Los Hechos 14 - Tüpä Ñe'ëngagwer

Ñe'ësa imombe'usa tekwa Iconio ve

¹ Pablo iyavei Bernabé, oyepota tekwa Iconio ve yuvɨraso a'eve yuvɨroike judío oɨ ñemu'äsave, iyavei omombe'u tuprɨ ñe'ësa avɨye va'e yuvɨreko sese seta oime seroyasar, judío eta iyavei nda'ei va'e judío.

² Judío ndovɨroyai va'e rumo oipɨ'añemoñeta rerova yuvɨreko ava nda'ei va'e judío Jesús reroyasar amotare'ɨ̇ save.

³ Ipare rumo, Jesús ñe'ë mombe'usar a'eve opɨta puku yuvɨreko, iyavei oyeroyasa pɨpe Tüpä rese omombe'u mba'e supiete va'e yuvɨreko; iyavei yande Yar oikwa ite omombe'use Tüpä poroaɨsusa yuvɨreko, omondo avei pirätäsa mba'e poromondɨisa apo agwä chupe.

⁴ Ava tekwa pendar rumo oyemboya'opa yuvɨreko, ñepëi judío pɨ'añemoñetasa rupi; ambuae evokoiyase Jesús ñe'ë mombe'usar rupi.

⁵ Evokoiyase oime judío iyavei nda'ei va'e judío oyemoñeta mborerekwar rese marä-marä tëi sereko agwä yuvɨreko iyavei yapi-yapi agwä ita pɨpe.

⁶ Pablo iyavei Bernabé, oyanduse yuvɨreko, oñemi voi yuvɨraso Listra ve iyavei Derbe ve, tekwa Licaonia rupi ipopɨ rupi avei.

⁷ A'eve avei omombe'u ñe'ësa avɨye va'e yuvɨreko.

Pablo yapi-yapisa ita pɨpe Listra ve

⁸ Listra ve oime mbɨa o'a ramo suive ndogwatai va'e. A'e mbɨa ogwapɨ öi,

⁹ oyapɨsaka tuprɨ Pablo ñe'ë rese, ichui Pablo oma'egätu a'e mbɨa rese oikwa voi ete oyeroyase Tüpä rese okwera agwä.

¹⁰ Evokoiyase aipo e'i oñe'ë pirätä chupe: –¡Epü'a ndepɨ ndeasu kotɨ ë'ä! A'ese a'e mbɨa opo opü'a, ichuive tuprɨ omboɨpɨ ogwata.

¹¹ Osepiase Pablo rembiapo, a'ese ava re'ɨi omboɨpɨ gwasë gwasu Licaonia ñe'ë pɨpe yuvɨreko: –¡Tüpä nungar tuprɨ ogweyɨ ava yuvɨreko yandeu!

¹² Iyavei aipo e'i Bernabé upe yuvɨreko a'e sekoi tüpä Zeus, Pablo upe tüpä Hermes e'i yuvɨreko, esepia ni'ä a'e akoi oñe'ë katu va'e ite oiko.

¹³ Pa'i Zeus suindar, a'e vɨreko otüpäro tekwa rokendɨpɨve, a'ese gweru tɨvi mba'e potrɨ avei; a'e ava reseve vɨropove'ë pota mba'e yukaprɨ yuvɨreko chupe viña.

¹⁴ Oikwase rumo Bernabé iyavei Pablo, a'ese omondoro oturukwar yuvɨnoña ava pa'ü rupi, oñe'ë pirätä yuvɨreko:

¹⁵ –Mbɨa eta, ¿ma'erä vo peyapo ko nungar? Ore rumo ava tëi, pe nungar avei oroiko. A'e gwä ite oroyu oromombe'u va'erä ñe'ësa avɨye va'e peü, pepoi va'erä ko mba'e egwë e'i tëi va'e mboeteisa sui, iyavei peyevɨ Tüpä supiete upe, a'e oyapo va'e ɨva, ɨvɨ, paragwasu, opakatu ipor reseve.

¹⁶ Tüpä rumo oipotaño ite ava upe oyapo va'erä mba'e gwemimbotar rupi araka'e,

¹⁷ a'e rumo omboyekwa ite mba'e gwembiapo gweko poroaɨsusa pɨpe, uma pi'ä a'e sekoi; a'e avei akoi ombou va'e amar peü mba'e mitɨ̇ yesu tuprɨ agwä, tembi'u avei ombou peü pevɨ'arete va'erä.

¹⁸ Yepe opa tëi omombe'u ko ñe'ësa yuvɨreko chupe, ndoikatui rumo ava pɨ'a ñemoñeta rerova kokotɨ mba'e yukaprɨ reropove'ë e'ɨ̇ agwä yuvɨreko chupe.

¹⁹ A'ese oime oyepota va'e judío Antioquía sui Iconio sui avei, oipɨ'añemoñeta rerova ava re'ɨi yuvɨreko; evokoiyase oyapi-yapi ita pɨpe Pablo yuvɨreko, a'e yayuka ite revo e'i yuvɨreko viña sese ombotɨrɨ seraso tekwa popɨve yuvɨreko.

²⁰ Oyere tuprɨ Pablo rese Jesús reroyasar yuvɨreko, a'e rumo oñarapü'a ipare oike iri oso tekwa pɨpe; a'ere arayi'ive yuvɨnosë yuvɨraso Derbe ve Bernabé rese.

²¹ Ñe'ësa avɨye va'e mombe'u pare Derbe ve, a'eve seta oime ava seroyar, ipare oyevɨ yugweru Listra ve, Iconio ve, iyavei Antioquía ve yuvɨreko.

²² A'e tekwa rupi omongere'ɨ̇ katu Jesús reroyasar, iyavei peikora poreroyasa sɨkɨye e'ɨ̇sa pɨpe, aipo e'i yuvɨreko chupe yande reike agwä Tüpä mborerekwasave oime rane itera paraɨsusa tuvicha va'e.

²³ Iyavei oiporavo ava yarakwa katu va'e ñepëi-pëi tüpäro yakatu rupi, ichui oyerure pare oyekwaku avei, ipare vɨropove'ë yande Yar upe, a'ese ramo ite vɨroya yuvɨreko.

Pablo iyavei Bernabé oyevɨ yuvɨreko Antioquía ve Siria ɨvɨ rese

²⁴ Ipare yuvɨraso ɨvɨ Pisidia rupi, oyepota Panfilia ɨvɨ rese yuvɨreko.

²⁵ Omombe'u ñe'ësa avɨye va'e Perge ve yuvɨreko, ipare yuvɨraso Atalía ve;

²⁶ a'e ichui yuvɨraso ɨarusu pɨpe Antioquía ve, a'e tekwa pɨpe yɨpɨndar imondoprɨ Tüpä poroaɨsusa pɨpe mboravɨkɨ apo agwä a'eve opa porokwaita omboavɨye yuvɨreko.

²⁷ Oyepotase Antioquía ve yuvɨraso, omonu'äpa opakatu Jesús reroyasar, ipare omombe'upa ite Tüpä oyapo va'e mba'e supi yuvɨreko, yande Yar avei omondo mba'e avɨye va'e ava nda'ei va'e judío upe, a'ese avei oikatura a'e seroya yuvɨreko.

²⁸ A'ese Pablo iyavei Bernabé yuvɨropɨta puku Jesús reroyasar pɨrɨ yuvɨreko.