiaprɨ araka'endar pɨpe aipo e'i: “Tüpä oyamotare'ɨ̇ ava oyeekomboɨvateai va'e, oipɨtɨ̇vɨï rumo seko mbegwe va'e saɨsusave.”

⁷ Sese pemboyeroya katu Tüpä. Peyemovɨräkwä karugwar remimbotar apoe'ɨ̇ agwä, a'ese a'e oyepepɨra pe sui.

⁸ Peyemboya Tüpä rese, a'e evokoiyase oyemboyara pe rese. ¡Peñemoatɨrö mba'e peyapo va'e sui! ¡Iyavei pemoatɨrö pe pɨ'a ñemoñetasa, pesaɨsu pota va'e Tüpä a'e pɨpe avei pesaɨsu mba'e ko ɨvɨ pɨpendar!

⁹ ¡Tatasɨ peü, tapeyase'o, pe rorɨvete iri eme! ¡Pemboasɨ pe angaipa pe yembovɨ'are'ɨ̇save!

¹⁰ Peñemominira yande Yar rovai imboyeroyasa pɨpe, a'e evokoiyase pe reko mboɨvatera.

¹¹ Che rɨvrɨ eta, anichira peñe'ë marä peyeupe. Akoi oñe'ërai va'e iyavei vɨroɨrö va'e ambuae Jesús reroyasar, a'e oñe'ërai tëi aveira mborokwaita rese seroɨrösave. Egwë peyese, evokoiyase seroya e'ɨ̇sa pɨpe peyemboɨvate katura mborokwaita sui viña.

¹² Oime rumo ñepëiño ite ombou va'e mborokwaita yandeu iyavei oporandu va'e yande rekokwer rese. A'e gweraño avei oikatu oporopɨsɨrö iyavei oporomokañɨ agwä no; nde evokoiyase, ¿uma vo ereiko ereporandu va'erä ava rekokwer rese?

Ndayayapoi chira mba'e yandereko ɨvateaisa pɨpe

¹³ Pesendu aipo peye va'e: “Ko arɨ pɨpe anise ayi'ive yasora tekwave, anise tekwa gwasuve, a'eve yaikora ñepëi aravɨter yande poravɨkɨ agwä, a'ese yaipɨsɨ katura gwarepochi”,

¹⁴ ¡ndapeikwai rumo mba'e oime va'erä peü ayi'ive! Perekokwer rumo inungar ɨvɨchï oyekwa raimi tëi ipare opaño okañɨ.

¹⁵ Iyakatu aipo peyera viña: “Oipotase yande Yar yande reko agwä, yayapora ko nungar mba'e, anise ambuae mba'e.”

¹⁶ Pe rumo peñe'ëño pe yemboɨvateaisa pɨpe mba'e pe rembiaporä rese; opakatu evokoi nungar mba'e rumo naporäi.

¹⁷ Akoi oikwa tuprɨ va'e mba'e apo agwä, ipare rumo ndoyapoi ete, a'e oyapo angaipa.