San Mateo 24 - Tüpä Ñe'ëngagwer

Jesús omombe'u tüpäro monduru agwä

¹ Jesús osë tüpäro pɨpe sui, iyavei oso ite oiko, a'eve semimbo'e eta oyemboya sese ipare omboɨpɨ imombe'u tüpäro resendar yuvɨreko chupe.

² Jesús aipo e'i gwemimbo'e upe: –¿Pesepia ko opakatu mba'e? Supiete amombe'u peü ko'ave ndipoi chietera ñepëi ita opɨta va'e ambuae arɨve. Opakatu ite imondurusara kuri.

Poromondɨisa oimerä kañɨ renonde

³ Ipare yuvɨraso ka'a Olivos ve. A'eve Jesús ogwapɨ öi, ichui semimbo'e eta oyemboya oporandu agwä mba'e rese kokotɨ yuvɨreko chupe: –Oroipota eremombe'u oreu mba'ese vo oimerä aipo nungar. ¿Mba'e poromondɨisa rese rane vo ikwasara nde yu agwä iyavei arɨ kañɨ agwä kuri?

⁴ Jesús rumo omboyevɨ chupe: –Peikwa katu peyembopa ukai rene ambuae ava upe peiko.

⁵ Esepia ni'ä seta ava yugwerura che rer pɨpe. Aipo e'ira yuvɨreko: ‘Che aiko Poropɨsɨrösar’, iyavei ombopa atɨra ava yuvɨreko.

⁶ Pesendura ñe'ësa vavasa resendar ko'ave iyavei ambuae rupi; ndapeyembosɨkɨyei chira rumo ichui, esepia egwë e'i rane itera ni'ä; nde'i vɨtei chietera rumo arɨ kañɨsa.

⁷ Esepia ñepëi ɨvɨ pɨpendar ovavara ambuae ɨvɨ pendar rese iyavei ñepëi tekwa gwasu ovavara ambuae ɨvɨ pendar rese; iyavei oimerä tɨavor ɨvɨ rɨrɨi opakatu-katu tëi tekwa rupi.

⁸ Opakatu evokoi mba'e omboɨpɨ ramomi va'e mba'e tëi porarasa.

⁹ “Evokoiyase pepɨsɨra yuvɨreko marä-marä tëi pe rereko agwä; pe yuka aveira, ipare opakatu ava-ava tëi ndape ambotai chira che rekokwer sui tëi yuvɨreko.

¹⁰ A'e arɨ rupi evokoiyase seta iteangara ava ndachereroyai va'e, iyavei oyeamotare'ɨ̇ra ipare omondora ambuae omboetasa yamotare'ɨ̇mbar povrɨve yuvɨreko.

¹¹ Seta aveira Tüpä ñe'ë mombe'usar anga'u tëi va'e, iyavei seta ombopa ava yuvɨreko no.

¹² Oime aveira mba'e-mba'e tëi naporäi va'e, seta katura rumo ava ndosaisui va'erä ambuae yuvɨreko.

¹³ Akoi ava oyemovɨräkwä va'e ñoite arɨ ipa va'e rupi, a'e oñepɨsɨröra yuvɨreko.

¹⁴ Iyavei ko ñe'ësa ikatuprɨ va'e Tüpä mborerekwasa resendar imombe'usapa ranera opakatu ɨvɨ rupi, ikwa uka agwä; a'ese ramo ite oimerä kañɨsa.”

¹⁵ “Tüpä ñe'ë mombe'usar Daniel oikwachia oime va'erä mba'e-mba'e tëi resendar. A'e pesepiase oɨ maräne'ɨ̇ pɨpe–akoi oyerokɨ va'e, a'e tosendukwa tuprɨ yuvɨreko,

¹⁶ evokoiyase Judea ve yuvɨrekoi va'e, toñemipa poyava ɨvɨtrɨ rese yuvɨreko ichui;

¹⁷ iyavei akoi gwëtä arɨve yuvɨrekoi va'e, togweyɨ iri eme omba'e reka;

¹⁸ iyavei akoi ka'a pɨpe sekoi va'e, toyevɨ iri eme oturukwar reka gwëtäve.

