San Mateo 22 - Tüpä Ñe'ëngagwer

Yembo'esa karusa mendasa rese

¹ Jesús omboɨpɨ oporombo'e iri ambuae yembo'esa rese. Aipo e'i:

² “Mborerekwasa ɨva pendar inungar mborerekwar ɨvate katu va'e oyapo pieta gwa'ɨrɨ mendasa resendar.

³ Oyokwai gwembigwai eta oñe'ë va'erä ava icho'oprɨ upe, icho'oprɨ rumo nikere'ɨ̇i yugweru pietasave.

⁴ Ipare oyokwai ambuae gwembigwai eta aipo e'i chupe: ‘Aipo peyera icho'oprɨ upe opa ite oigätu tembi'u. Ayuka uka tɨvi ambuae mba'e mɨmba ikɨra katu va'e avei, opakatu ite mba'e oigätu; sese toyugweruño pieta save.’

⁵ Icho'oprɨ rumo ndovɨroyai ete yuvɨreko. Ñepëi osoño okove, ambuae oso omba'e eta mondosave,

⁶ iyavei ambuae oipɨsɨ mborerekwar ɨvate katu va'e rembigwai marä-marä tëi sereko agwä ipɨpe sui oyukaño yuvɨreko.

⁷ Evokoiyase mborerekwar ɨvate katu va'e oñemoɨrö iteanga save, omondo osundao eta ko ava oporapichi va'e yuka ukapa agwä sekwa rapɨpa agwä avei.

⁸ Ipare aipo e'i ambuae gwembigwai eta upe: ‘Opa oigätu tembi'u mendasave, ko rumo yɨpɨndar icho'oprɨ ndiya iri yugweru va'erä ko'ave.

⁹ Sese peso, opakatu okar ava gwata katusa rupi, peñe'ë mendasave yugweru va'erä opakatu pe rovaïchisar upe.’

¹⁰ Evokoiyase mbigwai eta yuvɨnosepa yuvɨraso okar rupi, omonu'äpa seta ava osovaïchi va'e yuvɨreko, seko tuprɨ va'e sekorai va'e avei; egwë e'i ava savapɨpo tuprɨ oɨ pɨpe yuvɨreko.”

¹¹ “Koiye mborerekwar ɨvate katu va'e oike ava icho'oprɨ repia, oma'ekwa tuprɨ ñepëi ava ipa'ü pendar rese a'e rumo nomondei turukwar mendasa resendar.

¹² Aipo e'i chupe: ‘Che mborɨpar, ¿marä erevo eike ko'ave, turukwar mendasa resendar pore'ɨ̇?’ A'e rumo noñe'ëiño chupe.

¹³ Evokoiyase mborerekwar ɨvate katu va'e aipo e'i i'añeko va'e karusa renda rese: ‘Peipɨsɨ ko mbɨa peñapɨ̇chi ipɨ iyavei ipo penose okarve pɨ̇tümimbisave. A'eve oyase'ora säitere-tere tëira mba'erasɨkwer rereko.’

¹⁴ Esepia seta tëi icho'oprɨ, movɨrö tëi rumo iporavoprɨ.”

Porandusa gwarepochi monu'äsa rese

¹⁵ Ko ipare, fariseo eta yuvɨraso ichui opa oñemoñeta oyavɨ uka va'erä Jesús ñe'ë yuvɨreko viña.

¹⁶ Egwë e'i imondo opa'ü pendar, ambuae mborerekwar Herodes rupindar reseve aipo e'i va'erä yuvɨreko chupe: –Porombo'esar, ore oroikwa nde supiete mba'e eremombe'use eiko, iyavei ereporombo'e mba'e supi tuprɨ va'e Tüpä rekokwer rese, nde ni'ä ndereroyai va'e ava ñe'ësa tëi, esepia ava pɨ'añemoñeta rupi ndereikoi va'e.

¹⁷ Embou, nde pɨ'añemoñeta oreu: ¿Avɨyera pi'ä oromondo gwarepochi Roma pendar mborerekwar ɨvate katu va'e upe viña, ani tie?

¹⁸ Jesús oikwa voi ete ipɨ'a ñemoñeta raisa, sese aipo e'i chupe: –Pe inungar ava oñe'ë ñotëi va'e tekokwer rese yuvɨreko yepi, ¿ma'erä vo che mbo'a uka pota mba'e tëi pɨpe peye?

¹⁹ Pemboyekwa ru ñepëi gwarepochi cheu ipɨpe imboepɨsa va'e gwarepochi mondosar upe yepi. Gweru ñepëi gwarepochi yuvɨreko chupe.

²⁰ Ipare Jesús oporandu chupe: –¿Ava ra'anga vo vɨreko ava rer vo ikwachiaprɨ sese?

²¹ A'e omboyevɨ yuvɨreko chupe: –Mborerekwar ɨvate katu va'e mba'e. Evokoiyase Jesús aipo e'i chupe: –Pemondora mborerekwar upe mba'e chupendar, Tüpä upendar mba'e evokoiyase pemondora Tüpä upe avei.

²² Osenduse, oyepɨ'amondɨi tëi yuvɨreko; ipare yuvɨnosë yuvɨraso.

