Romanos 15 - Tüpä Ñe'ëngagwer

Gwatasara Cristo rembiapokwer rupi

¹ Yande yayemovɨräkwä katu va'e Cristo rese yande yeroyasa pɨpe, iyakatu yande teiete yañemosañora ava Tüpä rese ndipɨ'añemoñeta tuprɨ vɨtei va'e rese, nda'ei chira rumo yande ae tëi yayembovɨ'a.

² Opakatu yande yambovɨ'ara ava yande kotɨndar, yayapo aveira mba'e avɨye va'e seko avɨye agwä yuvɨreko.

³ Esepia Cristo nda'ei a'e ae tëi oyemo'äpɨsɨ oiko; a'e rumo oyapo mba'e Ikwachiaprɨ mombe'usa rupi tuprɨ ite: “Nde rese ñe'ë-ñe'ë tëi opa che aipɨsɨ.”

⁴ Supiete opakatu omombe'u va'e araka'e Ikwachiaprɨ pɨpe, a'e ikwachiasa yande mbo'e agwä.

⁵ Iyavei Tüpä ni'ä ombou ñemosasa poromongere'ɨ̇sa, pepɨtɨ̇vɨï va'erä peiko tuprɨ agwä ñepëi-pëi peyese, inungar Cristo Jesús rembiapokwer rupi,

⁶ ipɨpe sui opakatu oyoya gwasu ñepëi pe pɨ'anemoñetasa pɨpe, tapemboetei Tüpä, yande Yar Jesucristo Yesupa.

⁷ Peyeaɨsu tuprɨ ñepëi-pëi, inungar Cristo peraɨsu oyeupe narä pe rereko, Tüpä mboetei agwä.

⁸ Che rumo aipo a'e peü Cristo ou judío pɨtɨ̇vɨï Tüpä remimombe'ugwer mboavɨye agwä judío ramoi araka'endar upe, egwë e'i Tüpä oñe'ë mboavɨyesa mboyekwa.

⁹ Ou avei ava nda'ei va'e judío upe omboetei va'erä Tüpä yuvɨreko iporoparaɨsuerekosa rese, esepia Ikwachiaprɨ pɨpe aipo e'i ete: “Sese che oromboeteira opakatu tekwa ɨvɨ rupindar pɨpe iyavei asapukaira nde rer mboeteisave.”

¹⁰ Ambuae Ikwachiaprɨ pɨpe aipo e'i: “¡Peyembovɨ'a opakatu tekwa ɨvɨ pɨpendar, tekwa Tüpä rembiporavo rese!”

¹¹ Ambuae pɨpe avei aipo e'i: “Opakatu ɨvɨ pɨpendar peiko va'e, ¡pemboetei yande Yar sereko!”

¹² Isaías avei aipo e'i ikwachia: “Oimerä ñepëi ava osë va'e Jesé sui, a'e sekoira opakatu ava rerekwarä ɨvɨ pɨpe, sese opakatu ava oyeroyara yuvɨreko.”

¹³ Tüpä ite ni'ä ombou va'e oyesuindar rärö agwä, a'ese peikora vɨ'aretesa pɨpe sese peyerosa pɨpe, iyavei tombou poroarösa Espíritu Maräne'ɨ̇ pirätäsa pɨpe peü.

Pablo sekoi oporavɨkɨsa pɨpe inungar Jesús ñe'ë mombe'usar

¹⁴ Che rɨvrɨ eta, ayeroya ite pe reko avɨyesa rese, esepia opakatu mba'e peikwapa tuprɨ ite, peikatu avei pe ñepëi-pëi peyeupe pe yemboarakwa agwä;

¹⁵ ko tekokwer rese rumo aikwachia opakatu che sɨkɨye e'ɨ̇sa pɨpe peü pe resarai e'ɨ̇ agwä ichui. Esepia ayapo Tüpä che kwaita ombou va'e che raɨsusa pɨpe cheu,

¹⁶ Jesucristo rese che poravɨkɨ agwä ava nda'ei va'e judío rekokwer avɨye agwä. Evokoiyase judío pa'i nungar che kwaisa pɨpe amombe'u ko ñe'ësa Tüpä ombou va'e pɨsɨrösa resendar yuvɨreko chupe imopore'ɨ̇ agwä Tüpä rovai inungar mba'e seropove'ëprɨ avɨye va'e Tüpä upe Espíritu Maräne'ɨ̇ pɨpe yepi.

