San Marcos 13 - Tüpä Ñe'ëngagwer

Jesús omombe'u tüpäro monduru agwä

¹ Jesús osëse tüpäro pɨpe sui, ñepëi semimbo'e aipo e'i chupe: –¡Porombo'esar, esepia oɨ ita imopü'aprɨ ikatuprɨai!

² Jesús omboyevɨ chupe: –¿Pesepia ko oɨ tuvicha va'e ite? Ndipoi chietera rumo ñepëi ita oye'a vɨte va'e. Opakatu ite imondurusara kuri.

Poromondɨisa oimerä Kañɨ renonde

³ Ipare yuvɨraso ɨvɨtrɨ Olivos ve, a'e ɨvɨtrɨ tüpäro rovai. A'eve Jesús ogwapɨ öi, ichui Pedro, Santiago, Juan iyavei Andrés oporandu kokotɨ mba'e rese yuvɨreko chupe

⁴ maräse vo oimerä aipo nungar, mba'e poromondɨisa rese vo ikwasara kuri.

⁵ Jesús omboyevɨ chupe: “Peikwa katu peyembopa ukai rene ambuae ava upe.

⁶ Esepia seta ava yugwerura cherer pɨpe. Aipo e'ira yuvɨreko: ‘Che ni'ä Poropɨsɨrösar aiko’, iyavei seta ombopara ava yuvɨreko kuri.”

⁷ “Pesenduse rumo ñe'ësa vavasa resendar ko'ave iyavei ambuae rupi, ndapeyembosɨkɨyei chietera. Esepia ni'ä oime rane itera evokoi nungar; nde'i vɨtei chira rumo arɨ kañɨ ipa va'e.

⁸ Esepia ñepëi ɨvɨ pɨpendar ovavara ambuae ɨvɨ pendar rese iyavei ñepëi tekwa gwasu ovavara ambuae ɨvɨ pendar rese; iyavei oimerä ɨvɨ rɨrɨi opakatu-katu tëi tekwa rupi, tɨavor avei. Ko rumo omboɨpɨ ramomirä mba'e tëi porarasa.”

⁹ “Peñearö katu peae peiko; esepia pe rerasora mborerekwar rovai yuvɨreko, iyavei pe nupära oɨ judío ñemonu'äsa rupi. Pe reraso aveira mborerekwareta rovai, iyavei mborerekwar ɨvate katu va'e rovai che rekokwer sui tëi yuvɨreko; egwë peyera peñe'ë che rekokwer rese chupe.

¹⁰ Kañɨ renonde rumo, ko ñe'ësa pɨsɨrösa resendar opakatu rane ite ava upe ikwa ukasara ɨvɨ rupi.

¹¹ Iyavei mba'e pi'ä amombe'ura chupe ndapeyei chira pe mondose mborerekwar rovai yuvɨreko. A'eve voi ete omboyekwara Tüpä peñe'ë agwä peü, esepia nda'ei chira peyesui tëi peñe'ë, Espíritu Maräne'ɨ̇ ite oñe'ëra.

¹² Oñemu yuvɨrekoi va'e omondoñora vɨvrɨ yuka uka agwä, iyavei iyesupa eta omondo uka aveira gwa'ɨrɨ yuka uka agwä; iyavei ta'ɨreta oyemboyerera yamotare'ɨ̇ oyesupa yuka uka agwä yuvɨreko.

¹³ Opakatu avei ava ɨvɨ pɨpendar ndape ambotai chira che rekokwer sui tëi yuvɨreko; akoi ava oyemovɨräkwä va'eño rumo arɨ ipa va'e rupi, a'e ipɨsɨröprɨ yuvɨrekoira.”

¹⁴ “Pesepiase tüpäro maräne'ɨ̇ pɨpe mba'e-mba'e tëi aposa–akoi oyerokɨ va'e, a'e tosendukwa tuprɨ–, evokoiyase akoi yuvɨrekoi va'e ɨvɨ Judea rupi, toñemi poyava ɨvɨtrɨ rese yuvɨreko;

¹⁵ iyavei akoi gwëtä arɨve sekoi va'e, a'e arɨ togweyɨ iri eme gwëtäve mba'e renose agwä;

¹⁶ iyavei akoi ka'a pɨpe sekoi va'e, toyevɨ iri eme ou oyeaosa renose agwä.

