Los Hechos 5 - Tüpä Ñe'ëngagwer

Ananías iyavei Safira yemboangaipa agwer

¹ Oime ñepëi mbɨa serer va'e Ananías, iyavei sembireko rer Safira a'e oyemboyoya ɨvɨ mondo yuvɨreko.

² A'e mbɨa rumo, omboya'o seprɨ ñepëi iya'okwer vɨreko oyeupe narä, ambuae iya'okwer vɨraso Jesús ñe'ë mombe'usar upe, sembireko avei oikwa tëi opakatu.

³ Pedro aipo e'i chupe: –Ananías, ¿ma'erä ereroya Karugwar nde pɨ'a pɨpe Espíritu Maräne'ɨ̇ mbopa agwä eremboya'oño tëi nde ɨvɨ reprɨ gwarepochi ndeyeupe narä?

⁴ ¿Nda'ei vo nde mba'e ite ɨvɨ viña? Eremondo ite ni'ä, ¿evokoiyase nde mba'e ite gwarepochi? ¿Ma'erä ereyapo ko nungar? Nda'ei ava upe nde remirä, Tüpä upe ite rumo nde remirä.

⁵ Osenduse Pedro ñe'ësa, ovɨapi se'ögwer oso sovai. A'ese opakatu oyandu va'e osɨkɨye tëi yuvɨreko.

⁶ Ipare mbɨa chi'ïvä'e yugweru, osupi se'ögwer oipoke seraso yuvɨreko ñotɨ̇ agwä.

⁷ Koiye katumi Ananías sembireko oike oɨ pɨpe, ndoikwa vɨtei rumo omer mano.

⁸ Pedro oporandu chupe: –Emombe'u cheu, ¿ko gwarepochi retakwer rupi ete vo pemondo pe ɨvɨ? A'e kuña omboyevɨ chupe: –A'e seprɨ rupi ete oromondo.

⁹ Pedro aipo e'i chupe: –¿Ma'erä vo peyemboyoya pemondo va'erä yande Yar Espíritu tekoa'äsa pɨpe? Evokoi yugweru vɨraso va'e nde mer ñotɨ̇ yuvɨreko, kurïtëi nde avei nde rerasora yuvɨreko.

¹⁰ A'e ramoseve avei ovɨapi Safira Pedro rovai omano oso. Mbɨa chi'ïvä'e yuvɨroikese, ipare vɨraso voiño ite se'ögwer imer ɨvɨi ñotɨ̇ agwä yuvɨreko.

¹¹ Iyavei opakatu yuvɨrekoi va'e tüpäro pɨpendar, ambuae ava avei oyembosɨkɨye tëi, opakatu tuprɨ ko mba'e oyanduse yuvɨreko.

Seta poromondɨisa yaposa

¹² Jesús ñe'ë mombe'usar rupi seta ite mba'e yaposa va'e poromondɨisa ava pa'ü rupi; iyavei opakatu oñemonu'ä yuvɨreko tüpäro Salomón rembiapo agwer va'esave yuvɨreko.

¹³ Ndipoi ete ambuae oyemboya va'e yuvɨreko sese, ava yuvɨrekoi va'e tekwa pɨpendar rumo seta katu saɨsupar yuvɨreko.

¹⁴ Oyemboeta katu yande Yar reroyasar, seta kuimba'e seta avei kuña.

¹⁵ Iyavei ava re'ɨi vɨnose yuvɨreko imba'easɨ va'e, supa reseve-seve Pedro renonderä, oñokwäse Pedro avɨyeteramo omo'ära i'ägwer a'ese revo ombogwerara e'i yuvɨreko oyeupe.

¹⁶ Ava Jerusalén ɨvɨrindar avei gweru omonu'ä seta imba'easɨ va'e, karugwar rese yuvɨrekoi va'e Jesús ñe'ë mombe'usar upe imbogwerapɨrä; a'e evokoiyase opakatu ombogwera yuvɨreko.

Jesús ñe'ë mombe'usar yamotare'ɨ̇prɨ yuvɨrekoi

¹⁷ Ichui tëi pa'i rerekwar ɨvate katu va'e, saduceo yuvɨrekoi va'e oñemoɨrö yuvɨreko Jesús ñe'ë mombe'usar upe ava rese gwekate'ɨ̇save,

¹⁸ sese oipɨsɨ osokendapa uka yuvɨreko.

¹⁹ Ipare ñepëi mbigwai Yar suindar pɨ̇tü pɨpe omboipa poroekendasa rokenda opa vɨnose ichui, aipo e'i chupe:

²⁰ “Peso tüpärove, pemombe'u avei ava upe ko ñe'ësa tekokwer pɨasu resendar.”

²¹ Ko mba'e rendu pare, supi tuprɨ ite oyapo yuvɨreko, a'ere arayi'ive ko'ë ramoseve yuvɨraso tüpärove ava mbo'e agwä. A'eseve, pa'i rerekwar ɨvate katu va'e, supindar avei osenoi opakatu tekwa pɨpendar mborerekwar Ñemonu'ä agwä ɨvate katu Va'esave, omondo yuvɨreko gwembigwai Jesús ñe'ë mombe'usar reru agwä sokendasa sui a'eve narä viña.

