San Marcos 2 - Tüpä Ñe'ëngagwer

Jesús ombogwera ava ndogwatai va'e

¹ Ñepëi arɨ pɨpe, Jesús oyevɨ ou tekwa Cafarnaúm ve. A'ese opakatu oyandu ñepëi oɨve sekoise,

² kurïtëimi voi ete seta ava oñemonu'ä yuvɨreko sekosave; sese ndipoi ete ava reike iri agwä oɨ pɨpe okendɨpɨ rupi, a'e rumo omombe'uño ite ñe'ësa avɨye va'e.

³ A'eseve, irugätu mbɨa vɨroyepota ndogwatai va'e yuvɨreko chupe.

⁴ A'e rumo ndiyai seroike agwä Jesús uve ava re'ɨisave, sese vɨroyeupi oɨ arɨve seraso, a'eve teka vɨrokwa oɨ arɨ sui supi vɨroyɨ supa reseve imondo Jesús rovai tuprɨ yuvɨreko.

⁵ Jesús oikwase ko mbɨa yuvɨrekoi va'e oyese yeroya, a'ese aipo e'i imba'easɨ va'e upe: –Che ra'ɨrɨ, che ñerö nde angaipa rese ndeu.

⁶ Oime aipo Moisés porokwaita rese oporombo'e va'e, a'eve ogwapɨ va'e yuvɨnoi ipɨ'a ñemoñeta yuvɨreko:

⁷ “¿Ma'erä pi'ä ko mbɨa aipo e'iño tëi oñe'ë? A'e oyemboɨvateai tëi va'e Tüpä ñe'ëngagwer pɨpe tëi oñe'ë. Tüpä gweraño ni'ä oikatu ava angaipa upe oñeröi agwä.”

⁸ Jesús rumo oikwa voiño ite ipɨ'a ñemoñetasa, sese oporandu chupe: –¿Ma'erä vo pepɨ'a ñemoñetarai tëi che rese?

⁹ ¿Uma rupi vo ñe'ësa ndayavai katu, ndogwatai va'e upe: ‘Nde angaipa rese che ñerö ndeu’, anise aipo esara tie chupe: ‘Eñarapü'a, esupi nde rupa egwata kurïtëi’?

¹⁰ Che amboyekwara ava ɨvate katu va'e Ra'ɨrɨ che mborerekwasa ko ɨvɨ pɨpe ava angaipa upe che ñerö agwä. Evokoiyase aipo e'i ndogwatai va'e upe:

¹¹ –Ndeu aipo a'e, eñarapü'a, esupi nde rupa eso nde rëtäve.

¹² Imba'easɨ va'e aipo i'e ramoseve oñarapü'a, osupi vupagwer osë oso ichui, opakatu ava rembiepiave. Sese opakatu oyepɨ'amondɨi ipɨpe sui omboetei Tüpä aipo e'i yuvɨreko: –Yɨpɨsuive ndayasepiai va'e ite ko nungar mba'e e'i tëi yuvɨreko.

Jesús oñe'ë Leví upe

¹³ Ipare Jesús oso iri ɨpa ɨvɨi; a'eve oporombo'e oyese ava re'ɨi yemboyase.

¹⁴ Ichui ogwata vɨtese osepia Leví, Alfeo ra'ɨrɨ, ogwapɨ öi gwarepochi rerokwasar Roma pendar uve narä. A'ese Jesús aipo e'i chupe: –Erio che rupi. Evokoiyase Leví opü'a oso supi.

¹⁵ Ipare aipo Jesús yuvɨraso okaru Leví rëtäve, a'eve seta gwarepochi rerokwasar Roma pendar upe narä, ava ndasekoporäi va'e avei yuvɨrogwapɨ aipo karusa rendave Jesús semimbo'e avei, esepia ni'ä seta iteanga ava yuvɨrogwata va'e supi.

