San Marcos 5 - Tüpä Ñe'ëngagwer

Gerasa ɨgwar vɨreko va'e karugwar oyese

¹ Oyepota ambuae ɨpa rovai yuvɨraso, Gerasa ɨvɨ rese.

² Ogweyɨ pare Jesús ɨarusu pɨpe sui, a'ese ñepëi mbɨa karugwar rerekosar oyemboya oso sese. Ko mbɨa osë va'e tëi tuvɨpa sui,

³ esepia a'eve sekoi va'e. Ndipoi ete ava oikatu va'e ipɨsɨ agwä, ndoikatui avei karena pɨpe ipɨsɨ yuvɨreko.

⁴ Seta yupagwer rupi tëi ñapɨ̇chisa karena pɨpe ipɨ ipo rupi avei yepi, a'e rumo opa-opaño ite omondoso, ndipoi ete ava osekoreroyɨ va'e.

⁵ Arɨ pɨ̇tü rupi ogwata oiko ɨvɨtrɨ rupi iyavei tuvɨpa pɨpe, säse puku-puku iyavei okwa-okwa ita pɨpe oyese.

⁶ Amombrɨ Jesús repia ramoseve, oña oso oñenopɨ'ä voi ete sovai

⁷ aipo e'i oñe'ë pirätä chupe: –¡Eyepepɨ che sui Jesús, Tüpä seko ɨvate katu va'e Ra'ɨrɨ! ¡Aporandu Tüpä rer pɨpe che mombaraɨsu e'ɨ̇ agwä eve!

⁸ Egwë e'i aipo oñe'ë esepia Jesús aipo e'i chupe: –¡Karugwar mba'e tëi va'e, epoi ko ava sui!

⁹ Jesús oporandu chupe: –¿Marä vo nderer? A'e omboyevɨ chupe: –Che rer Legión, esepia ore re'ɨi eteanga.

¹⁰ Oporanduño Jesús upe omondo e'ɨ̇ agwä kokotɨ tëi ko tekwa sui.

¹¹ Ichui namombrɨi ɨvɨtrɨ, a'eve seta kuchi okaru va'e yuvɨreko,

¹² a'eve espíritu naporäi va'e oporandu chupe: –Ore mondopaño kuchi avɨterve eve.

¹³ Evokoiyase Jesús omondo karugwar sëagwä a'e ava sui, ichui opa yuvɨroike kuchi avɨterve. A'e kuchi retakwer dos mil tuprɨ, a'e yuvɨnoña yuvɨraso ɨvɨvate sui ɨpa pɨpe, a'eve okañɨpa yuvɨreko.

¹⁴ Evokoiyase kuchi rärösar yuvɨnoña osɨkɨyepave yuvɨraso, imombe'u agwä tekwave ka'a pɨpe rupi yuvɨrekoi va'e upe avei. Sese ava opa yugweru sepia.

¹⁵ Oyepotase Jesús rekosave, a'eve osepia yuvɨreko mbɨa karugwar vɨreko va'ekwer oyese oyemonde tuprɨse öi, yarakwa tuprɨse avei. A'ese oyembosɨkɨye tëi yuvɨreko,

¹⁶ iyavei osepia va'ekwer yuvɨreko mba'e oime va'e karugwar vɨreko va'e oyese, kuchi rese avei, a'e omombe'upa ambuae ava upe.

¹⁷ Evokoiyase ava ndoipotai Jesús reko vɨte agwä a'eve yuvɨreko.

¹⁸ O'a irise Jesús ɨarusu pɨpe, ko mbɨa karugwar rerekosarer oporandu chupe supi oso agwä.

¹⁹ Jesús rumo ndoipotai, aipo e'iño chupe: –Esoño nde rëtäve, nemu pɨri, a'eve emombe'u opakatu yande Yar oporoaɨsusa pɨpe mba'e oyapo va'ekwer nderese, marä e'i nderaɨsu oiko.

²⁰ A'e mbɨa oso, omombe'u opakatu tekwa Decápolis rupi Jesús oyapo va'ekwer mba'e sese; evokoiyase opakatu ndoyembovɨ'ai tëi aipo renduse yuvɨreko.

Kuña imba'easɨ va'e iyavei Jairo rayrɨ

²¹ Oyevɨse Jesús ɨarusu pɨpe ɨpa rovai oso, a'eve oñemonu'ä atɨ ava yuvɨreko chupe, a'e evokoiyase opɨtaño ɨpa popɨve.

