San Mateo 19 - Tüpä Ñe'ëngagwer

Jesús oporombo'e mendasa poisa rese

¹ Opase omombe'u mba'e, Jesús oso Galilea sui oyepota Judea ɨvɨ rupi arɨ sësa kotɨ ɨai Jordán rovai.

² Ava re'ɨi yuvɨraso sakɨkwei, a'eve seta imba'easɨ va'e ombogwera.

³ Evokoiyase oime oyemboya va'e fariseo Jesús rese seko'ä pɨpe, oporandu yuvɨreko chupe: –¿Avɨye pi'ä opoi ñepëi kuimba'e gwembireko sui mba'e tëi oyapose?

⁴ Jesús omboyevɨ fariseo upe: –¿Ndapeyerokɨi vo pe Ikwachiaprɨ araka'endar oyapo va'e yɨpɨndar pɨpe, ‘a'e Tüpä oyapo kuimba'e iyavei kuña’?

⁵ Iyavei aipo e'i: ‘Evokoiyase, kuimba'e omendase oyepepɨra oyesupa sui osɨ sui avei yuvɨrekoi va'erä gwembireko rese, ichui a'e ñuvɨrïo yuvɨrekoira inungar ñepëi ava.’

⁶ Sese nda'ei chira ñuvɨrïo, ñepëi ñoite yuvɨrekoira. Evokoiyase Tüpä omomenda va'e ava, ndiyai ete ava tëi omboyepepɨ yuvɨreko oyesui.

⁷ A'e evokoiyase oporandu yuvɨreko chupe: –¿Ma'erä ru, evokoiyase Moisés omondo kwachiar poisa resendar kuimba'e upe opoi va'erä gwembireko sui?

⁸ Jesús rumo aipo e'i chupe: –Pe poreroya e'ɨ̇sa pɨpe sui ni'ä, Moisés oipotaño ite pepoi agwä pe rembireko sui; yɨpɨndar rumo egwë nde'i ete.

⁹ Che rumo aipo a'e peü akoi opoi va'e gwembireko mba'e ndoyavɨi va'e sui, omendase ambuae rese, a'e oyemboangaipa gwasu ite ipɨpe.

¹⁰ Aipo e'i semimbo'e eta yuvɨreko chupe: –Egwë e'ise kuimba'e rekokwer gwembireko rese, evokoiyase ndiyai ete imenda agwä.

¹¹ Jesús omboyevɨ chupe: –Nda'ei chira rumo opakatu osendukwa ko aipo a'e va'e, ñepëi upe omondo va'e Tüpä ombou va'e sembiaporä, a'e gweraño osendukwara yuvɨreko.

¹² Esepia oime pɨ'a ñemoñetasa ava menda e'ɨ̇ agwä: amove o'asa suive ndata'ɨi va'e, ambuae nombo'aɨ ukai ava yuvɨreko, ambuae evokoiyase nimendasei esepia oporavɨkɨ pota Tüpä mborerekwasa reseño ite. Akoi oikatu va'e ko ñe'ësa reroya agwä, tovɨroyaño.

Jesús osovasa chi'ïvä'e

¹³ Oime iyesupa vɨraso va'e chi'ïvä'e Jesús upe yuvɨreko, omondo va'erä opo i'arɨve iyavei oyerure va'erä sese; evokoiyase semimbo'e eta rumo omboɨpɨ oñe'ëgäta voi serasosar upe yuvɨreko.

¹⁴ Evokoiyase Jesús aipo e'i: –Toyugweruño chi'ïvä'e cheu, ani ndapeyei chira chupe, esepia Tüpä mborerekwasa a'e inungar tuprɨ yuvɨrekoi.

¹⁵ Ipare omondo opo ñepëi-pëi chi'ïvä'e arɨve, ipare osë oso ichui.

