Romanos 4 - Tüpä Ñe'ëngagwer

Abraham poreroyasa resendar

¹ Evokoiyase, ¿Yande ramoi Abraham, mba'e pi'ä oipɨsɨ araka'e?

² Akoi Abraham mba'e gwembiapo pɨpe sui tëi oipɨsɨse gweko tuprɨ agwä, a'e oyemboɨvateaira oiko ipɨpe viña, ndiyai ete rumo egwë e'i Tüpä rovake.

³ Esepia Ikwachiaprɨ araka'endar pɨpe aipo e'i: “Abraham vɨroya ite Tüpä, sese Tüpä oikwa uka seko ɨ̇vi katuprɨsa.”

⁴ Kurïtëi rumo, yande yayapose mboravɨkɨ, a'e yaipɨsɨ va'e nda'ei porerekosa tëi, a'e rumo mboravɨkɨ reprɨ ite yaipɨsɨ.

⁵ Oime rumo, Tüpä vɨroya va'e, a'e akoi angaipa rerekosar rekokwer moigätusar sekoi, Tüpä evokoiyase iporeroyasa pɨpe oseko mbokatuprɨra, yepe ndoyapoi chira mba'e avɨye va'e chupe viña.

⁶ David avei oñe'ë ava rorɨvetesa rese Tüpä seko katuprɨ va'e nungar pɨsɨsa rese, a'e rumo nda'ei mba'e sembiapokwer rese tëi oipɨsɨ.

⁷ David aipo e'i: “¡Sorɨvetera ava Tüpä iñeröise yangaipa rese chupe, iyavei yangaipa rese ndoyemoma'endu'a iri chietera!

⁸ ¡Sorɨvete aveira ava yande Yar ndoyemoma'endu'a irise yangaipa rese chupe!”

⁹ ¿Ko torɨvetesa pi'ä ava imbocircuncidaprɨ upe gweraño, anise ava nimbocircuncidaiprɨ upe avei tie? Supiete akoi aipo ya'e Tüpä oikwa ite Abraham seko katuprɨse oyese reroyasa pɨpe.

¹⁰ ¿Maräse pi'ä oipɨsɨ oyeupe narä sereko? ¿Abraham yembocircuncida renondeve pi'ä, anise ipare tie? Ani nda'ei ete ipare, senondeve ite egwë e'i.

¹¹ Ipare ramo Abraham oyembocircuncida, inungar Tüpä oikwa uka iporeroyasa pɨpe mba'e seko katuprɨsa rese. Sese Abraham ou opakatu ava vɨroyasar yesupa, yepe ndoyembocircuncidai va'e avei, egwë e'i avei Tüpä ko seko katuprɨ va'e yuvɨrekoi va'e upe.

¹² Iyavei yande ramoi Abraham opakatu ava oyembocircuncida va'e, Tüpä rese vɨreko va'e yeroyasa yesupa avei sekoi, Abraham rumo vɨreko ite yeroyasa Tüpä rese ndoyembocircuncida vɨtei e'ɨ̇ seve.

Tüpä remimombe'u imboavɨyesara sese yeroyasa pɨpe

¹³ Esepia Tüpä aipo e'i Abraham upe, ichuindar upe avei peipɨsɨra opakatu ko ɨvɨ pe ma'erä, nda'ei porokwaita mboyeroya pɨpe egwë e'i chupe, oyese yeroyasa pɨpe sui ete egwë e'i sereko.

¹⁴ Supietese ko porokwaita mboyeroyasar gweraño oipɨsɨse ko mba'e oime va'erä chupe viña, evokoiyase yande yeroyasa Tüpä rese egwë e'i tëietera Tüpä remimombe'ugwer evokoiyase egwë e'i tëi va'e aveira viña no.

¹⁵ Esepia ko porokwaita mboavɨye e'ɨ̇sa pɨpe ñemoɨrösa oime ava upe, ndipoise rumo mborokwaita, ndipoi chietera a'e porokwaita mboyeroya e'ɨ̇sa.

¹⁶ Sese, mba'e Tüpä remimombe'ugwer porerekosa yaipɨsɨra sese yande yeroyasa pɨpe, a'e semimombe'ugwer supi tuprɨ va'e opakatu yande Abraham suindar upe narä. Esepia nda'ei porokwaita mboyeroyasar upe gweraño, a'e rumo opakatu yande Abraham nungar Tüpä rese oyeroya va'e upe narä. Evokoiyase a'e opakatu yande ramoi sekoi,

¹⁷ inungar Ikwachiaprɨ pɨpe aipo e'i: “Orombou ava eta ɨvɨ rupindar yesupära.” Ko Tüpä ni'ä Abraham rembieroya, a'e Tüpä avei omondo va'e tekovesa omano va'ekwer upe iyavei oyapo va'e mba'e ndipoi va'e yɨpɨndar.

¹⁸ Yepe yavai ete seroya agwä viña, Abraham rumo vɨroya ite osärö avei oiko; egwë e'i kurïtëi “opakatu ava ɨvɨ pɨpendar yesupa sekoi”, Oyapo ite Tüpä ñe'ë remimombe'ugwer rupi: “Na e'ira seta yuvɨnosë ava ndesuindar kuri.”

¹⁹ Abraham rumo ndasesarai ete oyeroya tuprɨsa sui, yepe vɨreko pota ite cien aravɨter viña, iyavei oikwa ite oyoya okwakwami gwembireko Sara reseve yuvɨreko, iyavei okwakwa-kwakwami ete gwa'ɨ agwä yuvɨreko.

²⁰ Ndopoi ete Tüpä oyeupe ñe'ësa reroyasa sui, ipɨpe sui oyeroya katu ite oyese. Omboetei avei Tüpä oiko,

²¹ supiete Tüpä vɨreko opirätäsa opakatu oñe'ëngagwer mboavɨye agwä.

²² Sese Tüpä, ko seko katuprɨ va'e sekoi e'i iyeroyasa rese chupe.

²³ Iyavei Tüpä ko rese oikwa uka, sese ndikwachiasai ñe'ësa Abraham rekokwer resendar gweraño;

²⁴ yande resendar avei ni'ä ikwachiasa. Esepia Tüpä oikwa ite yande yeroyasa, supiete yaroyase yande Yar Jesús ombogwerayevɨse sereko,

²⁵ a'e imondoprɨ ite manosa pɨpe yande angaipa repɨrä, ipare okwera yevɨ yande pɨsɨ agwä seko katuprɨ va'e nungar oyeupe.