Santiago 3 - Tüpä Ñe'ëngagwer

Yande ñe'ë resendar

¹ Che rɨvrɨ eta, anichira pe pa'üve oime seta iteanga oporombo'e va'e yuvɨreko, esepia peikwa ni'ä yande oporombo'e va'e yaikose, Tüpä oporandu itera ambuae ava sui yande porombo'e agwer rese yandeu kuri.

² Opakatu ite oime mba'e yande rembiavɨ naporäi va'e yepi; oimese ñepëi ava ndoyavɨi va'e oñe'ë, a'e ava seko ɨ̇vi tuprɨ va'e, oikwa avei opakatu gwekokwer rereko tuprɨ agwä.

³ Inungar akoi yamondose kavayu yuru penda sese serogwata agwä, a'ese opakatu kavayu retekwer yaikatu imboya'uva agwä.

⁴ Inungar tuprɨ avei ɨarusu, yepe tuvicha iyavei yepe ɨvɨtu omoañɨi opirätägwer pɨpe viña, serovasa ra'ɨmi pɨpe rumo serogwatasar omo'ɨ̇vi-ɨ̇viño seraso gwemimbotar rupi.

⁵ Egwë e'i avei yande apëku, yepe ta'ɨmi tëi viña, ipɨpe rumo yayapo ite mba'e tuvicha va'e ava upe, ¡Inungar avei tata chi'ïmi va'e sui tëi yuvɨ gwasu opa okai!

⁶ Egwë e'i yande ñe'ësa tata nungar. Iyavei yande apëku pɨpe opakatu mba'e-mba'e tëi yamombe'u, evokoi mba'e-mba'e tëi mombe'usar yande resendar ite, a'e amove ovɨreko marä opakatu yande rekokwer. Inungar tata ova-ova va'e mba'e rese. Evokoi yande ñe'ë tëisa karugwar suindar.

⁷ Ava oikatu ite opakatu mba'e mɨmba mboarakwa agwä, vɨräi, mboi avei mba'e ɨpɨ paragwasu pɨpendar aveino;

⁸ ndipoi ete rumo ava oipoepɨ va'erä oñe'ë. Iyavei yande ndayaikatui ete ipoepɨ agwä, yande ñe'ësa oporoyuka va'e nungar ite yepi.

⁹ Ko yande apëku pɨpe yamboetei yande Yar Tüpä, ipɨpe avei rumo yamomarä ava, a'e ava rumo Tüpä oyapo onungar tuprɨ ite.

¹⁰ Egwë e'i ete, yande ñe'ë pɨpe yamboetei Tüpä, ipɨpe avei yaroɨrö ava. Che rɨvrɨ eta, ndiyai evokoi nungar mba'e yayapo yepi.

¹¹ Oikatura pi'ä osë ñepëi ɨ o'ë va'e sui së'e va'e, iro va'e avei viña.

¹² I'ara pi'ä higuera ɨvɨra rese aceituna viña iyavei oikatura pi'ä uva ɨ rese o'a higo viña no ani ndoikatui ete, iyavei ndoikatui ñepëi ɨ o'ë va'e sui osë ɨ, së'e va'e së'e asɨ va'e reseve.

Mba'ekwasa supiete va'e

¹³ Akoi oimese pe pa'üve yarakwa va'e oyapɨsaka va'e avei, tomboyekwa katu gweko katuprɨsa, gweko mbegwesa avei omba'ekwa tuprɨsa pɨpe.

¹⁴ Oimese rumo pe pɨ'ave pe poroamotare'ɨ̇sa mba'e pota raisa pɨpe, iyavei peyeupe narä tëi mba'e peseka, a'ese ndiyai peyembovɨ'a tuprɨ tëi che yarakwa va'e aiko pe yapave, esepia peremirä tëira supiete va'e mba'e rese.

¹⁵ Esepia ko mba'ekwasa nda'ei ete Tüpä sui ou va'e, a'e mba'ekwasa rumo ko ɨvɨ pɨpendar tëi, ava pɨ'añemoñeta sui tëi osë va'e karugwar suindar tëi avei.

¹⁶ Oimese poreroɨrösa iyavei poroamotare'ɨ̇sa mba'e potaraisa pɨpe, a'eve avei oime opakatu mba'e naporäi va'e;

¹⁷ akoi vɨreko va'e rumo Tüpä suindar arakwasa, a'e vɨreko itera opakatu ava rovake gweko maräne'ɨ̇sa iyavei sekoira gweko mbegwesa pɨpe; a'e ndaseko asɨi chiaveira. Iyavei oyemoigätu voi va'e, a'e oporoparaɨsuereko va'e, nomboyoavɨratɨi va'e gwekokwer, a'e ipɨ'a ñemoñetasa ñepëi reseve va'e iyavei oyapo tuprɨ va'e mba'e.

¹⁸ Iyavei akoi oseka va'e mba'e tuprɨ yepi, oipɨsɨra opɨ'a pɨpe teko ɨ̇visa.