¹⁹ ¡Iparaɨsu itera kuña ipuru'a va'e yuvɨreko, a'e arɨ pɨpe imembɨ pitani va'e avei!

²⁰ Peporandu katu Tüpä upe oime e'ɨ̇ agwä ñemisa iro'ɨ pɨpe, mbɨtu'usa arɨ pɨpe avei;

²¹ esepia a'e arɨ oimerä paraisusa gwasu a'e yɨpɨ suive ndasepiasai va'e araka'e ipare ndipo iri chietera evokoi nungar.

²² Iyavei nomombɨtu'uise Tüpä ko arɨ naporäi va'e, ndipoi chietera oñepɨsɨrö va'e yuvɨreko viña; a'e rumo gwembiporavo raɨsusa pɨpe omombɨtu'u ñoitera kuri.”

²³ “Evokoiyase aipo e'ise yuvɨreko peü: ‘Pesepia, ko Poropɨsɨrösar sekoi’, anise ‘Pesepia, evokoi sekoi’, anichira peroya aipo e'i va'e yuvɨreko.

²⁴ Esepia yugwerura nda'ei va'e Poropɨsɨrösar nda'ei va'e avei Tüpä ñe'ë mombe'usar; ipare oyapora poromondɨisa gweko pirätäsa mboyekwa agwä yuvɨreko oporombopa agwä, egwë e'i aveira Tüpä rembiporavo upe yuvɨreko.

²⁵ Opa aipo ko senondeve amombe'u peü.

²⁶ Sese, aipo e'ise yuvɨreko peü: ‘Pesepia evokoi sekoi, ɨvɨ iporupɨre'ɨ̇sa rupi’, pesoi rene a'eve; anise aipo e'ise yuvɨreko peü: ‘Pesepia, ko sekoi oñemi öi’, ndaperoyai chira rumo.

²⁷ Evokoiyase inungar overa-vera va'e sendɨ añi'ïvëi sui ka'aru kotɨ okwa ɨva rese, egwë a'era che, ava ɨvate katu va'e Ra'ɨrɨ opakatu ava rembiepiave ayevɨ irise vitu kuri.

²⁸ Esepia mba'e re'ögwer reimesave, uruvu oñemonu'ä atɨ yuvɨreko yepi.”

Ava ɨvate katu va'e Ra'ɨrɨ yevɨsa

²⁹ “A'e arɨ pɨpe mba'e-mba'e tëi pare kurïtëimi ndoyekwa iri chira arɨ, yasɨ ndosesape iri chira, yasɨtata avei opara ovɨapi ɨva sui, iyavei ɨva resendar mba'e orɨrɨira yuvɨreko.

³⁰ A'ese oyekwara ɨva rese poromondɨisa che ava ɨvate katu va'e Ra'ɨrɨ yu agwä, iyavei opakatu ava-ava tëi ko ɨvɨ pɨpendar oyase'o tëira osɨkɨyepave yuvɨreko, ipare pesepiara che ava ɨvate katu va'e Ra'ɨrɨ agweyɨse ɨva kɨ'a rese che pirätäsa rendɨgwer porañetesa pɨpe.

³¹ Iyavei amboura mbigwai eta ɨva pendar, a'e evokoiyase gwemimbɨ omoñe'ë pirätära opakatu che rembiporavo ko ɨvɨ rupindar amombrɨ rupi yuvɨrekoi va'e monu'ä agwä.”

³² “Peyembo'era ɨvɨra higuera rekokwer sui: Akoi säkä sokɨ ramose, ichui osë so, a'ese peikwa ite vɨrovɨse arɨ saku va'e yepota agwä.