Porandusa kwerayevɨsa rese

²³ A'e arɨ pɨpe, oime saduceo yuvɨraso va'e Jesús pɨri. Ndipoi ete kwerayevɨsa omano va'e upe e'i, egwë e'i ko imboyekwa mba'e yuvɨreko chupe:

²⁴ –Porombo'esar, Moisés aipo e'i akoi omano va'e gwa'ɨ e'ɨ̇seve, a'ese tɨvrɨ omendara sembirekokwer rese, a'e vɨke'ɨrɨ omano va'ekwer upe narä ta'ɨra oiko.

²⁵ Ko'ave, ore pa'üve, oime ñuvɨrïo ova tuprɨ oyesuindar päve yuvɨrekoi va'e. Yɨpɨndar va'e omenda. A'e omanoño gwa'ɨ e'ɨ̇seve ichui, a'e oseya gwembirekokwer vɨvrɨ upe.

²⁶ Egwë tuprɨ avei imoñuvɨrïosa upe, iyavei imombosapɨsa, ipare opakatu imoñuvɨrïo ova tuprɨ oyeɨvrɨ yuvɨrekoi va'e upe.

²⁷ Opakatu mano pare, kuña avei omano.

²⁸ Evokoiyase, opase okwerayevɨ yuvɨreko, ¿uma remirekora pi'ä opɨtara ko kuña esepia a'e yuvɨrekoi ñuvɨrïo ova tuprɨ va'e, opakatu omenda yuvɨreko sese?

²⁹ Jesús omboyevɨ aipo e'i: –¡Pepɨ'a ñemoñetasa kokotɨ tëiete, esepia ndapeikwai ete Tüpä ñe'ë Ikwachiaprɨ araka'endar, ndapeikwai avei Tüpä pirätäsa!

³⁰ Akoi omano va'e okwerayevɨse, kuimba'e iyavei kuña ndipo iri chira mendasa yuvɨreko chupe, a'e rumo inungar mbigwai ɨva pendar yuvɨrekoira.

³¹ Iyavei omano va'e kwerayevɨsa resendar amombe'ura peü, ¿ndapeyerokɨi vo pe Tüpä omombe'u va'ekwer rese:

³² ‘Che Abraham, Isaac iyavei Jacob Tüpä aiko’? ¡Iyavei a'e nda'ei omano va'ekwer Tüpä, a'e rumo oikove va'e Tüpä sekoi!

³³ Osenduse aipo, ava ndoyembovɨ'ai tëi Jesús porombo'esa rese yuvɨreko.

Porokwaita avɨye katu va'e

³⁴ Fariseo eta oyanduse Jesús omongiriripañose saduceo oyesui, a'ese oñemonu'äpa yuvɨreko,

³⁵ ñepëi ipa'ü pendar Moisés porokwaita rese oporombo'e va'e, oyemboya oso sese toyavɨ anga'u oñe'ë oyapave, aipo e'i oporandu chupe:

³⁶ –Porombo'esar, ¿uma ite vo porokwaita avɨye katu va'e opakatu ambuae sui?

³⁷ Jesús aipo e'i chupe: –‘Eresaɨsura nde Yar Tüpä opakatu nde pɨ'a ñemoñetasa pɨpe, opakatu nde rekokwer pɨpe, nde yapɨsakasa pɨpe avei.’

³⁸ Ko avɨye katu va'e yɨpɨndar ambuae porokwaita sui.

³⁹ Oime ñepëi imoñuvɨrïosa, ko inungar tuprɨ avei; aipo e'i: ‘Eresaɨsura ambuae ava nde yeaɨsu nungar.’

⁴⁰ Ko ñuvɨrïo porokwaita rupi ogwata opakatu Moisés porokwaita ikwachiaprɨ opakatu Tüpä ñe'ë mombe'usar rembikwachia avei.

¿Ava sui pi'ä ou Poropɨsɨrösar?

⁴¹ Fariseo eta oñemonu'ä vɨteseve yugweru,

⁴² a'ese Jesús aipo e'i oporandu chupe: –¿Marä e'i pepɨ'añemoñeta ko Poropɨsɨrösar rese? ¿Ava suindar pi'ä ou? A'e omboyevɨ yuvɨreko chupe: –A'e ni'ä David suindar sekoi.

⁴³ Evokoiyase Jesús aipo e'i chupe: –¿Ma'erä pi'ä evokoiyase David oñe'ëse Espíritu pirätäsa pɨpe araka'e, che Yar e'i chupe? Esepia David aipo e'i:

⁴⁴ ‘Yar aipo e'i che Yar upe: Egwapɨ che akato kotɨ, akoi che amondose voi ete nde amotare'ɨ̇mbar nde povrɨve yuvɨreko.’

⁴⁵ ¿Ma'erä ru Poropɨsɨrösar David suindar sekoi peye, David teiete ni'ä che Yar e'i chupe?

⁴⁶ Ndipoi ete oikatu va'e ñepëi ne'ësa imboyevɨ agwä, a'e arɨ pɨpe suive ndipo iri ñepëi ikere'ɨ̇ va'e oporandu mba'e rese yuvɨreko chupe.