²² Oyepotase rumo sembigwai yuvɨreko, oseka tëi sokendaprɨ. Ichui oyevɨ tëi yuvɨreko imombe'u,

²³ aipo e'i: –Oroyepotase ava rokendasave, orosepia opakatu okenda imboyaprɨ tuprɨ iyavei orosepia opakatu okendɨpɨ rupi särösar osärö tuprɨ ite; oromboise rumo okenda, ndipoi ete ava sokendaprɨ ipɨpe.

²⁴ Osenduse, pa'i rerekwar ɨvate katu va'e tüpäro rärösar rerekwar pa'i rerekwareta avei yuvɨreko ipɨ'añemoñeta tëi kerupi vo opoira ko mba'e sui, e'i tëi yuvɨreko oyeupe.

²⁵ A'ese ñepëi mbɨa, oyepota imombe'u: –Evokoi pesokenda va'ekwer, a'e mbɨa kurïtëi oporombo'e tüpärove yuvɨreko.

²⁶ Evokoiyase Sundao rerekwar, osundao reseve yuvɨraso seru agwä mba'e tuprɨ pɨpe, esepia osɨkɨye ite ava sui oapi-api agwä ita pɨpe yuvɨreko.

²⁷ Vɨroyepotase yuvɨreko, Ñemonu'äsa ɨvate katu Va'esave, a'ese evokoi pa'i rerekwar ɨvate katu va'e aipo e'i chupe:

²⁸ –Ore oroiko va'e, ndoroipotai ete peporombo'e agwä evokoi mbɨa rekokwer rese. ¿Iyavei pe mba'e vo peyapo peiko? Opa ite oikwa peporombo'esa opakatu Jerusalén pɨpe yuvɨreko, iyavei oremoangaipa pota peye evokoi mbɨa yuka agwer rese.

²⁹ Pedro, omboetasa reseve, omboyevɨ pa'i rerekwar ɨvate katu va'e upe yuvɨreko: –Ore kwaita ite Tüpä mboyeroya agwä nda'ei chira rumo ava tëi rane oromboyeroyara.

³⁰ Yepe peyatɨka peyuka uka Jesús kurusu rese viña, yande Ru Tüpä rumo akoi yande ramoi eta vɨroya va'e, a'e ite ombogwerayevɨ.

³¹ Ipare oseko mboɨvate ɨvave oakato kotɨ imbogwapɨ imoi, a'e ni'ä Mborerekwar iyavei Poropɨsɨrösar, tomboasɨ oangaipa, toyevɨ cheu, toipɨsɨ angaipa resendar ñeröisa yuvɨreko oya Tüpä Israel suindar upe.

³² Ore Tüpä rembiapo repiasarer imombe'u agwä oroiko, Espíritu Maräne'ɨ̇ avei oñe'ë ore ñe'ë rupi ava upe, a'e akoi Tüpä ombou va'e vɨroyasar upe.

³³ Osenduse mborerekwar aipo ñe'ësa, oñemoɨrö iteanga yuvɨreko, oyukapa pota opakatu Jesús ñe'ë mombe'usar yuvɨreko viña.

³⁴ Mborerekwar pa'ü pendar rumo oime mbɨa fariseo Gamaliel serer va'e, a'e Moisés porokwaita rese oporombo'e va'e iyavei imboeteiprɨ katu va'e. A'e opü'a oporokwai toyuvɨnose raimi okarve Jesús ñe'ë mombe'usar.

³⁵ Ipare aipo e'i ambuae mborerekwareta upe: –Che mu, Israel pendar peikwa katu mba'e apo agwä evokoi mbɨa upe yuvɨreko.

³⁶ Peyemoma'endu'a Teudas rekokwer rese, esepia ni'ä akoi oyemboɨvate aisa pɨpe vɨrogwata cuatrocientos ava oyeupi arakako. Ipare akoi oyuka yuvɨreko, a'ese supindar opa oñemosaï tëi yuvɨreko, a'e peve sekokwer opa.

³⁷ Koiye katu, omombe'use mborerekwar Roma pendar ava retakwer kwa agwä, a'ese Judas, Galilea pendar oyemomborerekwa, seta avei ava ogwata yuvɨreko supi; a'e avei rumo oyuka yuvɨreko, opa tuprɨño avei supindar oñemosaï tëi yuvɨreko.

³⁸ Sese kurïtëi, peyapoi rene mba'e ko ava upe yaseyaño. Esepia evokoi mba'e sembiapo ndipokopɨi chira oyapose opirätäsa pɨpe tëi yuvɨreko.

³⁹ Tüpä suindarse rumo, ndapemombɨtu'u katui chietera. Peikwa katu, anichira peñamotare'ɨ̇ Tüpä ipɨpe tëi. Aipo i'ese opakatu imboetasa vɨroya yuvɨreko.

⁴⁰ Ichui rumo gweru iri Jesús ñe'ë mombe'usar inupa uka agwä yuvɨreko, iyavei iñe'ë iri e'ɨ̇ agwä Jesús rese; inupa pare opa omose yuvɨreko.

⁴¹ Ipɨpe Jesús ñe'ë mombe'usar ovɨ'arete iteanga, esepia Tüpä ombou chupe iparaɨsu agwä yuvɨreko Jesús rer rese iyeroyasa sui tëi.

⁴² Ipare ndopoi ete arɨ yakatu Poropɨsɨrösar Jesús rekokwer mombe'usa sui, omombe'uño ite tüpäro pɨpe iyavei opakatu ava rëtä rupi yuvɨreko.