San Marcos 11 - Tüpä Ñe'ëngagwer

Jesús oike Jerusalén pɨpe

¹ Ovɨrovɨse tekwa Jerusalén yuvɨraso, serovɨkave oime ñuvɨrïo tekwami Betfagé iyavei Betania ɨvɨtrɨ Olivos ɨpɨ̇imi, a'eve Jesús omondo ñuvɨrïo gwemimbo'e,

² aipo e'i chupe: –Peso evokoi tekwami yande rovaindarve. Peyepotase a'eve, pesepiara gwariku ñapɨ̇chimbrɨ imo'ä, ava ndoyeupi vɨtei va'e yuvɨreko sese. A'e peyorañorä seru.

³ Akoi ava ma'erä vo egwë peye e'ise peü, ore Yar oiporu pota, ipare ni'ä omboyevɨ voiñorä peyera chupe.

⁴ Evokoiyase a'e yuvɨraso perɨ rupi, a'eve gwariku ñapɨ̇chimbrɨ osepia imo'ä okendɨpɨve, ichui oyoraño seru yuvɨreko.

⁵ Oime aipo ava a'e pendar oporandu yuvɨreko chupe: –¿Mba'e vo peyapo? ¿Ma'erä vo peyora gwariku?

⁶ A'e rumo omboyevɨ yuvɨreko chupe Jesús ombo'esa rupi tuprɨ ite; ipare opoiño yuvɨreko ichui seraso agwä.

⁷ Ipare omondo oturukwar gwariku arɨve, ichui vɨraso Jesús upe yuvɨreko. A'ese Jesús oyeupi i'arɨve.

⁸ Seta ava oipɨpira oturukwar perɨ rupi, iyavei ambuae ava evokoiyase oyasɨa pindo omondo perɨ rupi saperä yuvɨreko.

⁹ Iyavei ava re'ɨi seta senonendar, egwë e'i avei sakɨkwerindar, a'e säse pirätä yuvɨreko chupe aipo e'i: –¡Imboeteiprɨ! ¡Sovasaprɨ tasekoi ou va'e yande Yar rer pɨpe!

¹⁰ ¡Sovasaprɨ yande yesupa David mborerekwasa tasekoi ou va'e! ¡Ɨvave imboeteiprɨ avei tasekoi!

¹¹ Egwë e'i Jesús oikese Jerusalén ve, ipare oso tüpäro pɨpe. A'eve opakatu rupi mba'e rese oma'e ipare oso Betania ve opayandepo yovaive ñuvɨrïo gwemimbo'e rese, esepia ni'ä ka'aru eteprɨ ite.

Jesús vɨreko megwä higuera ndi'ai va'e

¹² A'ere arayi'ive, yuvɨnosese tekwa Betania sui, Jesús ndasɨepoi ete.

¹³ Osepiase amombrɨve ɨvɨra higuera soatɨ va'e, sese oyemboya oso i'a pi'ä oyapave, a'e rumo osepia sopäve tëi sese, esepia a'e ɨvɨra upe ndosupitɨ vɨtei i'a agwä.

¹⁴ Evokoiyase aipo e'i a'e higuera upe: –¡Ko pɨpe suive ndipo iri chira ava nde'a yuvɨro'u va'erä! Semimbo'e eta osendu iñe'ë yuvɨreko.

Jesús omoatɨrö tüpäro pɨpe

¹⁵ Oyepota pare Jerusalén ve yuvɨreko, Jesús oike tüpäro pɨpe ipare omboɨpɨ imosepa ichui ava mba'e mondosar iyavei mba'e rerokwasar. Opa ombovapɨ mba'e renda imondo ava gwarepochi rekuñarösar sui, iyavei apɨkasu mondosar renda avei ombovɨapi imondo;

¹⁶ iyavei ndoipotai ete ambuae mba'e seroikepɨrä tüpäro pɨpe.

