Romanos 13 - Tüpä Ñe'ëngagwer

¹ Opakatu mborerekwar yuvɨrekoi va'e pemboyeroyara. Esepia ndipoi mborerekwar ndovɨrekoi va'e okwaita Tüpä suindar, ko oime va'e rumo semimbou ite.

² Sese akoi mborerekwar upe marä e'i va'e, Tüpä porokwaita reroya e'ɨ̇sar yuvɨrekoi. Egwë e'i va'e inupambrɨ yuvɨrekoira;

³ esepia mborerekwareta nda'ei ava seko tuprɨ va'e mbosɨkɨye agwä yuvɨrekoi, a'e rumo yuvɨrekoi ava mba'e tëi aposar mbosɨkɨye agwä. ¿Ereiko pota vo sɨkɨye e'ɨ̇sa pɨpe mborerekwar sui? Eiko mba'e tuprɨ pɨpe, a'ese mborerekwar nde reroyara yuvɨreko,

⁴ esepia a'e Tüpä rembigwai mba'e tuprɨ apo agwä sekoi. Akoi mba'e tëi yayapose rumo, yasɨkɨyera ichui; esepia a'ese mborerekwar yande nupaño itera yuvɨreko, a'e ni'ä Tüpä remimbotar rupi ete ikwaita ava mba'e tëi aposar nupa agwä yuvɨreko.

⁵ Sese iya yamboyeroya ite mborerekwar, nda'ei rumo a'e yande nupa e'ɨ̇ agwä reseño, yande pɨ'añemoñetasa momarä e'ɨ̇ agwä rese avei.

⁶ Sese pe avei pemondo gwarepochi; esepia mborerekwar yuvɨrekoi va'e Tüpä porokwaita rupi oporavɨkɨ, evokoiyase a'eño ite iporavɨkɨsa yuvɨreko.

⁷ Pemondo ñepëi-pëi ava upe mba'e chupendar. Akoi ndapemboepɨ vɨtei va'e upe, pemboepɨ chupe; pemondo aveira gwarepochi mborerekwar upe; pemboetei aveira, ava imboyeroyaprɨ; iyavei akoi pesaɨsuse ava, pesaɨsu ñoitera sereko.

⁸ Anichira ereñamotare'ɨ̇ ava nde mba'e potaraisa pɨpe, nde poroamotare'ɨ̇sa pɨpe sui rumo eresaɨsura ambuae ava nde yeaɨsu nungar sereko, a'ese eremboavɨyera opakatu porokwaita remimombe'ugwer.

⁹ Tüpä porokwaita aipo e'i: “Ndapeyemboagwasai chira, ndapeporoyukai chira, ndapemondai chira, ndaperemiräi chira, ndapeipotarai chiaveira ambuae ava mba'e”; ko iyavei opakatu ambuae Tüpä porokwaita sendusa tuprɨ ite ko ambuae ñe'ësa rese: “Pesaɨsu ava pe yeaɨsu nungar.”

¹⁰ Akoi vɨreko va'e oporoaɨsusa a'e ndoyapoi ete mba'e naporäi va'e ava upe; a'ese porokwaita imboavɨyesara poroaɨsusa pɨpe.

¹¹ Iyavei peikwa tuprɨ ko mba'e oime va'e yandeu, kurïtëi arɨ osupitɨ ite yande yemopoäse agwä. Esepia yande ñepɨsɨrösa köimi ete sekoi yɨpɨndar va'e sui, yaroyase iñe'ëngagwer sereko.

¹² Supiete osupitɨ senimi arɨ yandeu, sese iyakatu yapoi pɨ̇tümimbi va'e nungar mba'e-mba'e tëi aposa sui mba'e ikatuprɨ va'e pɨpe yande reko agwä; evokoiyase tayaiko sundao oyoepɨsa omonde va'e nungar pɨpe.

¹³ Yande katu yagwata yande reko ɨ̇vi tuprɨsa pɨpe, inungar yagwatase arɨ pɨpe. Ani yaikora kagwar pɨpe tëi iyavei pietasa rupi, ndayaikoi chira poropota raisa pɨpe, iyavei ndayayapoi chira mba'e naporäi va'e, ndayaikoi chiaveira yande pɨ'añemoñeta nda'oyoyai va'e pɨpe iyavei ndayaroɨröi chira ava imba'e rese sereko.

¹⁴ Iya rumo, perekora yande Yar Jesucristo rekokwer peyese, anichira pe pɨ'añemoñeta mba'e-mba'e tëi apo agwä pe remimbotarai pɨpe tëi.