Romanos 9 - Tüpä Ñe'ëngagwer

Tüpä oiporavo Israel oyeupe narä

¹ Che Cristo reroyasar che reko pɨpe supiete añe'ë, ndopombopai ete. Iyavei Espíritu Maräne'ɨ̇ oikwa ite, che pɨ'añemoñetasa arekose supiete va'e:

² ndavɨ'ai ete che pɨ'a pɨpe iyavei oime mba'e tasɨ va'e cheu yepi,

³ supiete che aikopota mba'e naporäi va'e pɨpe, ayepepɨ pota avei Cristo sui, a'ese tie revo aipɨtɨ̇vɨïra che rɨvrɨ eta, opakatu che mu eta che rekwa pendar.

⁴ A'e Israel suindar yuvɨrekoi, iyavei Tüpä oiporavo va'e gwa'ɨrɨ nungar sereko. Tüpä sekoi ipa'üve gwendɨgwer porañetesa pɨpe, omondo avei oñe'ë teko tuprɨsa resendar chupe, iyavei Moisés porokwaita, yeruresa iyavei mba'e seropove'ëpɨ̇ra chupe.

⁵ A'e avei yuvɨrekoi yande ramoi araka'endar sui; ichui ou va'e, a'e Poropɨsɨrösar, a'e Tüpä sekoi opakatu mba'e ɨvɨ pendar yar, imboeteiprɨ katu tasekoi yepi. Amén.

⁶ Tüpä nomboavɨyei Israel upe oñe'ë imombe'uprɨ ndapeyei chira; esepia nda'ei ete Israel suindar opakatu tekwa yuvɨrekoi va'e Israel ɨvɨ rupindar.

⁷ Iyavei nda'ei opakatu Abraham suindar ta'ɨrɨ supi tuprɨ va'e yuvɨrekoi, esepia Tüpä aipo e'i chupe: “Nde ra'ɨrɨ Isaac sui rumo oimerä ndesuindar sovasaprɨ kuri.”

⁸ Ko rumo osendukwa uka yandeu nda'ei Abraham suindar yuvɨnosë va'eño Tüpä ra'ɨrɨ yuvɨrekoi, Tüpä ra'ɨrɨ yuvɨrekoi opakatu iñe'ë reroyasar a'e ichuindar ite yuvɨrekoi yepi.

⁹ Esepia Tüpä aipo e'i Abraham upe araka'e: “Ko arɨ rupi avei ayevɨra kuri, a'ese oimerä ñepëi Sara membrɨ.”

¹⁰ Nda'ei rumo evokoi gweraño opakatu mba'e sembiapo. Esepia Rebeca membrɨ yuvɨrekoi va'e ñepëi va'e ite iyesupa, a'e yande ramoi Isaac araka'endar,

^11-13 iyavei a'e ndoyuvɨro'a vɨteise, ndoyapo vɨteise mba'e avɨye va'e, naporäi va'e yuvɨreko, Tüpä aipo e'i ichɨ Rebeca upe: “Yɨpɨndar o'a va'e nde membrɨ a'e omboyeroyara ipandar.” Ko oyoya ite Ikwachiaprɨ rese akoi aipo e'i va'e: “Che asaɨsu ite Jacob Esaú rumo añamotare'ɨ̇.” Egwë e'i Tüpä ava poravo gwemimbotar rupi, nda'ei seko avɨye va'e rese.

¹⁴ ¿Evokoiyase ndasekoporäi ya'era pi'ä Tüpä upe? ¡Ani nda'ei ete supi!

¹⁵ Esepia Tüpä aipo e'i Moisés upe: “Aiparaɨsuerekora che remimbotar rupi, asaɨsu aveira che remimbotar rupi sereko.”

¹⁶ Supiete, nda'ei yande remimbotar rupi tëi, nda'ei avei yande pirätäsa rupi Tüpä oyapo mba'e, a'e rumo oporoparaɨsuerekosa pɨpe mba'e oyapo yandeu.

