San Mateo 8 - Tüpä Ñe'ëngagwer

Jesús ombogwera ñepëi mbɨa mba'erasɨ vai ndokwerai va'e rerekosar

¹ Ɨvɨtrɨ sui ogweyɨse Jesús ou, a'ese ava re'ɨi yuvɨrekoi supi.

² A'ese ñepëi ava mba'erasɨ vai ndokwerai va'e rerekosar ou, oñenopɨ'ä sovai aipo e'i chupe: –Che Yar ereipotase, che mbogwerami tëi eve ko mba'erasɨsa sui.

³ Jesús opoko sese, aipo e'i chupe: –Aipota. ¡Erekwerara kurïtëi! Aipo i'e ramoseve, mba'erasɨ vai rerekosar okwera voi ete omba'erasɨsa sui.

⁴ Jesús aipo e'i iri chupe: –Esendu, eremombe'ui rene ambuae ava upe. Eso eiko eyemboyekwa pa'i upe, ipare eikwave'ë nde porerekosa nde kwera agwer resendar Moisés porokwaita rupi, ipɨpe sui toikwa pa'i eta nde kwerasa yuvɨreko.

Jesús ombogwera ñepëi chi'ïvä'e sundao rerekwar Roma ɨgwar rembigwai

⁵ Oyepotase Jesús oso tekwa Cafarnaúm ve, ñepëi sundao mborerekwar Roma pendar oyemboya oso sese oporandu va'erä.

⁶ Aipo e'i chupe: –Che Yar, che rembigwai imba'easɨ gwasu ou che rëtäve, ndogwata katui, iyavei oiporara tëi omba'erasɨsa ou.

⁷ Jesús aipo e'i chupe: –Asora kurïtëi imbogwera.

⁸ Sundao rerekwar omboyevɨ chupe: –Ani che Yar, ndiyai ete che rëtä pɨpe nde reike agwä; iyakatu ni'ä ko'apeve ereñe'ëño tëi ikwera agwä, evokoiyase nde ñe'ë pɨpe tëi che rembigwai okwerara.

⁹ Esepia che ni'ä serekwa va'e aveino, areko avei sundao che povrɨve. A'e chupe eso peve a'ese, kurïtëi oso; ambuae upe erio ave, a'ese ou voi avei cheu; iyavei che rembigwai upe a'e mba'e eyapo a'ese, che reroya ite.

¹⁰ Jesús ndoyembovɨ'ai tëi aipo osenduse, ichui aipo e'i oyeupindar ava re'ɨi upe: –Supiete ndasepiai ete opakatu Israel rekwa pɨpe vɨreko va'e yeroyasa che rese inungar ko mbɨa.

¹¹ Iyavei aipo a'e peü seta ava yugwerura añi'ïvëi kotɨ sui iyavei ka'aru kotɨ sui aveino, ipare ogwapɨra yuvɨreko okaru Abraham rese Isaac iyavei Jacob Tüpä mborerekwasave,

¹² a'e yuvɨrekoi va'erä viña Tüpä mborerekwasave, a'e imondosara pɨ̇tümimbisave okañɨ tëi va'erä. A'eve oyase'o tëira iyavei oñeaimbotere-tere tëira mba'erasɨkwer rereko yuvɨreko.

¹³ Evokoiyase Jesús sundao rerekwar upe aipo e'i: –Eso nde rëtäve, ipare tayaposa mba'e ereroyagwer va'e rupi. A'e pɨpeve sembigwai okwera tuprɨ.

Jesús ombogwera Pedro rovayar

¹⁴ Jesús oso Pedro rëtäve, a'eve osepia sovayar so'ɨ iteangase vupave ou.

¹⁵ Jesús evokoiyase opoko ipo rese, a'e ramoseve so'ɨ opɨtu'u ichui, okwerare oñarapü'a voi o'añeko agwä sese.

Jesús ombogwera seta ava imba'easɨ va'e

¹⁶ Ipare pɨ̇tü ramose Jesús upe seta karugwar vɨreko va'e vɨraso yuvɨreko; iyavei ñepëi reseve oñe'ë pɨpe tëi omombopa karugwar re'ɨi, iyavei opakatu imba'easɨ va'e ombogwera.

