Santiago 1 - Tüpä Ñe'ëngagwer

Ma'endu'asa resendar

¹ Che Santiago, Tüpä, yande Yar Jesucristo rembigwai aiko, amondo che ma'endu'asa opayandepo yovaive ñuvɨrïo yuvɨrekoi va'e Israel ɨgwar opakatu ɨvɨ rupi oñemosaï va'e upe.

Yemovɨräkwäsa tekoa'äsa resendar

² Che rɨvrɨ eta, pevɨ'areteñora peiko akoi oimese tekoa'äsa peü yepi.

³ Esepia peikwa ni'ä pe poreroyasa rese, oimese mba'e tekoa'äsa, a'e ipɨpe peyembo'e pe ñemosa agwä rese peiko.

⁴ Peikoño ite pe reko ñemosasa pɨpe pe reko mo'ɨ̇vi tuprɨ katu agwä, evokoiyase nipane iri chira opakatu mba'e peü.

⁵ Iyavei akoi ipanese pe pa'ü pendar upe yarakwa agwä, toporandu Tüpä upe, evokoiyase a'e omboura chupe; esepia Tüpä opakatu upe mba'e ombou gwekate'ɨ̇sa pɨpe iyavei omba'e mboasɨ e'ɨ̇sa pɨpe avei.

⁶ Iyakatu rumo evokoi ava oporandura Tüpä upe sese oyeroya pɨpe, nda'ei chira opɨ'añemoñeta rerova-rova tëisa pɨpe; esepia akoi ava ipɨ'a ñemoñeta kokotɨ-kotɨ va'e, a'e inungar paragwasu pɨpe ɨvɨtu ombo'ɨtu-ɨtu tëi va'e ɨ sereko.

⁷ Akoi egwë e'i-e'i tëi va'e ava ndoipɨsɨi chira mba'e yande Yar sui yuvɨreko,

⁸ esepia ñepëi arɨ ipɨ'añemoñeta ñepëi mba'e rese, ambuae arɨ ambuae rese, ndoyemovɨräkwäi gweko tuprɨ agwä rese yuvɨreko.

⁹ Iyavei Jesús reroyasar seko mbegwemi va'e toyembovɨ'areteño yepi Tüpä oseko ɨvatesa rese;

¹⁰ iyavei mba'e yar sekoi va'e pe pa'üve toyembovɨ'a vɨteño Tüpä vɨroyɨse seko ɨvatesa sui. Esepia mba'e yar yuvɨrekoi inungar ka'a potrɨ ndasekosei va'e.

¹¹ Iyavei akoi arɨ osëse saku iteanga ou, a'ese ka'a opa ipiru, ipotrɨ avei opa ovɨapi ichui, iyavei iporañetesa opa ichui. Egwë e'i aveira ava mba'e yar omanora oporavɨkɨsa sui.

¹² Akoi ava oyemovɨräkwä va'e poroätoisa upe oyembovɨ'ara oiko, esepia osasa tuprɨse evokoi poroätoisa, oipɨsɨra porerekosa, a'e tekovesa apɨre'ɨ̇ va'e Tüpä ombou va'e gwaɨsupar upe.

¹³ Akoi ava oyanduse poroätoisa oyeupe mba'e tëi apo agwä, Tüpä revo egwë e'i cheu nde'i chira, esepia Tüpä ndoyapoi ete poroätoisa naporäi va'e, iyavei nomondo ukai ete ava mba'e tëi apo agwä.

¹⁴ Ko rumo, ava opɨ'añemoñeta rai upe oñeatoi uka mba'e tëi apo agwä yepi.

¹⁵ Ava mba'e potaraisa sui oime angaipa; evokoiyase angaipa aposa pɨpe ou manosa yandeu.

¹⁶ Che rɨvrɨ eta, che rembiaɨsu, peyembopai rene katu:

¹⁷ esepia opakatu imbouprɨ mba'e avɨye va'e yandeu, a'e ou Tüpä sui ete, a'e ni'ä opakatu ɨva rese mba'e aposar. Nda'ei rumo gwembiapo nungar sekoi esepia Tüpä noñekuñaröi va'e ite.

¹⁸ A'e rumo ombou tekovesa yandeu ko ñe'ësa supiete va'e pɨpe, toyuvɨrekoi inungar yɨpɨndar mba'e mitɨ̇ a seropove'ëprɨ cheu opakatu che rembiapo sui o'esave yandeu.

Yamboyeroyara Tüpä ñe'ëngagwer

¹⁹ Iyavei che rɨvrɨ eta, che rembiaɨsu, peyemoma'endu'a ko che ñe'ë rese: peyapɨsaka tuprɨ voira ambuae ava ñe'ë rese, mbegwe rupi rumo peñe'ëra chupe iyavei ndapemba'emboasɨ voi tëi chira.

²⁰ Esepia akoi ava oñemoɨrö va'e, ndoyapoi ete mba'e avɨye va'e Tüpä remimbotar.

²¹ Evokoiyase peseya teko raisa, opakatu ambuae oime va'e mba'e naporäi va'e pe pa'üve, ko katu pe yemominisave peroya vɨte katu Tüpä ñe'ë omoinge va'e pe pɨ'a pɨpe, a'e ni'ä vɨreko pirätäsa pe pɨsɨrö agwä.

²² Nda'ei pesenduño tëira ko ñe'ësa avɨye va'e; iya rumo peyapora mba'e ko ñe'ësa remimbotar rupi ete, esepia egwë peyese pe ae tëi peyembopara peiko.

²³ Supiete akoi ava osenduño tëise ñe'ësa avɨye va'e, ipare rumo ndovɨroyai ete, inungar akoi ava osepiaño tëi va'e vova yepiasa pɨpe;

²⁴ oyeepia pare rumo, kurïtëimi sesaraiño gwepiaka sui.

²⁵ Akoi ndasesarai va'e ñe'ësa avɨye va'e sui, iyavei oyapɨsaka tuprɨ va'e ko mborokwaita maräne'ɨ̇ mba'e-mba'e tëi sui yande rerokwa va'e rese, iyavei oyemovɨräkwäño ite va'e oyapo va'erä iporokwaita, a'e ovɨ'aretera opakatu gwembiapo tuprɨ rese.

²⁶ Amove akoi ava che agwata tuprɨ Tüpä rupi e'i tëi va'e, ndoikwai rumo oñe'ë mongiriri agwä, evokoiyase a'e ae oyembopa oiko, sembieroya evokoiyase egwë e'i tëi va'e.

²⁷ Yarekose rumo yande rembieroya nimaräi va'e yande Ru Tüpä rovai: a'ese yaipɨtɨ̇vɨïra ndiyesupai va'e iyavei kuña imer mano va'ekwer iparaɨsusa rese, ndayayapoi chiaveira mba'e ɨvɨ pɨpendar ñaporäi va'e rembiapo nungar.