Romanos 11 - Tüpä Ñe'ëngagwer

Tüpä omoigätu mba'e oime va'erä

¹ Kurïtëi che aporandu: ¿Oyerova pi'ä Tüpä gwekwa sui? ¡Ani nda'ei ete supi! Esepia che avei ni'ä aiko Israel pendar, Abraham ni'ä che ramoi ete Benjamín suindar avei aiko.

² Yɨpɨsuive ite, Tüpä oikwa Israel gwekwa nungar sereko; sese kurïtëi ndasesarai ete ichui. ¿Ndapeikwai vo Ikwachiaprɨ pɨpe aipo e'i Tüpä ñe'ë mombe'usar Elías resendar aipo e'i oyeruresa pɨpe oñe'ërai ava Israel pendar rese Tüpä upe? Aipo e'i:

³ “Che Yar, nde ñe'ë mombe'usareta opa oyuka yuvɨreko iyavei ndeu porerekosa reropove'ësa renda avei opa omombo yuvɨreko; che gweraño aikove vɨte kurïtëi, iyavei a'e che yuka pota ite yuvɨreko.”

⁴ Tüpä rumo omboyevɨ chupe: “Aipe'a rumo siete mil tuprɨ ava che mboyeroyasar cheyeupe narä noñenopɨ'äi va'e Baal ra'anga rovai yuvɨreko.”

⁵ Egwë e'i avei kurïtëi, opɨta vɨteño movɨrö judío, a'e ni'ä Tüpä oiporavo oporoaɨsusa pɨpe.

⁶ Iyavei Tüpä poroaɨsusa pɨpe ite yuvɨrekoise, nda'ei rumo mba'e sembiapokwer rese egwë e'i sereko; esepia egwë e'ise viña, Tüpä poroaɨsusa nda'e iri chietera poroaɨsusa sekoi.

⁷ ¿Marä e'i pi'ä evokoiyase? Ko Israel ɨgwar yuvɨrekoi va'e ndoyosɨi ete mba'e oipota va'e yuvɨreko, Tüpä rembiporavo rumo oipɨsɨ ite yuvɨreko. Ambuae ava rumo ipɨ'a ñemoñeta kokotɨ tëiete yuvɨreko,

⁸ inungar Ikwachiaprɨ pɨpe aipo e'i: “Tüpä rumo nomboyekwai mba'e ikatuprɨ va'e chupe, egwë e'iño ite kurïtëindar yuvɨreko; omondo tëi sesarä ipɨpe rumo ndosepiai ete mba'e yuvɨreko omondo avei yapɨsagwä ipɨpe rumo ndosendukwai mba'e yuvɨreko.”

⁹ David avei aipo e'i araka'e: “Ipietasa toyevɨ mba'e tëi pɨpe iyavei pira mbo'asa nungar tasekoi chupe, ipɨpe sui toyuvɨro'a mba'e tëi pɨpe toyemombaraɨsu uka avei ipɨpe yuvɨreko.

¹⁰ Iyavei sesa toyuvɨrekoi pɨ̇tümimbisa vrɨve a'ese ndosepia iri chira mba'e yuvɨreko; iyavei tayapapasa ikupe apɨre'ɨ̇sa pɨpe yuvɨreko.”

Ava nda'ei va'e judío ñepɨsɨrösa

¹¹ Kurïtëi che aporandu irira peü: ¿Supiete pi'ä judío eta, oyavɨse mba'e yuvɨreko, opa tëi oñemokañɨ yuvɨreko? ¡Ani nda'ei ete supi! A'e rumo egwë e'i ava nda'ei va'e judío pɨsɨrösa pɨsɨ agwä yuvɨreko, ipɨpe sui oyemongere'ɨ̇ katura Israel ɨgwar ipɨsɨ agwä yuvɨreko kuri.

¹² Evokoiyase, judío eta rembiavɨ sui tuvicha Tüpä poroparaɨsuerekosa oime opakatu ava nda'ei va'e judío upe, ¡koiye rumo tuvicha katu itera Tüpä poroparaɨsuerekosa opakatu ava upe oyevɨse yuvɨreko chupe!

¹³ Che amombe'u pota mba'e peü, pe nda'ei va'e judío peiko. Tüpä ni'ä che kwai oñe'ë mombe'u agwä nda'ei va'e judío upe, sese cheu avɨye ite ko che poravɨkɨsa.

¹⁴ Che aipota che mu pe pa'ü pendar oyemongere'ɨ̇ va'e, pɨsɨrösa pɨsɨ agwä oyeupe narä yuvɨreko.

¹⁵ Esepia judío mombosa pɨpe sui Tüpä omoime ñeröisa opakatu ava ko ɨvɨ pɨpendar upe, ¿Marä e'ira pi'ä Tüpä oipɨsɨse yuvɨreko? ¡A'ese omano va'ekwer oipɨsɨra tekovesa apɨre'ɨ̇ va'e yuvɨreko kuri!

¹⁶ Esepia yɨpɨndar mboyape yapoprɨ seropove'ësa va'e Tüpä upe, opakatu mboyapevɨ evokoiyase sovasaprɨ avei ichui. Iyavei ɨvɨra rapo seropove'ësa va'e Tüpä upe, egwë e'i avei opakatu säkä sovasaprɨ sekoi.

