San Marcos 4 - Tüpä Ñe'ëngagwer

Yembo'esa tekokwer mboyoyasa mba'e mitɨ̇ rese

¹ Jesús oporombo'e iri ɨpa popɨ rupi. A'eve ava re'ɨi oyemboya yuvɨreko sese, ipare o'a Jesús ɨarusu pɨpe ɨmbe'ɨve, a'eve ogwapɨ öi, ava rumo opakatu ɨvɨ ätäsa rupi opɨtaño yuvɨreko.

² Evokoiyase ava mbo'e agwä omboyoya tekokwer mba'e tɨ̇sa rese. Oporombo'esa pɨpe aipo e'i imombe'u:

³ “Pesendu ko ñe'ësa: Ñepëi ma'etɨ̇sar osë oma'etɨ̇.

⁴ Iyavei oma'etɨ̇se, oitɨ mba'e rä'ɨi perɨ rupi ñepëi save, ipare yugweru re'ɨi vɨräi opaño ite yuvɨro'u.

⁵ Iyavei movɨ̇ro oitɨ ita pa'ü rupi, a'eve ndipoi tuprɨ ite ɨvɨ; a'e mba'e rä'ɨi sorɨ poyava voi ete, esepia ɨvɨ ndipɨkukui ete a'eve;

⁶ arɨ osëse ou, opaño ite osapɨ iyavei ndasapoi ete o'ä, opaño ite ipiru.

⁷ Iyavei ambuae mba'e rä'ɨi oitɨ yu pa'üve, a'e yu rumo sorɨ poyava katu sese opaño oyopɨ, evokoiyase a'e mitɨ̇ ndi'ai ete.

⁸ Ambuae mba'e rä'ɨi oitɨ ɨvɨ avɨye va'esave, a'e opa okwakwa mitɨ̇, i'a tuprɨai yuvɨreko; amove i'a treinta tuprɨ o'ɨ rese, amove sesenta o'a vɨreko, iyavei ambuae cien tuprɨ ite.”

⁹ Ipare Jesús aipo e'i iri: “Vɨreko va'e oapɨsa tosendu tuprɨ ko ñe'ësa.”

Ma'erä pi'ä ko yembo'esa imboyoyasa ambuae mba'e rese

¹⁰ Ipare, Jesús opɨta a'e ae, ava opɨta vɨte va'e semimbo'e eta reseve oyemboya yuvɨraso sese oporandu yuvɨreko chupe marä oya vo ko yembo'esa aipo e'i.

¹¹ A'e aipo e'i imboyevɨ: “Peü ni'ä, Tüpä oikwa uka mba'e ndikwasai va'e omborerekwasa resendar; ndache reroya potai va'e upe rumo imboyoyasa mba'e ambuae mba'e rese yepi,

¹² yepe osepia tëira, ndosepiakwai chietera rumo yuvɨreko, iyavei yepe osendu tëira, a'e rumo ndosendukwai chietera yuvɨreko, Tüpä upe oyevɨ potae'ɨ̇save, ipɨpe sui ndipoi chira ñeröisa yuvɨreko chupe.”

Jesús omombe'u tuprɨ yembo'esa mba'e tɨ̇sa resendar

¹³ Iyavei aipo e'i: “¿Ndapesendukwaimi vo aipo porombo'esa? ¿Marä, peyera ru, opakatu ambuae che porombo'esa kwa tuprɨ agwä?

¹⁴ Evokoi mba'e rä'ɨi oñotɨ̇ va'e Tüpä ñe'ëngagwer mombe'usar nungar.

¹⁵ Amove ava rekokwer inungar ko mba'e rä'ɨi seitɨprɨ perɨ rupi: osendu anga'u Tüpä ñe'ëngagwer, sendu pare rumo ou Karugwar ovɨrokwapaño oike va'e ipɨ'a pɨpe ichui.

¹⁶ Ambuae ava rekokwer inungar mba'e rä'ɨi seitɨprɨ ita pa'ü rupi: osendu anga'u Tüpä ñe'ëngagwer vorɨvetesa pɨpe,

¹⁷ ndovɨrekoi rumo gwapo oyese opirätä agwä, ndoyemovɨräkwäi ete; evokoiyase porombo'esa sui tëi iparaɨsu tekoa'äsa ouse yuvɨreko chupe, a'ese omokañɨ Tüpä rese yeroyasa yuvɨreko.

¹⁸ Ambuae ava rekokwer inungar mba'e rä'ɨi ñotɨ̇mbrɨ yu pa'ü rupi: osenduse ñe'ësa Tüpä suindar,

¹⁹ a'e rumo ipɨ'a ñemoñeta opakatu omba'e eta ko ɨvɨ pɨpendar rese saɨsusave, oyembopa uka rumo omba'e eta upe, opakatu ite mba'e vɨreko pota viña. Ipɨpe sui oyemokañɨ tëi yuvɨreko, omokañɨ tëi avei Tüpä ñe'ëngagwer. Iyavei ndoyapo ukai mba'e ikatuprɨ va'e chupe.

