Los Hechos 2 - Tüpä Ñe'ëngagwer

Espíritu Maräne'ɨ̇ gweyɨ agwer resendar

¹ Oyepotase Pentecostés pieta, opakatu Jesús reroyasar oñemonu'ä oɨ gwasu pɨpe yuvɨreko.

² A'eve oɨ pɨpe avɨyeteramo tëi ɨvɨtu ipirätä va'e nungar sɨapu gwasu ou ɨva sui, a'e sɨapugwer oyeendupa tuprɨ oɨ pɨpe.

³ A'ese oyekwa tata rendɨgwer nungar opakatu a'eve yuvɨrekoi va'e arɨve.

⁴ A'ese avei Tüpä omoinge evokoi ava pɨ'a pɨpe Espíritu Maräne'ɨ̇, ichui a'e Espíritu omoñe'ë uka ambuae ñe'ësa pɨpe yuvɨreko.

⁵ A'e arɨ pɨpe seta iteanga judío yuvɨrekoi Jerusalén ve omboavɨye va'e okwaita Tüpä mboeteisa, a'e oñemonu'ä va'e opakatu ɨvɨ rupindar yuvɨreko.

⁶ Mba'e sɨapu gwasu va'e renduse, oñemonu'ä atɨ tëi ava oyese, ndoyemboarakwai tëi yuvɨreko ambuae ava oñe'ëse oñe'ë pɨpe yuvɨreko.

⁷ Too e'i tëi oyepɨ'amondɨisa pɨpe, sese aipo e'i yuvɨreko: –¿Nda'ei vo akoi ko ava Galilea ɨgwar oñe'ë va'e yuvɨreko?

⁸ ¿Ma'erä pi'ä ko ñepëi-pëi oñe'ë yande ñe'ë pɨpe yuvɨreko?

⁹ Esepia, ko'ave yuvɨrekoi va'e: Partias pendar, Media pendar, Elam pendar, Mesopotamia pendar, Judea pendar, Capadocia pendar, Ponto pendar, Asia pendar,

¹⁰ Frigia pendar, Panfilia pendar, Egipto pendar, Libia kotɨndar, a'e Cirene rerovɨka pendar. Iyavei Roma pendar;

¹¹ judío yuvɨrekoi va'e, ambuae judío arakwasa reroyasar avei. Creta pendar, Arabia pendar. ¡Yande yasendu opakatu yandeu iñe'ë yuvɨreko yande ñe'ë pɨpe Tüpä rembiapo ikatuprɨ va'e rese!

¹² Opakatu oyepɨ'amondɨi iyavei ndoikwai opɨ'añemoñeta agwä yuvɨreko; ipare oporandu-randu oyeupe ae tëi yuvɨreko: –¿Marä e'i pi'ä ko na oya yuvɨreko?

¹³ Ambuae ava rumo, seroɨrösa pɨpe aipo e'iño yuvɨreko: –¡Osavaɨpo mo evokoi yuvɨreko!

Pedro omombe'u ñe'ësa avɨye va'e Tüpä suindar

¹⁴ Evokoiyase Pedro opü'a opakatu opayandepo yovaive ñepëi va'e Jesús ñe'ë mombe'usar pa'ü sui oñe'ë pirätä aipo e'i: “Che mu judío eta, opakatu Jerusalén pendar avei, peikwa ko mba'e amombe'u va'erä peü; peyapɨsaka tuprɨ che ñe'ë rese.

¹⁵ Ko mbɨa ndosavaɨpoi ete yuvɨreko, ndapeikwai vo kurïtëi añi'ivëi vɨte.”

¹⁶ Ko ni'ä Tüpä ñe'ë mombe'usar Joel oikwachia va'e, aipo e'i araka'e:

¹⁷ ‘Tüpä aipo e'i, koiye, arɨ kañɨ renonde, amondora che Espíritu Maräne'ɨ̇ opakatu ava upe; ipirätäsa pɨpe pe ra'ɨrɨ, pe rayrɨ omombe'ura ñe'ësa avɨye va'e yuvɨreko, mbɨa chi'ïvä'e osepiara oker pendar nungar mba'e yuvɨreko, oime aveira keraisa supiete va'e kwakwa va'e upe.

¹⁸ Supiete che rembigwai eta kuimba'e iyavei che rembigwai eta kuña a'e yuvɨrekoi va'e upe amondora che Espíritu a'e arɨ pɨpe oyepotase kuri, iyavei omombe'ura ñe'ësa avɨye va'e araka'endar yuvɨreko.

¹⁹ Amboyekwara poromondɨisa ɨva rese, iyavei tuvɨ, tata avei ɨva kɨ'a iyavei tatächi oyese'a tuprɨra ɨvɨ rese kuri.

²⁰ A'ese arɨ ndosesape iri chietera o'ara pɨ̇tümimbi, yasɨ oyeapora tuvɨ nungar, oimerä ko nungar mba'e-mba'e tëi yande Yar renonderä kuri.

²¹ Opakatu ava, che Yar che pɨtɨ̇vɨï eve e'i va'e, a'e oñepɨsɨröra yuvɨreko.’

²² “Pe Israel suindar, pesendu che ñe'ë: Jesús Nazaret pendar, oyapo poromondɨisa tuvicha va'e, mba'e yavai va'e Tüpä pirätäsa pɨpe pe pa'üve gweko maräne'ɨ̇ mboyekwa agwä, a'e ni'ä peikwa opakatu.

²³ Ipare rumo evokoi Jesús imondosa peü yuka agwä, a'e rumo Tüpä remimbotar rupi, esepia yɨpɨve ite Tüpä oikwa peipɨsɨra yuka uka agwä kurusu rese ava naporäi va'e upe.