Ñepëi mbɨa chi'ïvä'e mba'e yar oñe'ë Jesús rese

¹⁶ Ñepëi mbɨa chi'ïvä'e oso Jesús upe oporandu mba'e rese: –Porombo'esar, ¿mba'e vo avɨye va'e ayapora tekovesa apɨre'ɨ̇ rereko agwä?

¹⁷ Jesús omboyevɨ chupe: –¿Ma'erä vo ereporandu cheu mba'e avɨye va'e rese? Avɨye va'e oime ñepëiño ite. Erereko potase rumo tekovesa apɨre'ɨ̇ va'e, emboyeroya mborokwaita.

¹⁸ –¿Uma vo aipo mborokwaita?–e'i oporandu mbɨa chi'ïvä'e. Jesús aipo e'i chupe: –‘Ndereporoyukai chira, nandeagwasai chira, nandemondai chira, nanderemiräi chira ambuae ava rese,

¹⁹ eremboyeroyara nde yesupa iyavei nde sɨ, iyavei eresaɨsura ambuae ava nde yeaɨsu nungar eiko.’

²⁰ –Opakatu ni'ä a'e amboavɨye yepi–aipo e'i mbɨa chi'ïvä'e–. ¿Mba'e vo evokoiyase ipane vɨte cheu ayapo va'erä?

²¹ Jesús omboyevɨ chupe: –Ereipotase mba'e tuprɨ pɨpe nde reko agwä, eso emondopa tuprɨ rane mba'e erereko va'e iyavei emondopa rane ava iparaɨsu va'e upe. Ichui ramo ite ererekora mba'e avɨye va'e ɨvave. Ipare eregwatara che rupi.

²² A'e mbɨa chi'ïvä'e osenduse ko aipo e'i va'e, ndovɨ'ai tëi oso, esepia a'e mba'e yar ite sekoi.

²³ Jesús evokoiyase aipo e'i gwemimbo'e eta upe: –Supiete yavai eteanga mba'e yar upe seike agwä Tüpä mborerekwasa pɨpe.

²⁴ Amombe'u irira aipo peü ndayavai katu camello upe yukwar rupi seike agwä, ava mba'e yar sui reike agwä Tüpä mborerekwasave.

²⁵ Aipo iñe'ë renduse, semimbo'e eta oyepɨ'amondɨi, aipo e'i tëi yuvɨreko: –Evokoiyase, ¿uma pi'ä oikatura oñepɨsɨrö?

²⁶ Jesús oma'e sese ipare rumo omboyevɨ chupe: –Ava tëi upe yavai ko nungar mba'e apo, Tüpä upe rumo mba'e opakatu ndayavai ete.

²⁷ Pedro aipo e'i evokoiyase chupe: –Ore rumo oroseyapa opakatu ore mba'e nde rupi ore gwata agwä. ¿Mba'e evokoiyase oroipɨsɨra?

²⁸ Jesús omboyevɨ chupe: –Supiete aipo a'e akoi arɨ ipapaprɨ oyepotase opakatu mba'e ñekuñarö agwä, a'ese che ava ɨvate katu va'e Ra'ɨrɨ agwapɨra che rendave che mborerekwa gwasu save, pe avei che rupindar pegwapɨra opayandepo yovaive ñuvɨrïo tenda arɨve, peporandura opakatu akoi opayandepo yovaive ñuvɨrïo tuprɨ yuvɨnosë va'e Israel suindar rekokwer rese kuri.

²⁹ Iyavei opakatu oseya va'e che rekokwer sui tëi gwëtä, anise vɨvrɨ, anise gweindrɨ, anise oyesupa, anise osɨ, anise gwa'ɨrɨ, anise oɨvɨ avei, a'e oipɨsɨra cien yupagwer mba'e, iyavei oipɨsɨra tekovesa apɨre'ɨ̇ ndopai va'e.

³⁰ Setavai kurïtëi yuvɨrekoi va'e tenonde katu, a'e rumo yuvɨrekoira ipa tëi; seta avei kurïtëi ipa tëi va'e, a'e yuvɨrekoira tenonde katu kuri.