¹⁷ Egwë e'i omboavɨye Tüpä ñe'ë mombe'usar Isaías rembikwachiagwer, aipo e'i va'e araka'e: “A'e ae vɨrokwa opakatu yande mba'erasɨsa yande sui iyavei oiporara opakatu mba'e tasɨ va'e yande rese.”

Jesús rupi yande gwata agwä

¹⁸ Jesús osepiase ava re'ɨi oyere gwasu va'e oyese, oyokwai gwemimbo'e eta yuvɨraso va'erä ɨpa rovai.

¹⁹ A'ese oyemboya oso Moisés porokwaita rese oporombo'e va'e, aipo e'i chupe: –Porombo'esar, che aso pota nde rupi opakatu nde gwatasa rupi.

²⁰ Jesús omboyevɨ chupe: –Esepia agwara vɨreko okesa iyavei vɨräi vɨreko gwaitɨ, che ava ɨvate katu va'e Ra'ɨrɨ ndarekoi ete che pɨtu'u agwä.

²¹ Ambuae aipo ñepëi semimbo'e, aipo e'i chupe: –Che Yar, yɨpɨndar asoranera cheru ñotɨ̇.

²² Jesús omboyevɨ chupe: –Egwata che rupi, egwë teiño omano va'e, a'e ae toñeñetɨ yuvɨreko.

Jesús omombɨtu'u ɨvɨtuai

²³ Jesús o'a ɨarusu pɨpe, iyavei semimbo'e eta yuvɨraso supi.

²⁴ A'ese avɨyeteramo tëi ɨvɨtuai opü'a ɨpa pɨpe ɨ o'ɨtu va'e ndigwayɨi ete seni-seni ɨarusu oyopɨ. Jesús rumo aipo okeño ou.

²⁵ Evokoiyase semimbo'e eta yuvɨraso imoma'e aipo e'i yuvɨreko: –¡Ore Yar, yande pɨsɨrö eve! ¡Yande rerasora moko ɨarusu ɨpɨve!

²⁶ A'e rumo omboyevɨ gwemimbo'e upe: –¿Ma'erä vo pesɨkɨye eteprɨ? ¡Ndapeyeroyai ete vo Tüpä rese! Oñarapü'a pare rumo Jesús oñe'ë pirätä ɨtu gwasu upe ɨvɨtuai upe aveino, ipare voi ete opa tuprɨ opɨtu'u.

²⁷ A'e evokoiyase, ndoyembovɨ'ai tëi, oporandu oyeupe yuvɨreko: –¿Uma pi'ä ko sekoi, ɨvɨtu paragwasu avei omboyeroya yuvɨreko no?

Karugwar vɨreko va'e oyese Gadara pendar

²⁸ Jesús oyepotase ɨpa rovai oso, a'e ɨvɨ Gadara pendar rese, ñuvɨrïo karugwar vɨreko va'e yuvɨnosë te'ögwer ruvɨpa rupi sui ipare oyemboya yuvɨraso sese. A'e ndiporomboetei va'e ndipoi ete aipo ogwata va'e, a'e perɨ rupi yuvɨreko yepi;

²⁹ ipare säse pirätä yuvɨreko: –¡Tüpä Ra'ɨrɨ, eyepepɨ ore sui! ¿Nde ereyu ko'ave ore mombaraɨsu tëi agwä ndoyepota vɨtei rumo arɨ ndeu?

³⁰ Namombrɨimi kuchi re'ɨi yuvɨrekoi ichui okaru.

³¹ Evokoiyase karugwar oporandu Jesús upe yuvɨreko: –Ore mombopase eve, toroikeñomi tëi evokoi kuchi avɨterve.

³² Jesús aipo e'i chupe: –Pesopa. Karugwar opa yuvɨnosë ava sui ipare yuvɨroikepa kuchi re'ɨi avɨterve; ichui rumo opakatu kuchi re'ɨi yuvɨnoña yuvɨraso ɨvɨ sokwer pɨpe ɨpa pɨpe, a'eve opa okañɨ yuvɨreko.

³³ Evokoiyase kuchi rärösar opa oñemi, ipare oyepotase tekwave yuvɨraso omombe'u mba'e osepia va'e yuvɨreko, opakatu mba'e osepia va'e avei karugwar resendar yuvɨreko no.

³⁴ Evokoiyase opakatu tekwa pendar yuvɨnosë atɨ Jesús rekosave yuvɨraso, ipare osepiase aipo e'i yuvɨreko chupe eso ave sui ambuae tekwa rupi.