²⁴ Tüpä rumo ombogwerayevɨ manosa sui, esepia manosa ndoikatui sereko agwä.”

²⁵ Supiete mborerekwar ɨvate katu va'e David oñe'ë Jesús rekokwer rese araka'e aipo e'i: ‘Che asepia ñoite che Yar che renonde yepi; a'e sekoise che akato kotɨ, ndipoi chietera mba'e-mba'e tëi oime va'erä cheu.

²⁶ Sese che pɨ'a ovɨ'arete, asapukai avei che rorɨvetesa pɨpe. Iyavei che yeroya tuprɨsave asäröra mba'e avɨye va'e che rekove iri agwä,

²⁷ esepia ndereseyai chira che ä omano va'e pa'üve nderemonduyu ukai chira nde rembigwai seko maräne'ɨ̇ va'e retekwer.

²⁸ Ko tekovesa ereikwa uka ite cheu, che mbovɨ'ara eve nde rese che rekose.’

²⁹ “Che mu eta, supiete yande ramoi David omano iyavei ñotɨ̇sa araka'e, a'e suvɨpa ouve vɨte ko'ave yande pa'üve.

³⁰ David rumo Tüpä ñe'ë mombe'usar, oikwa avei Tüpä omombe'use chupe ombou va'erä mborerekwar ɨvate katu va'e ichuindar.

³¹ A'e ndoyavɨi osepia va'e ite Poropɨsɨrösar kwerayevɨsa, evokoiyase aipo e'i oñe'ë sese: I'ä ndopɨtai chira omano va'e pa'üve setekwer ndituyui chietera no.

³² Evokoi Jesús, Tüpä remimbogwerayevɨ sekoi, a'e imombe'usar opakatu ore oroiko.

³³ Ipare Tüpä vɨraso oakato kotɨ imbogwapɨ a'e oipɨsɨ imombe'uprɨ Espíritu Maräne'ɨ̇ Vu sui, evokoiyase a'e opa omondo ko ava yuvɨrekoi va'e upe. A'e pesepia pesendu avei kurïtëi peiko.”

³⁴ Esepia nda'ei David oyeupi ɨvave oso. A'e avei aipo e'i: ‘Yar aipo e'i che Yar upe: Egwapɨ ko'ave che akato kotɨ,

³⁵ asekopɨpa uka ranera nde amotare'ɨ̇mbar ndesui.’

³⁶ “Toikwapa opakatu tekwa Israel rekwa rupindar yuvɨreko, supiete evokoi Jesús kurusu rese peyatɨka va'ekwer, a'e Tüpä omoingo opakatu yande Yargwä iyavei yande pɨsɨrö agwä.”

³⁷ Aipo renduse, tasɨ iteanga ipɨ'a pɨpe yuvɨreko, evokoiyase oporandu Pedro upe iyavei ambuae imboetasa upe yuvɨreko: –Ore mu eta, ¿mba'e vo oroyapora evokoiyase?

³⁸ Evokoiyase aipo e'i a'e ava upe: –Pemboasɨ pe angaipa peyevɨ Tüpä upe, iyavei peñeapirämo opakatu Jesucristo rer pɨpe, evokoiyase Tüpä iñeröira pe angaipa rese. Iyavei omondora Espíritu Maräne'ɨ̇ peü.

³⁹ Esepia ko ñe'ësa imombe'uprɨ a'e peü narä pe suindar upe narä, iyavei opakatu amombrɨ Tüpä sui yuvɨrekoi va'e upe narä avei; a'e akoi opakatu yande Yar Tüpä oyeupe narä gweru pota va'e.

⁴⁰ Egwë e'i oñe'ë vɨte, ava mboarakwa aipo e'i: –¡Peyepepɨ ko ava sekokwer kokotɨ tëi va'e sui!

⁴¹ Akoi ava vɨroya va'e ko ñe'ësa, oñeapirämo uka yuvɨreko; A'e arɨ pɨpe oyemboeta iri tres mil tuprɨ ava yuvɨreko sese. Jesús vɨroya va'e rese.

⁴² Opakatu vɨroya tuprɨ ite Jesús ñe'ë mombe'usar porombo'esa, opakatu gwasu avei oyeaɨsu tuprɨ yuvɨreko, oyerure iyavei oñemonu'ä oyeupe mboyape mboya'o-ya'o agwä yuvɨreko yepi.

Yɨpɨndar va'e Jesús reroyasar rekokwer

⁴³ Opakatu oyembosɨkɨye tëi yuvɨreko osepiase seta poromondɨisa Tüpä oyapose Jesús ñe'ë mombe'usar rese oiko.

⁴⁴ Opakatu Jesús reroyasar ipɨ'añemoñeta tuprɨ ite omba'e rese yuvɨreko gwekokwer upe narä;

⁴⁵ omondo ambuae ava upe oɨvɨ iyavei omba'e eta yuvɨreko, seprɨ omondo oyeupe mba'e panesa rupi-rupi.

⁴⁶ Arɨ yakatu rupi tüpärove oñemonu'ä yuvɨreko, iyavei oɨ yakatu rupi avei oñemonu'ä oyoya gwasu mboyape mboya'o agwä ipare oyoya gwasu okaru yuvɨreko oyembovɨ'asa pɨpe opɨ'añemoñeta tuprɨsa pɨpe avei.

⁴⁷ Osapukai yuvɨreko Tüpä upe yepi iyavei opakatu ava osaɨsu Jesús reroyasar yuvɨreko; yande Yar evokoiyase arɨ rupi omboeta katu ava iñepɨsɨrö agwä Jesucristo vɨroya va'e pa'üve.