¹⁷ ¡Iparaɨsu itera kuña ipuru'a va'e, a'e arɨ pɨpe imembɨ pitani va'e avei!

¹⁸ Peporandu Tüpä upe toime eme ko nungar mba'e so'ɨ̇sa va'e pɨpe peü,

¹⁹ esepia a'e arɨ pɨpe oimerä tekoasɨsa gwasu a'e ndipoi va'e yɨpɨ suive Tüpä ɨvɨ aposa suive; ipare rumo ndipo iri chietera evokoi nungar.

²⁰ Iyavei yande Yar nomombɨtu'uise arɨ naporäi va'e, ndipoi chietera oñepɨsɨrö va'e yuvɨreko viña; a'e rumo omombɨtu'ura gwembiporavo raɨsusa pɨpe.”

²¹ “Akoi oimese aipo e'i va'e peü: ‘Pesepia, ko Poropɨsɨrösar sekoi’, anise ‘Pesepia, peve sekoi’, ndaperoyai chietera rumo.

²² Esepia yugwerura ava che Poropɨsɨrösar aiko e'i tëi va'e iyavei che amombe'u Tüpä ñe'ëngagwer e'i va'e; iyavei oyapora mba'e ava ndoyapoi va'e poromondɨisa gweko pirätäsa mboyekwa agwä yuvɨreko. Avɨyeteramo ombopa aveira ava Tüpä reroyasar.

²³ ¡Peikwa katura! Opa aipo amombe'u senondeve peü.”

Ava ɨvate katu va'e Ra'ɨrɨ yevɨsa

²⁴ “A'e arɨ pɨpe rumo ko mba'e-mba'e tëi pare ndoyekwa iri chira arɨ, yasɨ avei ndosesape iri chira,

²⁵ yasɨtata avei opara ovɨapi ɨva sui iyavei ɨva resendar mba'e orɨrɨira yuvɨreko.

²⁶ A'ese che ayura ava ɨvate katu va'e Ra'ɨrɨ ɨva kɨ'a rese ayekwa itera che pirätäsa pɨpe che rendɨgwer porañetesa pɨpe avei.

²⁷ Amboura che rembigwai eta ɨva pendar, ichui omonu'ära opakatu ɨvɨ rupindar che rembiporavo yuvɨreko, amombrɨ rupi yuvɨrekoi va'e, ɨva rese yuvɨrekoi va'e avei.”

²⁸ “Peyembo'era ɨvɨra higuera rekokwer sui: Ko ɨvɨra ikwasa säka sokɨ ramose, a'e peikwa köimi arɨ saku va'e yepota agwä yepi.

²⁹ Na e'i aveira ni'ä, peü che ñe'ë rupi tuprɨ mba'e pesepiase, sese peikwara che ava ɨvate katu va'e Ra'ɨrɨ köimi ete che yevɨ agwä.

³⁰ Supi ete aipo a'e opakatu oime rane itera osepia va'e omano e'ɨ̇ vɨte seve ava kurïtëindar yuvɨreko.

³¹ Ɨva iyavei ɨvɨ opara okañɨ, che ñe'ëngagwer rumo imboavɨyesa rane itera.”

³² “Ndipoi ete rumo ava oikwa va'e arɨ che yevɨ agwä, iyavei che Ru rembigwai ɨva pendar avei ndoikwai yuvɨreko, Che avei ndaikwai ete. Che Ru gweraño ite rumo oikwa.

³³ Sese ni'ä, pema'emo'ära yepi che räröra peye, esepia ni'ä ndikwasai che yevɨ agwä.

³⁴ Inungar akoi mbɨa amombrɨ oso pota agwä renonde, ambuae tekwa rupi, oyokwai gwembigwai gwëtä rärö agwä. Omondo avei ñepëi-pëi upe iporavɨkɨ agwä, omondo avei gwëtä rokendɨpɨ rärö agwä.

³⁵ Pe evokoiyase pema'emo'ära, esepia ndapeikwai maräse oyevɨra oɨ yar peü, avɨyeteramo pɨ̇tü ramosë, pɨ̇tü mbɨter, takura ñe'ëse anise añi'ïvëi;

³⁶ avɨyeteramo oura iyavei osepiara peker tëi ou.

³⁷ Che aipo a'e peü, opakatu upe avei: ¡Pema'emo'äño itera yepi!”