Romanos 7 - Tüpä Ñe'ëngagwer

Mendasa sui yembo'esa

¹ Che rɨvrɨ eta, pe ni'ä peikwa tuprɨ porokwaita, peikwa avei a'e porokwaita povrɨveño ite opakatu yaiko yaikove vɨtese ko ɨvɨ pɨpe.

² Esepia inungar kuña omenda va'e, imer oikove vɨtese, iporokwaitavrɨve vɨteño ite sekoi; omanose rumo imer ichui, a'e kuña nda'e iri omer porokwaitavrɨve sekoi.

³ Akoi kuña omer rekove vɨteseve, vɨrekose ambuae kuimba'e, oyemboagwasa tëi evokoiyase; akoi omanose rumo imer ichui, ndaseko iri ipovrɨve, a'e iyakatu ite omenda yupagwe iri a'ese nda'ei yagwasa tëi.

⁴ Che rɨvrɨ eta, pe ni'ä egwë peye avei Cristo rese; Cristo manosa sui nda'e iri porokwaitavrɨve peiko Cristo rese peiko agwä, a'e ni'ä akoi okwerayevɨ va'e, sese yande rekokwer egwë nde'i tëi va'e Tüpä upe.

⁵ Esepia yande yaikove vɨtese angaipa pɨpe, a'e porokwaita renduse yaipota katu mba'e tëi pɨpe yande reko agwä, ipare rumo a'e manosave tëi yande reraso.

⁶ Kurïtëi rumo yande omano va'e nungar yaiko akoi porokwaita pɨpe yaiko va'ekwer sui, egwë ya'e, yasë ichui Tüpä upe mba'e apo agwä Espíritu sui yande reko pɨasu pɨpe, nda'e iri porokwaita ikwachiaprɨ yɨpɨndar va'e pɨpe yaiko.

Angaipa oime va'e oiporu tëi porokwaita

⁷ ¿Ko sui pi'ä porokwaita angaipa tëi ya'era? ¡Ani ete nda'ei ete supi! Ko rumo ndaikwai chietera che angaipa porokwaita ndipoise viña. Supiete che ndaikwaise, “Ndapeipotarai chira ambuae ava mba'e.” e'i va'e mborokwaita pɨpe, a'ese ndaikwai chira che mba'e pota raisa viña.

⁸ Aikwase mborokwaita, a'ese angaipa ipirätä katu cheu. A'e mborokwaita apo potae'ɨ̇sa pɨpe che kere'ɨ̇ katu opakatu che remimbotarai tëi apo agwä, esepia mborokwaita pore'ɨ̇ angaipa avɨye ndipoi va'e viña.

⁹ Yɨpɨndar porokwaita ndaikwa vɨteise, ndoyavɨi avɨye va'e ite che rekokwer areko va'e viña; porokwaita aikwase rumo, aipotarai angaipa apo agwä,

¹⁰ che evokoiyase akañɨ tëi va'erä aiko ipɨpe. A'e porokwaita che rekove apɨre'ɨ̇ agwä mbou rägwer sui, che mondo ukaño itera manosa apɨre'ɨ̇ va'e pɨpe,

¹¹ esepia angaipa a'e porokwaita pɨpe che mbopa ite, a'e porokwaita pɨpe avei aiko manosa pɨpe tëi.

¹² Evokoiyase ko porokwaita ndaseko maräi va'e ite, supi tuprɨ va'e ite, avɨye va'e avei.

¹³ Evokoiyase, ¿ko porokwaita avɨye va'e pi'ä che rereko manosa tëi? ¡Ani nda'ei ete supi! Angaipa tëi rumo egwë e'i che rereko, evokoiyase ko porokwaita kwasa sui oipota katu uka mba'e tëi apo agwä cheu. Ipɨpe aikwa angaipa oime va'e che rese, egwë e'i avei a'e porokwaita omboyekwa tuprɨ ite angaipa mba'e tëi va'e yandeu.

¹⁴ Yaikwa ni'ä porokwaita Tüpä suindar, che rumo ava tëi imondoprɨ aiko angaipa mboyeroya agwä.

¹⁵ Che rumo ndaikwai mba'e che rembiapo, esepia che ndayapoi mba'e aipota va'e, ayapo rumo mba'e nda'ei va'e che remimbotar.

¹⁶ Che rumo ayapose mba'e a'e ndayapo potai va'e ite, a'ese aikwa ko porokwaita avɨye va'e.

¹⁷ Evokoiyase nda'ei cheyesui ete egwë a'e, angaipa tëi rumo egwë e'i che mbo'e uka.

¹⁸ Esepia che aikwa ndipoi ete mba'e avɨye va'e che rekoai rese; sese che ayapo pota ite mba'e avɨye va'e viña, ndaikatui ete rumo yapo.

¹⁹ Ndayapoi rumo mba'e avɨye va'e che remimbotar rupi, ayapo rumo mba'e napörai va'e nda'ei va'e che remimbotar.

²⁰ Supiete kurïtëi, ayapo vɨtese mba'e naporäi va'e, nda'ei rumo che ite ayapo, che pɨ'a pɨpe angaipa oime va'e, a'e tëi rumo oyapo uka cheu.

²¹ Sese che aikwa oime che kwaisar che rese, esepia ayapo potase mba'e avɨye va'e yepi a'e rumo oyapo uka ite mba'e naporäi va'e cheu.

²² Che pɨ'a pɨpe rumo Tüpä porokwaita aipota ite sereko,

²³ che rumo aikwa che pɨ'a pɨpe oime ndoipotai va'e mba'e tuprɨ apo agwä cheu: a'e porokwaita angaipa suindar, a'e sekoi va'e che rese iyavei che rereko mbigwai nungar tëi.

²⁴ ¡Che paraɨsu ite! ¿Uma pi'ä che renosera manosa povrɨ sui viña?

²⁵ Tüpä gweraño ite, a'e chupe avɨye a'erä yande Yar Jesucristo rer pɨpe. Tüpä porokwaita amboavɨye pota viña, che remimbotarai tëi rumo che rereko uka angaipa povrɨve.