¹⁶ Oime aipo oporombo'e va'e Moisés porokwaita rese, a'e Fariseo yuvɨrekoi, osepiase aipo Jesús okaruse opakatu a'e ava pa'üve, a'ese oporandu semimbo'e eta upe yuvɨreko: –¿Ma'erä ru pe mbo'esar okaru ava gwarepochi rerokwasar iyavei yangaipa gwasu va'e pa'üve tëi?

¹⁷ Jesús osenduse, aipo e'i chupe: –Ava nimaräi va'e ndosekai ete oporoposano va'e, imba'easɨ va'eño ni'ä oseka yuvɨreko. Che ndayui ava seko tuprɨ va'e reka, che rumo ayu ava yangaipa va'e reka.

Porandusa yekwakusa rese

¹⁸ Ñepëi arɨ pɨpe Juan Oporoapirämo va'e remimbo'e oyekwaku yuvɨreko fariseo eta aveino, oime aipo movɨ̇ro tëi ava yuvɨraso oporandu Jesús upe: –Esepia Juan remimbo'e iyavei fariseo eta oyekwaku yuvɨreko: ¿Ma'erä ru nde remimbo'e ndoyekwakui ete yuvɨreko?

¹⁹ Jesús omboyevɨ chupe: –¿Iyara pi'ä ava icho'oprɨ mendasave iyekwaku agwä, imer oikove vɨtese ipa'üve? Oikove vɨtese imer ndoikatui chietera oyekwaku agwä yuvɨreko.

²⁰ Oimerä rumo arɨ imer reraso agwä ichui kuri; a'ese ramo oyekwakura yuvɨreko.

²¹ “Ndiyai yayapete turukwar kwakwa turukwar ipɨasu va'e pɨpe, esepia ni'ä ipɨasu va'e oicho'o turukwar kwakwa imondoro iri agwä, ichorosa evokoiyase tuvicha katu-katuño ite.

²² Iyavei uva rɨkwer ipɨasu va'e ndiyai ñoñasa mba'e pirer kwakwa pɨpe, esepia uva rɨkwer ipɨasu va'e osose mba'e pirer kwakwa va'e pɨpe ombopuñorä, uva rɨkwer evokoiyase okañɨpa tëira mba'e pirer okañɨ tëi aveira. Sese uva rɨkwer ipɨasu va'e ñoñasara mba'e pirer ipɨasu va'e pɨpe yepi.”

Jesús remimbo'e oipo'o trigo mbɨtu'usa arɨ pɨpe yuvɨreko

²³ Ñepëi mbɨtu'usa arɨ pɨpe, Jesús ogwata gwemimbo'e eta rese trigo pa'ü rupi, oñokwäse aipo oipo'o trigo rä'ɨi yuvɨreko.

²⁴ A'ese fariseo eta oporandu yuvɨreko chupe: –Esendu, ¿Ma'erä nde remimbo'e mbɨtu'usa arɨ pɨpe oporavɨkɨño yuvɨreko?

²⁵ A'e rumo aipo e'i chupe: –¿Nda peyerokɨi vo ikwachiaprɨ araka'endar pɨpe mborerekwar gwasu David rembiapokwer rese akoi ndasɨepoise ondugwer reseve yuvɨreko araka'e?

²⁶ Pa'i rerekwar ɨvate katu va'e sekoise Abiatar, a'ese David oike Tüpä rëtä pɨpe o'u mboyape sovasaprɨ Tüpä upendar, pa'i upeño ite ipotasa o'u agwä; a'e rumo omondo avei ava oyeupindar upe.

²⁷ Jesús aipo e'i iri: –Mbɨtu'usa arɨ yaposa ava upe narä, nda'ei ava yaposa mbɨtu'usa arɨ upe narä.

²⁸ Evokoiyase, ava ɨvate katu va'e Ra'ɨrɨ vɨreko ite omborerekwasa mbɨtu'usa arɨ rese.