¹⁷ Judío eta inungar olivo räkä yasɨaprɨ tëi, pe evokoiyase nda'ei va'e judío ɨvɨra ka'a pɨpendar räkä nungar peiko va'e, peso yasɨaprɨ rendagwerve. Ipɨpe sui peipɨsɨ vɨrawäsa pe rekove agwä.

¹⁸ Anichira ereyeeko mboɨvateai, ɨvɨra räkä reroɨrömbave. Ereyapose evokoi nungar, a'ese ereyemoma'endu'ara nda'ei nde eremovɨräkwä ɨvɨra rapo eiko, esepia ɨvɨra rapo nde movɨräkwä nde rereko.

¹⁹ Avɨyeteramo aipo e'ira yuvɨreko: “Supiete, opa yasɨasa ɨvɨra räkä a'ese che apɨtara sendagwerve.”

²⁰ Supiete, ko rumo oporeroya e'ɨ̇ pɨpe a'e imombosa ichui yuvɨreko, pe rumo seroya pɨpe suiño ite pepɨta sendagwerve. Sese peikwa katu, anichira peyemboɨvateai ipɨpe.

²¹ Esepia Tüpä niñeröi ete judío upe, peü avei egwë e'ira ndapemboyeroyaise.

²² Peyapɨsaka tuprɨ, Tüpä ni'ä avɨye va'e ite. Seko pirätä va'e avei rumo ava vɨroya e'ɨ̇sar upe. Peü rumo avɨye ite peikoño katu iporoaɨsusa pɨpe; avɨyeteramo ndapeikoise supi pe avei yasɨaprɨ nungar tëi peikora.

²³ Iyavei opoipase judío eta oporeroya e'ɨ̇sa sui yuvɨreko, Tüpä evokoiyase opirätäsa pɨpe vɨroyevɨpa irira oyeupe narä.

²⁴ Pe nda'ei va'e judío ɨvɨra ka'a pɨpendar räkä yasɨaprɨ nungar peiko, Tüpä rumo pe mondo ɨvɨra avɨye va'e nungar rese, ¡judío eta yuvɨrekoi va'e inungar ɨvɨra avɨye va'e räkä yasɨaprɨ, a'e ɨvate katu oipɨsɨ irira oyeupe narä kuri!

Pɨsɨrösa ipa va'e ava Israel ɨgwar upe

²⁵ Che rɨvrɨ eta, che aipota peikwa va'erä Tüpä sui mba'e ndikwasai va'e, oyemboɨvateai e'ɨ̇ agwä yuvɨreko: esepia Israel ɨgwar movɨrö kokotɨ tëi ipɨ'a ñemoñeta va'e yuvɨreko, ko rese egwë e'i opakatu yuvɨroikepa rane itera ava nda'ei va'e Israel pendar yuvɨreko.

²⁶ Ko opase yavɨye, opakatu Israel pendar yuvɨrekoira pɨsɨrösa pɨpe, esepia Ikwachiaprɨ pɨpe aipo e'i: “Oura ava pɨsɨrösar tekwa Sión pa'ü sui, iyavei oipe'ara mba'e naporäi va'e Jacob sui.

²⁷ Ko evokoiyase che remimbotar chupe narä yuvɨreko amokañɨse yangaipagwer yuvɨreko ichui.”

²⁸ Egwë e'i kurïtëi judío eta ndosendu potai ñe'ësa pɨsɨrösa resendar yuvɨreko, sese Tüpä amotare'ɨ̇sar yuvɨrekoi peü mba'e tuprɨ agwä rumo egwë e'i; Tüpä rumo osaɨsu vɨte, esepia yɨpɨve ite oiporavo tamoi eta oyeupe.

²⁹ Supiete, Tüpä ndovɨroyevɨ iri ete mba'e gwemimondo iyavei ndovɨrova-rova tëi va'e opɨ'añemoñetasa gwembiporavo sui.

³⁰ Yɨpɨndar ni'ä pe ndapemboyeroyai ete Tüpä, kurïtëi rumo judío eta ndovɨroyaise yuvɨreko, ipɨpe sui ni'ä Tüpä peraɨsu pe rereko.

³¹ Egwë e'i avei judío eta kurïtëi ndovɨroyai yuvɨreko, Tüpä pe paraɨsuereko uka agwä rumo egwë e'i, koiye inungar pe, judío avei osupitɨra Tüpä poroparaɨsuerekosa yuvɨreko.

³² Esepia Tüpä osaɨsuño ite opakatu ava mba'e sembiavɨ pɨpe, iyavei vɨreko poroaɨsusa opakatu upe narä.

³³ ¿Marä e'i rutei Tüpä arakwasa, imba'ekwasa avei? Ndipoi chietera ava yarakwasa mombe'u tuprɨ agwä. Ndayaikatui avei sekokwer kwapa tuprɨ agwä.

³⁴ Supiete “¿uma pi'ä oikwa yande Yar pɨ'a ñemoñetasa? ¿Iyavei uma pi'ä oikatura imboarakwa sereko?

³⁵ ¿Uma pi'ä omondo mba'e yɨpɨndar chupe, ipare a'e omboyevɨ va'erä chupe?”

³⁶ Esepia Tüpä suiño ite ni'ä opakatu mba'e oime, ichui ni'ä mba'e opakatu oime, chupe narä avei. ¡Sese imboeteiprɨ ite Tüpä tasekoi! Amén.