San Marcos 3 - Tüpä Ñe'ëngagwer

Jesús ombogwera ñepëi imba'easɨ va'e mbɨtu'usa arɨ pɨpe

¹ Jesús oike iri oɨ judío ñemonu'äsave, a'eve oime mbɨa ipo ko kotɨgwer novɨi va'e.

² A'eve fariseo omaegätu Jesús rese yuvɨreko ombogwerara pi'ä mbɨtu'usa arɨ pɨpe, yaiñe'ëngapo anga'u oyapave tëi.

³ Evokoiyase Jesús aipo e'i ko mbɨa ipo novɨi va'e upe: –Epü'a mbɨterve e'ä.

⁴ Ipare oporandu ambuae eta upe: –¿Mba'e vo yaposara mbɨtu'usa arɨ pɨpe yepi: mba'e avɨye va'e pi'ä, mba'e naporäi va'e tie? ¿Yaipɨsɨröra pi'ä ava rekokwer, anise yamokañɨ uka tëira tie? A'e rumo opaño ikiriri tuprɨ yuvɨreko.

⁵ Evokoiyase Jesús oma'e ava oyese oyere tuprɨ va'e rese vorɨe'ɨ̇save, iyavei ndovɨ'ai ava ndosendukwa katuise yuvɨreko, sese aipo e'i imba'easɨ va'e upe: –Eicho'o nde yɨva. Evokoiyase oicho'o oyɨva, okwera tuprɨ ite.

⁶ A'ese fariseo opa yuvɨnosë yuvɨraso, oyemoigätu Herodes rupindar rese Jesús yuka agwä yuvɨreko.

Ava re'ɨi ɨpa popɨ rupi yuvɨrekoi

⁷ Ipare Jesús, yuvɨraso gwemimbo'e reseve ɨpa popɨ rupi, ava re'ɨi avei ɨvɨ Galilea rupindar yuvɨraso supi.

⁸ Oyanduse mba'e sembiapo yuvɨreko, seta avei ambuae ava yugweru Judea rupindar, Jerusalén pendar, Idumea rupindar, ɨai Jordán kotɨndar avei, opakatu ava Tiro Sidón rupindar avei.

⁹ Sese, Jesús oyokwai gwemimbo'e vɨreko voi va'erä ñepëi ɨarusu, ava ombotɨ eteprɨ e'ɨ̇ agwä yuvɨreko.

¹⁰ Esepia seta ava imba'easɨ va'e ombogwera, sese opakatu ambuae imba'easɨ va'e yuvɨraso chupe sese opoko agwä.

¹¹ Iyavei ava karugwar vɨreko va'e sepiase, oñenopɨ'ä sovai säse puku-puku yuvɨreko: –¡Nde Tüpä Ra'ɨrɨ ereiko!

¹² Jesús rumo oñe'ë pirätä chupe, oyekwa uka e'ɨ̇ agwä opakatu ava upe.

Jesús oiporavo opayandepo yovaive ñuvɨrïo tuprɨ oñe'ë mombe'usar

¹³ Ipare Jesús oyeupi ɨvɨtrɨ rese oso, a'eve ava vɨroyasar upe oñe'ë iporavo agwä gwemimbotar rupi. Ichui yugweru yuvɨreko chupe,

¹⁴ a'e ipa'ü pendar osenoi opayandepo yovaive ñuvɨrïo tuprɨ gwemimbo'erä, togwataño che rupi tomombe'u Tüpä ñe'ëngagwer opakatu ɨvɨ rupi oya. A'e omondo serergwä Jesús ñe'ë mombe'usar,

¹⁵ oipɨsɨ avei mborerekwasa karugwar ava sui imboyepepɨ agwä yuvɨreko.