²⁰ Ambuae ava rumo osendu va'e Tüpä ñe'ëngagwer seroyasa pɨpe, oyapoño ite mba'e avɨye va'e, a'e inungar mba'e rä'ɨi ñotɨ̇mbrɨ ɨvɨ avɨye va'e rese. Amove vɨreko o'ɨ rese treinta, ambuae sesenta, ambuae cien tuprɨ ñepëi o'ɨ rese.”

Tataendɨ resendar porombo'esa

²¹ Iyavei aipo e'i: “¿Imondosara pi'ä tataendɨ mba'e rɨruvrɨve narä tëi iyavei yande rupavrɨve narä tëi tie no? Ani, tataendɨ yamondora ɨvate va'esave, oporoesape va'erä.

²² Egwë e'ira, ndipoi chietera mba'e ñomiprɨ ndayasepiai va'erä kuri, yepe ndikwasai chira viña ikwasa ñoitera rumo koiye katu.

²³ Vɨreko va'e oapɨsa tosendu tuprɨ.”

²⁴ Iyavei aipo e'i: “Peyapo katu mba'e pesendu va'e. Pe rembiapo nungar rupi tuprɨ asendukwa ukara che ñe'ë peü, Tüpä omondora peü; i'arɨve omondo iri katura peü.

²⁵ Akoi vɨreko va'e mba'e avɨye va'e, chupe imondosa katura; akoi ndovɨrekoi va'e, vɨreko va'e chi'ïmi ichui serokwasa ñoitera.”

Yembo'esa mba'e rä'ɨi rorɨsa sui

²⁶ Jesús aipo e'i iri avei: “Tüpä mborerekwasa ko ɨvɨ pɨpe inungar ava oñotɨ̇ va'e mba'e rä'ɨi:

²⁷ oma'etɨ̇ pare oso oke ipare koiye katu oñarapü'a, a'e oñokwa pɨ̇tü arɨ avei, evokoiyase mba'e rä'ɨi sorɨ poyava yuvɨreko, itɨ̇sar rumo ndoikwai marä e'i vorɨ.

²⁸ Ɨvɨ rese ni'ä oyesu mitɨ̇ a'e ae: yɨpɨndar sorɨ, ipare i'a iyavei koiye katu sa'ɨ̇i yuvɨnosë atɨ sese.

²⁹ Yavɨyese mba'e mitɨ̇ ipo'osa, esepia oyepota ite arɨ imonu'ä agwä.”

Yembo'esa mostaza rä'ɨi sui

³⁰ Iyavei aipo e'i Jesús: “¿Mba'e rese pi'ä oyoya Tüpä mborerekwasa, iyavei mba'e rese pi'ä yaikatura imboyoya ikwa agwä?

³¹ A'e oyoya tuprɨ mostaza rä'ɨi rese. A'e ta'ɨmi opakatu ambuae mba'e rä'ɨi sui,

³² ñotɨ̇ pare rumo sorɨ, okwakwase tuvicha katu ambuae mba'e mitɨ̇ sui, sakä tuvicha ite sese vɨräi oyemboaitɨ sovrɨ rupi yuvɨreko.”

Jesús omboyoya ambuae mba'e rese oporombo'esa yepi

³³ Egwë e'i Jesús oporombo'e Tüpä ñe'ëngagwer rese, omboyoya-yoya ñepëi mba'e ambuae, mba'e rese ava mba'ekwagwer rupi.

³⁴ Nomombe'ui ete mba'e ambuae mba'e rese imboyoya e'ɨ̇ pɨpe, a'e rumo omombe'u tuprɨ gwemimbo'e upe a'e ae yuvɨrekoise.

Jesús omombɨtu'u ɨvɨtuai

³⁵ A'e arɨ pɨpe pɨ̇türamose, Jesús aipo e'i gwemimbo'e eta upe: –Yaso ɨpa rovai.

³⁶ Evokoiyase oseya ava yuvɨreko, ipare vɨraso Jesús ɨarusu pɨpe; ambuae ɨarusu pɨpendar avei yuvɨraso supi.

³⁷ Oyepotase rumo ɨvɨtuai ipirätä va'e, ɨ o'ɨtu gwasu-gwasu va'e ɨarusu pɨpe, omboapɨpo seni yuvɨreko chupe.

³⁸ Jesús rumo oke ou sakɨkwei kotɨ, oyeatokoño atokoka pɨpe. Omoma'e aipo e'i yuvɨreko chupe: –¡Porombo'esar! ¿Nandema'emo'äimi rutei vo yande rese opara moko yakañɨ?

³⁹ Jesús opü'a evokoiyase omondo porokwaita ɨvɨtuai upe, paragwasu upe avei aipo e'i: –¡Epɨtu'u! ¡Kiriri tuprɨ epɨta! A'eseve voi ɨvɨtuai opɨtu'upa tuprɨ.

⁴⁰ Ipare Jesús aipo e'i gwemimbo'e eta upe: –¿Ma'erä pesɨkɨye iteanga? ¿Ndapeyeroya vɨtei ete vo che rese?

⁴¹ A'e rumo osɨkɨyepave, oporandu-randu oyeupe yuvɨreko: –¿Ava pi'ä ko mbɨa sekoi, esepia ni'ä ɨvɨtuai ɨpa avei omboyeroya yuvɨreko?