¹⁷ Ipare oporombo'e aipo e'i: –Ikwachiaprɨ araka'endar pɨpe aipo e'i: ‘Ko che rëtä yeruresa rëtära opakatu ava ɨvɨ pɨpendar uve narä’, pe rumo imondarai va'e rëtä nungar tëi pereko.

¹⁸ Aipo osenduse, pa'i eta rerekwar iyavei oporombo'e va'e Moisés porokwaita rese omboɨpɨ voi ete seka marä e'ira Jesús yuka uka agwä yuvɨreko, a'e rumo osɨkɨye tëi, esepia opakatu ndoyembovɨ'ai tëi iporombo'esa rese yuvɨreko.

¹⁹ Pɨ̇tü ramomise, Jesús yuvɨnosë gwemimbo'e eta reseve yuvɨraso a'e tekwa sui.

Porokwaita Tüpä reroyasa resendar

²⁰ Arayi'ive rupi yuvɨraso ɨvɨra higuera ɨvɨi, a'eve osepia sapo suive ipirupase yuvɨreko.

²¹ Evokoiyase Pedro, oyemoma'endu'a voi iñe'ë agwer rese, sese aipo e'i Jesús upe: –Porombo'esar, esepia ko ɨvɨra higuera upe ereñe'ërai va'ekwer, opa ite ipiru.

²² Jesús omboyevɨ aipo e'i: –Peyeroya katu Tüpä rese.

²³ Supiete aipo a'e peü akoi aipo e'i va'e ɨvɨtrɨ upe: ‘¡Esɨrɨ avesui evɨapɨ eso paragwasu pɨpe!’, iyavei ndape yapoi chira ate'ɨ̇sa pɨpe, ko peroya itera aipo peye va'e, a'ese egwë e'i etera kuri.

²⁴ Sese aipo a'e peü opakatu mba'e rese peporanduse pe yeruresa pɨpe, peyeroya itera mba'e oime va'erä rese peü, a'ese peipɨsɨ itera.

²⁵ Iyavei akoi peyerurese, yɨpɨndar peñeröi rane pe amotare'ɨ̇mbar upe, a'ese egwë e'i aveira pe Ru ɨva pendar iñeröira pe angaipa rese peü.

²⁶ Egwë ndapeyeise rumo pe Ru ɨva pendar avei niñeröi chira pe angaipa rese peü.

Jesús mborerekwasa

²⁷ Ipare oyevɨ Jerusalén ve yuvɨreko. Ogwata vɨte seve Jesús tüpäro pɨpe, oyemboya sese yuvɨreko pa'i eta rerekwar, Moisés porokwaita rese oporombo'e va'e, iyavei ava rerekwar tekwa pendar,

²⁸ ipare oporandu yuvɨreko chupe: –¿Ava nde kwaita pɨpe vo ereyapo ko nungar eiko? ¿Ava vo ombou nde mborerekwasa ndeu ko nungar apo agwä?

^29-30 Jesús omboyevɨ aipo e'i chupe: –Che avei aporandura ñepëi mba'e rese peü: ¿Ava vo Juan ombou ava apirämo agwä; Tüpä pi'ä ava tëi tie? Pemboyevɨse cheu, a'ese che avei amombe'ura peü ava porokwaita rupi ete pi'ä ayapo ko mba'e vichiko.

³¹ A'e evokoiyase oñemoñeta aipo e'i oyeupe yuvɨreko: “Yamboyevɨse chupe viña Tüpä ombou, a'e aipo e'ira: ‘Evokoiyase, ¿ma'erä ru ndaperoyai?’ e'ira yandeu.

³² ¿Marä ya'era vo aipo chupe ava tëi remimbou?...” A'e osɨkɨye tëi ambuae ava sui yuvɨreko, esepia opakatu ite oikwa Juan Tüpä ñe'ë mombe'usar sekoise yuvɨreko yepi.

³³ A'ese omboyevɨ Jesús upe yuvɨreko: –Ndoroikwai ete. Evokoiyase Jesús omboyevɨ chupe: –Sese che avei a'e iporokwaita pɨpe ko mba'e ayapo nda'ei chietera peü.