³³ Egwë e'i aveira, opakatu mba'e pesepiase, a'ese peikwara ava ɨvate katu va'e Ra'ɨrɨ köimi ete che yevɨ agwä.

³⁴ Supiete aipo a'e opakatu oime rane itera osepia va'e omano e'ɨ̇ vɨte seve ava kurïtëindar yuvɨreko.

³⁵ Ɨva iyavei ɨvɨ opara okañɨ, che ñe'ëngagwer rumo imboavɨyesa rane itera.”

³⁶ “Ndipoi ete rumo ava oikwa va'e arɨ imombe'uprɨ che yevɨ agwä, mbigwai eta ɨva pendar avei ndoikwai yuvɨreko, che avei ndaikwai ete. Che Ru gweraño ite rumo oikwa.

³⁷ Inungar Noé rekose yuvɨrekoi araka'e, egwë e'i tuprɨ aveira che, ava ɨvate katu va'e Ra'ɨrɨ yevɨ agwä renonde.

³⁸ Yɨpɨve amarusu renonde, iyavei Noé reikese ɨarusu pɨpe, ava rumo okaru iyavei yuvɨro'u ichui omenda yuvɨreko.

³⁹ Nomo'äi ete rumo ko nungar yuvɨreko viña, avɨyeteramo tëi oyepota ou amarusu opakatu vɨraso imokañɨpa. Egwë e'i aveira che ayevɨse ava ɨvate katu va'e Ra'ɨrɨ.

⁴⁰ A'e arɨ pɨpe, oimerä ñuvɨrïo ava yuvɨrekoi va'e ka'a pɨpe, ñepëi serasosara indugwer rumo opɨtara.

⁴¹ Egwë e'i aveira ñuvɨrïo kuña o'ɨcho va'e, ñepëi serasosara indugwer rumo opɨtara.”

⁴² “Pema'emo'ä peyese yepi esepia ndapeikwai mba'e arɨ pɨpe che pe Yar ayevɨra.

⁴³ Iyavei peyapɨsaka tuprɨ ko rese, inungar akoi oɨ yar oikwase arɨ pɨ̇tü imonda va'e yevɨ agwä, a'ese ima'emo'ära sese gwëtä pɨpe seike e'ɨ̇ agwä viña.

⁴⁴ Egwë peye aveira peyemoigätu; esepia ni'ä che ava ɨvate katu va'e Ra'ɨrɨ aporoesapɨ'a tëira vitu kuri.”

Mbigwai omboavɨye va'e okwaita iyavei mbigwai nomboavɨyei va'e okwaita

⁴⁵ ¿Uma vo mbigwai omboavɨye tuprɨ va'e okwaita, yarakwa va'e avei, a'e chupe serekwar oseya ikwaitarä gwëtä pɨpendar rese añeko agwä tembi'u tomondo che rëtä pɨpendar upe che porokwaita rupi oesave?

⁴⁶ Sorɨvetera akoi omboavɨyese mbigwai okwaita, oyepotase serekwar a'ese osepiara iporavɨkɨsa avɨye va'e.

⁴⁷ Supiete ni'ä serekwar oyokwaira opakatu omba'e rese añeko agwä.

⁴⁸ A'e mbigwai rumo ndipɨ'aise iyavei ndoyepota vɨtei chira revo che rerekwar oya viña

⁴⁹ omboɨpɨ omboetasa marä-marä tëi rereko iyavei oyemboya kagwar tëi rese ipɨri okaru iyavei oɨ'u tëi agwä,

⁵⁰ nomo'äi ete rumo iyepota agwä ndoikwai avei gwerekwar yepota agwä

⁵¹ ipare rumo omombaraɨsu katura, tinupasa inungar ava oñe'ë ñotëi va'e tekokwer rese yuvɨreko yepi. A'ese oyase'o tëira oyemoaitere-tere tëi aveira.