¹⁶ Evokoi opayandepo yovaive ñuvɨrïo yuvɨrekoi va'e: Simón, a'e serergwä akoi omondo Pedro;

¹⁷ Santiago iyavei tɨvrɨ Juan, Zebedeo ra'ɨrɨ, a'e avei omondo serergwä Boanerges (“Osunu va'e, Ra'ɨrɨ oya aipo e'i”);

¹⁸ iyavei Andrés, Felipe, Bartolomé, Mateo, Tomás, Santiago, Alfeo ra'ɨrɨ; Tadeo, Simón ava rekwa rese sekate'ɨ̇ va'e pa'ü pendarer,

¹⁹ iyavei Judas Iscariote, a'e omondo va'erä Jesús yamotare'ɨ̇sar upe.

Jesús amotare'ɨ̇mbar yuvɨrekoi va'e

²⁰ Ipare Jesús oike oɨ pɨpe, gwemimbo'e reseve a'eve oñemonu'ä atɨ irise ava yuvɨreko sese, ndiyai ikaru agwä.

²¹ Oyanduse Jesús rekokwer imu yuvɨreko, yugweru seraso agwä, ndayarakwa iri revo oya.

²² Iyavei oporombo'e va'e Moisés porokwaita rese yugweru va'e Jerusalén sui aipo e'i yuvɨreko: “Ko karugwar rerekwar Beelzebú, a'e omondo va'e ipirätäsa chupe ipɨpe sui tëi omboyepepɨ karugwar ava sui.”

²³ Evokoiyase Jesús oñe'ë, omombe'u ñepëi tekokwer, aipo e'i: “¿Marä e'ira aipo Karugwar a'e ae tëi oyeenose oyesui viña?

²⁴ Ñepëi tekwa gwasu oyemboya'ose oyeamotare'ɨ̇save, ndoyuvɨreko katui chietera;

²⁵ ñepëi oñemu va'e oyemboya'ose, ndoyuvɨreko katui chietera.

²⁶ Egwë e'i aveira, Karugwar oyemboya'ose ovava agwä oyeupe ae yuvɨreko, ndipokopɨi chira; a'e evokoiyase sekokwer okañɨ tëi va'erä ite.”

²⁷ “Ndipoi ete ni'ä ava oike va'e ava ipirätä eteprɨ va'e rëtä pɨpe imba'e rerokwapa agwä ichui, oñapɨ̇chi rane itera; ipare voi opara imba'e vɨrokwa ichui.

²⁸ Supi ete aipo a'e peü akoi ava yangaipa va'e upe Tüpä iñeröira opakatu yangaipa rese iñe'ë-ñe'ë tëisa rese avei:

²⁹ akoi iñe'ë-ñe'ë tëi va'e rumo Espíritu Maräne'ɨ̇ rese, a'e chupe ndipo iri chietera ñeröisa, yuvɨrekoira tekoasɨsa porara agwä ite.”

³⁰ Aipo e'i Jesús imboyevɨ ava upe, esepia karugwar vɨreko oyese e'i yuvɨreko chupe.

Jesús sɨ iyavei tɨvɨreta

³¹ Koiye opa oyepota Jesús rɨvrɨ eta iyavei ichɨ, a'e rumo opɨtaño okarve ichui omondo oñe'ë yuvɨreko chupe oyeupe ichë agwä.

³² Yɨvɨi ava yuvɨnoi va'e oñe'ë yuvɨreko chupe: –Nde sɨ, nde rɨvrɨ eta, nde reindrɨ reseve okarve, nde reka tëi yuvɨreko.

³³ Jesús omboyɨ chupe: –¿Uma pi'ä che sɨ iyavei che rɨvrɨ eta yuvɨrekoi?

³⁴ Evokoiyase, oma'e ava oɨvɨrindar yuvɨnoi va'e rese, aipo e'i iri chupe: –Ko che sɨ eta ko che rɨvrɨ eta.

³⁵ Esepia akoi Tüpä remimbotar oyapo va'e, a'e che rɨvrɨ, che reindrɨ che sɨ avei yuvɨrekoi.