¹⁷ Supiete che Cristo Jesús reroyasar che rekosa pɨpe avɨ'arete Tüpä che kwaita rese,

¹⁸ esepia cheu ndiyai añe'ë va'erä ambuae mba'e rese, ko mba'e Cristo oyapo uka va'e cheu ava nda'ei va'e judío rekokwer rese, seseño ite iyakatu cheu añe'ë va'erä, esepia amongere'ɨ̇ Tüpä reroya agwä yuvɨreko che ñe'ë rese, che rembiapo sui avei,

¹⁹ egwë a'e poromondɨisa mba'e yavai va'e apo Tüpä pirätäsa pɨpe. A'e ayapo Espíritu Tüpä suindar pirätäsa pɨpe. A'e ichui che amboavɨye ñe'ësa Cristo resendar mombe'u vichiko, tekwa Jerusalén sui tuprɨ agwata opakatu rupi, ayepota ɨvɨ Iliria ve aveino.

²⁰ Che kere'ɨ̇ avei ko ñe'ësa pɨsɨrösa resendar mombe'u agwä ava Cristo rekokwer ndosendui va'e upe yepi, nda'ei rumo ambuae ava imboarakwa pare tëi,

²¹ inungar Ikwachiaprɨ pɨpe omombe'u va'e: “Ava ndoikwai va'e ite osepiara yuvɨreko kuri; akoi ndosendui va'e, osendukwa tuprɨ aveira sekokwer yuvɨreko kuri.”

Pablo ipɨ'añemoñeta Roma ve oso agwä

²² Ko rese tëi che ndaikatui aso va'erä pe pɨri, yepe seta rupi aso pota tëi viña.

²³ Kurïtëi rumo opa amboavɨye che poravɨkɨ ko ɨvɨ rupi, iyavei opa tëi seta aravɨter pe pɨri che sosa rägwer,

²⁴ asose España ve apɨtara vicho pe pɨri. Iyavei che opoepia pare, aikora rumo movɨrö arɨ tëi pe rese, che pɨtɨ̇vɨïra peye peikatugwer rupi che yepota agwä che so save.

²⁵ Kurïtëi rumo che asora Jerusalén ve, arasora porerekosa a'e pendar Jesús reroyasar pɨtɨ̇vɨï agwä.

²⁶ Esepia ɨvɨ Macedonia pendar iyavei Acaya pendar Jesús reroyasar, a'e omonu'ä gwarepochi yuvɨreko Jerusalén ve yande rɨvrɨ iparaɨsu va'e pɨtɨ̇vɨï agwä.

²⁷ A'e egwë e'i gwemimbotar rupi yuvɨreko iyavei iya ite imboyevɨ agwä yuvɨreko chupe a'e mba'e tuprɨ oyeupe apo agwer rese, esepia yɨpɨndar Jesús reroyasar judío yuvɨrekoi va'e oikwa uka ko tekokwer Tüpä suindar a'e ava nda'ei va'e judío yuvɨrekoi va'e upe, sese iya ite imboyevɨ agwä ko ɨvɨ pɨpendar porerekosa chupe.

²⁸ Opase che amondo porerekosa yuvɨreko chupe, España ve che sose, a'ese apɨtara vicho pe pɨri.

²⁹ Che amo'ä voi ete asose eipeve, tuvicha omboura Cristo oporovasasa yandeu.

³⁰ Che rɨvrɨ eta, yande Yar Jesucristo rer pɨpe iyavei yeaɨsusa Espíritu ombou va'e pɨpe avei, aporandu peü opakatu che rese peyerure pirätä va'erä Tüpä upe che pɨtɨ̇vɨï agwä ko mboravɨkɨ rese.

³¹ Peporandu Tüpä upe tache repɨ ava Jesús reroyasare'ɨ̇ sui ɨvɨ Judea ve, iyavei Jerusalén pendar yande rɨvrɨ eta ko porerekosa pɨsɨ tuprɨ agwä avei,

³² Tüpä oipotase, che ayepotara vɨ'aretesa pɨpe pe repia agwä, iyavei apɨtu'ura pe pɨri asose.

³³ Egwë te'i Tüpä gweko tuprɨsa pɨpe tasekoi opakatu pe rese yepi. Amén.