San Mateo 3 - Tüpä Ñe'ëngagwer

Juan Oporoapirämo va'e ɨvɨ iporupɨre'ɨ̇sa rupi sekoi

¹ Juan Oporoapirämo va'e oso oyemboyekwa Judea ɨvɨ rupi ava yemboerekwa e'ɨ̇save.

² Oñe'ësave aipo e'i: “¡Peyevɨ Tüpä upe, esepia ko Tüpä mborerekwasa köimi ete sekoi!”

³ Ko Juan rese ni'ä oñe'ë yɨpɨve Tüpä ñe'ë mombe'usar Isaías aipo e'i gwembikwachiagwer pɨpe: “Oyeendu ñepëi ñe'ësa ava yemboerekwa e'ɨ̇save: ‘Pemoigätu yande Yar raperä; pemboi ñepëi perɨ i'ɨvɨ̇i tuprɨ va'e.’ ”

⁴ Juan turukwar evokoiyase camello ragwer apoprɨ, iyavei oyumbɨkwa mba'e pirer pɨpe; sembi'u evokoiyase tukru iyavei eirɨ ka'a pɨpendar.

⁵ Opakatu ava Jerusalén pendar Judea rupindar tekwa ɨai Jordán rerovɨka pendar avei yuvɨraso iñe'ë rendu.

⁶ Omombe'u oangaipagwer yuvɨreko ipare Juan oñapirämo ɨai Jordán pɨpe.

⁷ Juan osepiase ava fariseo eta iyavei saduceo eta, yuvɨraso oñeapirämo agwä chupe viña, a'e rumo aipo e'i: “¡Pe mboi mboetasa tëi peiko! ¿Ava vo pesëra Tüpä ñemoɨrösa ou va'erä sui e'i tuprɨ tëi peü?

⁸ Yɨpɨndar toyekwa tuprɨ rane Tüpä upe peyevɨsa pe angaipa mboasɨsa pɨpe,

⁹ aipo ndapeyei chira peyeupe ae: ‘Ore oroiko Abraham suindar’; amombe'u aipo peü ko ita sui Tüpä oikatu ite oyapo va'erä ava Abraham suindar oyeupe narä.

¹⁰ Esepia ni'ä hacha imoigätusa voi ete ɨvɨra asɨa agwä i'ɨvɨpɨ rupi. Iyavei opakatu ɨvɨra ndi'ai va'e, a'e yasɨasara ipare imondosara tatave okai va'erä.

¹¹ Che supiete, ɨ pɨpe tëi opoapirämo Tüpä upe pe yevɨ agwä; ou va'e rumo ambuae che rakɨkwei peapirämora Espíritu Maräne'ɨ̇ tata nungar pɨpe. A'e seko pirätä katu va'e che sui, sese cheu ndiyai ete ipɨtaki yora agwä ichui.

¹² Gweru sɨpe opove ipare omoatɨröra trigo iyavei oipe'ara i'ɨgwer sui. Oyapokatura trigo sɨru pɨpe, i'ɨgwer rumo opara osapɨ tata ndopai va'e apɨre'ɨ̇ va'esave.”

Jesús ñapirämosa

¹³ Jesús oso Galilea sui ɨai Jordán ve, a'eve sekoi Juan, a'e oñapirämo va'erä.

¹⁴ Yɨpɨndar rumo Juan noñapirämo potai ete aipo e'iño chupe: –Nde rumo iya che apirämora eve viña, ¿nde evokoiyase ereyu cheu?

¹⁵ Jesús omboyevɨ chupe: –Egwë te'iño aipo, iyakatu yamboyeroyara opakatu mba'e avɨye va'e Tüpä rovai. Evokoiyase Juan oyapoñoite iporokwaita.

¹⁶ Jesús oapirämo pare osë ɨ sui, a'ese ɨva oyemboi tuprɨ ipare osepia Espíritu Tüpä suindar ogweyɨse ou i'arɨve apɨkasu nungar.

¹⁷ A'ese oyeendu ñepëi ñe'ësa ɨva suindar aipo e'i va'e: “Ko che Ra'ɨrɨ che rembiaɨsu, a'e che rembiporavo sekoi.”