Los Hechos 11 - Tüpä Ñe'ëngagwer

Pedro omombe'u ñe'ësa Jerusalén pendar Jesús reroyasar upe

¹ Jesús ñe'ë mombe'usar seroyasar avei Judea ve yuvɨrekoi va'e oyandu yuvɨreko ava nda'ei va'e judío vɨroya avei Tüpä ñe'ëngagwer yuvɨreko.

² Oyevɨse rumo Pedro Jerusalén ve oso, a'ese seta judío rupi yuvɨrogwata va'e iyembo'esa rese a'e vɨroɨrö sovai ete yuvɨreko.

³ Oporandu yuvɨreko chupe: –¿Ma'erä vo ereso evokoi nda'ei va'e judío pɨri, erekaru avei ipa'üve yuvɨreko?

⁴ Pedro omombe'u yɨpɨsuive tuprɨ opakatu mba'e osepia va'e. Aipo e'i opakatu upe:

⁵ –Che tekwa Jope ve aikose, iyavei ayerure seve che kerai: A'ese asepia ñepëi inungar turukwar tuvicha va'e, ipopɨ yakatu ñapɨ̇chisa va'e ogweyɨ ou che rovai ɨva sui.

⁶ Asepia tuprɨ ite ipɨpe opakatu mba'e oime va'e, asepia avei mba'e mɨmba iyavei ma'embiar oñaröai va'e, mboi iyavei vɨräi.

⁷ Iyavei asendu ñepëi ñe'ësa aipo e'i va'e cheu: ‘Pedro; epü'a, eyuka evokoi ichui e'u.’

⁸ Che amboyevɨ chupe: ‘Ani che Yar, esepia che nda'ui va'e ite ko mba'e ava remimbotare'ɨ̇ yepi.’

⁹ Evokoiyase asendu iri ñe'ësa ɨva pendar aipo e'i va'e cheu: ‘Akoi Tüpä remimbokatuprɨ upe nde ndiyai ete ava remimbotare'ɨ̇’ erera eiko.

¹⁰ Ko egwë e'i mbosapɨ yupagwer rupi cheu, ipare opakatu tuprɨ oyevɨ ɨvave yuvɨraso.

¹¹ A'eseve avei, mbosapɨ mbɨa imbouprɨ Cesarea sui oyepota yuvɨreko che rekosave che reka.

¹² Espíritu Maräne'ɨ̇ che kwai che so agwä, che ate'ɨ̇sa pɨpe supi yuvɨreko. Iyavei ñepëi ova yuvɨrekoi va'e mbɨa yande mu. A'eve opakatu oroike a'e mbɨa rëtäve oroso,

¹³ a'e omombe'u oreu osepia va'ekwer gwëtäve ñepëi mbigwai ɨva pendar, a'e sovai aipo e'i va'e chupe: ‘Emondo mbɨa tekwa Jope ve Simón reru agwä ikwasa avei serer rese Pedro;

¹⁴ a'e omombe'ura ndeu marä erera eñepɨsɨrö, opakatu nde rëtä pendar ñepɨsɨrö agwä avei.’

¹⁵ Amboɨpɨse rumo añe'ë yuvɨreko chupe, Espíritu Maräne'ɨ̇ ou voi ete sese inungar tuprɨ yɨpɨndar ou va'e yande rese.

¹⁶ Evokoiyase che ayemoma'endu'a voi ete yande Yar ñe'ëngagwer rese: ‘Supiete Juan oporoapirämo ɨ pɨpe tëi, pe rumo peapirämosara Espíritu Maräne'ɨ̇ pɨpe ite.’

¹⁷ Esepia, Tüpä omondo ite mba'e chupe inungar ombou va'e yandeu yande Yar Jesucristo reroyasa pɨpe, ¿umavo che aiko Tüpä amotare'ɨ̇ agwä?

¹⁸ Osenduse rumo ñe'ësa Jesús reroyasar Jerusalén pendar yuvɨreko, noñe'ëi tuprɨ iyavei omboetei Tüpä, aipo e'i yuvɨreko: –¡Evokoiyase ko Tüpä omondo avei nda'ei va'e judío upe sekokwer rekuñarö agwä, iyavei tekovesa apɨre'ɨ̇ vɨreko va'erä yuvɨreko!

Jesús reroyasar Antioquía ve

¹⁹ Koiye Esteban mano pare, omboɨpɨ Jesús reroyasar reka yuvɨreko, sese oime oñemi va'e Fenicia ve, Chipre ve iyavei Antioquía ve. A'eve omombe'u ñe'ësa Jesús rekokwer yuvɨreko judío upe, nda'ei rumo opakatu tuprɨ upe.

²⁰ Oime rumo, Jesús reroyasar Chipre ve Cirene ve avei oyepota tekwa Antioquía ve yuvɨraso ipare omombe'u avei ñe'ësa avɨye va'e yande Yar Jesús rekokwer resendar yuvɨreko.

²¹ Yande Yar pirätäsa sekoi ete sese, evokoiyase seta opoi yɨpɨndar gwekokwer araka'endar sui, egwë e'i yande Yar reroya yuvɨreko.

²² Oyanduse Jesús reroyasar Jerusalén pendar seräkwä, a'ese omondo Bernabé Antioquía ve yuvɨreko.

²³ Oyepotase a'eve, Bernabé osepia Tüpä sovasase, a'ese oyembovɨ'arete katu. Ichui omboarakwa opakatu yuvɨrekoi va'erä pɨ'a ñemoñetasa avɨye va'e yande Yar rese.

²⁴ Esepia Bernabé rekokwer avɨye eteprɨ va'e, vɨroya ite Espíritu Maräne'ɨ̇ iyavei oyeroya ite oyese. Evokoiyase seta ava oyevɨ yande Yar upe yuvɨreko.

²⁵ Ko ipare, oso Bernabé Tarso ve Saulo reka,

²⁶ ipare oyosɨse, vɨraso Antioquía ve. A'eve yuvɨrekoi tüpärove ñepëi aravɨter tuprɨ ava re'ɨi mbo'e yuvɨreko. Antioquía ve ramo ite yɨpɨndar ikwasa Cristo reroyasar yuvɨrekoise.

²⁷ A'e arɨ rupi araka'e, oime aipo Tüpä ñe'ë mombe'usar Jerusalén sui yuvɨraso va'e Antioquía ve.

²⁸ Ñepëi ipa'ü pendar, Agabo serer va'e, Espíritu pirätäsa pɨpe opü'a omombe'u ñe'ësa ou va'erä tɨavor tuvicha va'e opakatu ɨvɨ rupi, a'e egwë e'i ete, mborerekwar ɨvate katu va'e Claudio rekose.

²⁹ Evokoiyase Jesús reroyasar Antioquía pendar omondo pota voi okatugwer rupi Jesús reroyasar Judea pendar pɨtɨ̇vɨï agwä yuvɨreko.

³⁰ Egwë e'i yapo, Bernabé iyavei Saulo rupi porerekosa omondo mborerekwar tekwa Judea pendar upe yuvɨreko.