²² Evokoiyase oyepota mbɨa mborerekwar oɨ judío ñemonu'äsa pendar, a'e serer Jairo, Jesús repiase oñenopɨ'ä sovai

²³ aipo e'i oporandu chupe: –Che rayrɨ omano pota ou; yaso teremondomi tëi ndepo i'arɨve imbogwera agwä iyavei toikove vɨtemi tëi.

²⁴ Evokoiyase Jesús oso supi, iyavei ava re'ɨi oyembotɨ tuprɨ yɨvɨi yuvɨraso.

²⁵ Ipa'üve avei oime kuña opayandepo yovaive ñuvɨrïo aravɨter rupi imba'easɨ suvɨ yepɨyere-yere va'e.

²⁶ Iparaɨsu iteanga seta oporoposano va'e ndoikatui imbogwera yuvɨreko, omomandaivete katu iposanosa pɨpe, opa tuprɨ tëi omondo mba'e vɨreko va'e. Ɨvate katuño rumo imba'erasɨsa chupe.

²⁷ Ko kuña osenduse Jesús rese ñe'ësa, ogwata sakɨkwei oso, ava re'ɨi pa'üve iturukwar rese opoko.

²⁸ Aipo e'i opɨ'a ñemoñeta rereko: “Iturukwar rese apokose rumo, akwerara.”

²⁹ A'e ramoseve voi, ndasuvɨ yepɨyere iri, ipare oyandu gwetekwer rese okwerasa omba'erasɨsa sui.

³⁰ Jesús rumo, oyandu pirätäsa osëse oyesui, sese oma'e gwakɨkwei kotɨ ava rese, ipare oporandu: –¿Ava vo opoko che turukwar rese?

³¹ Semimbo'e eta omboyevɨ yuvɨreko chupe: –Nderema'ëi vo ava oyere tuprɨ yuvɨreko nde rese, ipare ereporandu iri ‘¿Ava vo opoko che rese?’

³² Jesús rumo oma'eño vɨte ite ava oɨvɨrindar rese, uma ite pi'ä opoko che rese oya.

³³ Evokoiyase ko kuña, orɨrɨi tëi o'ä osɨkɨyepave iyavei oikwa tëi mba'e oyesendar, oso sovai oñenopɨ'ä omombe'upa tuprɨ ite mba'e supi va'e.

³⁴ Jesús aipo e'i chupe: –Che rayrɨ, erekwera kurïtëi Tüpä rese ndeyeroyasa pɨpe. Eso tuprɨ eiko erekwera ni'ä nde mba'erasɨsa sui.

³⁵ Jesús ñe'ë vɨteseve, oyepota yugweru mborerekwar oɨ judío ñemonu'äsa pendar rëtä sui imombe'u kuñatäi yesupa upe yuvɨreko: –Omano ite nde rayrɨ. ¿Ma'erä vo yamañeko tëira Porombo'esar yaiko?

³⁶ Jesús rumo, ndovɨroyai ñoite ava, aipo e'i mborerekwar oɨ judío ñemonu'äsa pendar upe: –Ani eresɨkɨye; eyeroya katuño ite.

³⁷ Ndoipotai rumo ambuae ava oyeupi icho agwä; Pedro, Santiago iyavei Juan, a'e Santiago rɨvrɨ.

³⁸ Oyepotase mborerekwar oɨ judío ñemonu'äsa pendar rëtäve osepia ava yemondɨisa oyase'o säse va'e avei,

³⁹ oike oso aipo e'i ava re'ɨi upe: –¿Ma'erä vo peräse gwasu tëi peyase'o peyu? Ko kuñatäi nomanoi, oke tëimo ou.

⁴⁰ Ava rumo opukaete-eteño Jesús reroya e'ɨ̇save yuvɨreko, a'e rumo opakatu omose ava okarve, ipare omoinge iyesupa, ichɨ iyavei oyeupindar reseve, oike oso kuñatäi re'ögwersave.

⁴¹ Ipare oipopɨsɨ aipo e'i chupe: –Talitá, cum (e'i chupe: “Kuñatäi, eñarapü'a, a'e ndeu.”)

⁴² A'e ramoseve voi, kuñatäi, opayandepo yovaive ñuvɨrïo aravɨter va'e, oñarapü'a ipare ogwata. Sepiase ava oyembosɨkɨye gwasu tëi yuvɨreko.

⁴³ Jesús rumo oyokwai imombe'u e'ɨ̇ agwä ambuae ava upe, ipare aipo e'i, pembokaru ko kuñatäi.