¹⁷ Supiete Tüpä Ikwachiaprɨ pɨpe aipo e'i mborerekwar ɨvate katu va'e Egipto pendar upe: “Che oromoinge uka mborerekwar nde reko agwä che pirätäsa mboyekwa agwä nde rese, che rer mboetei agwä avei opakatu ava upe ko ɨvɨ pɨpe.”

¹⁸ Egwë e'i oporoparaɨsuereko gwemimbotar rupi, gwemimbotar rupi avei omboavai vɨroya agwä ava upe.

¹⁹ Aipo e'ira yuvɨreko cheu: “Egwë e'ise, ¿marä vo Tüpä naporäi ava e'ira viña, esepia ndipoi ete ani e'i va'erä Tüpä upe yuvɨreko?”

²⁰ Iyavei nde mbɨa, ¿uma nde ereiko ereporandu va'erä mba'e rese Tüpä upe? ¿Oporandura pi'ä ñaɨ'u apoprɨ mba'emoinda oaposar upe: “Ma'erä vo na'ere che apo eve?

²¹ Ñaɨ'u rese oporavɨkɨ va'e rumo gwemimbotar rupi oyapora mba'e yuvɨreko sese, iyavei a'e ñaɨ'u sui oikatu ite mba'emoinda ikatuprɨ va'e apo oikatu avei ambuae iporupɨrä tëi apo agwä.

²² Tüpä, omboyekwa pota ite oñemoɨrösa opirätäsa avei, ipɨpe sui oñemosaño ite oiko ava imokañpɨrä upe.

²³ Egwë e'i avei yapo gwemimbotar rupi gweko porañetesa ɨvate va'e mboyekwa agwä yandeu. Esepia, yande paraɨsuereko iyavei yɨpɨsuive teko orɨ porañetesa omoigätu yandeu a'eve yande reike agwä.

²⁴ Yande avei yande renoi oyeupe, judío anise nda'ei va'e judío yande rekose.”

²⁵ Esepia Oseas rembikwachiagwer pɨpe aipo e'i: “Akoi ava nda'ei va'e cherupindar, chupe añe'ëra; iyavei akoi ava nda'ei va'e saɨsuprɨ yuvɨrekoi, chupe che rembiaɨsu ite a'era.

²⁶ A'eve tuprɨ avei akoi imombe'usa peü: ‘Pe nda'ei va'e che rupindar peiko’, a'e chupe Tüpä oikove va'e ra'ɨrɨ ite esara.”

²⁷ Isaías rumo aipo e'i Israel pendar upe: “Yepe Israel suindar seta iteangara yuvɨreko viña inungar ɨvɨ ku'i paragwasu popɨ rupindar, movɨrö tëi rumo oñepɨsɨröra yuvɨreko,

²⁸ esepia yande Yar omboavɨye voira oñe'ë ava vɨroyasare'ɨ̇ mokañɨ agwä ko ɨvɨ pɨpe.”

²⁹ Inungar Isaías ombe'u va'ekwer yɨpɨndar aipo e'i va'e: “Yande Yar seko pirätä katu va'e noipɨsɨröise movɨrö yande ramoi yandeu, yakañɨpa tëira viña inungar tekwa gwasu Sodoma iyavei Gomorra reseve yuvɨreko.”

³⁰ ¿Marä ya'era vo evokoiyase chupe? Ava ndiporeroyai va'e, Tüpä rumo ipɨ'añemoñeta tuprɨse opa ite oseko mo'ɨ̇vi sereko, yepe ndosekai gweko katuprɨ agwä yuvɨreko viña.

³¹ Israel ɨgwar yuvɨrekoi va'e rumo, porokwaita mboyeroya pɨpe viña, ndoikatui ete rumo supitɨ yuvɨreko.

³² ¿Ma'erä pi'ä? Ndoyuvɨrekoi poreroyasa pɨpe, esepia a'e yuvɨrekoi pota gwemimbotar rupi tëi. Sese oyepɨapi yuvɨreko “ita yepɨapisa rese”

³³ aipo e'i Ikwachiaprɨ pɨpe: “Che amondo Sión ve ñepëi ita a'e ita rese oyepɨapira yuvɨreko; akoi sese oyeroya va'e rumo, a'e nimbopasai chietera.”